ប្រភពស្និទ្ធស្នាលនឹងប្រធានាធិបតីរុស្ស៊ី លោក វ្លាឌីមៀរ ពូទីន មួយរូបបានព្រមានប្រទេសលោកខាងលិចនៅថ្ងៃព្រហស្បតិ៍នេះថា ការកើនឡើងនៃការគាំទ្រផ្នែកយោធាដែលផ្ដល់ដល់អ៊ុយក្រែន ដោយសហរដ្ឋអាមេរិក និងសម្ព័ន្ធមិត្តរបស់ពួកគេ គឺជាការចាក់សាំងលើភ្លើងបន្ថែមទៀត ដែលអាចនឹងបង្កឱ្យមានជាជម្លោះរវាងរុស្ស៊ី និងសម្ព័ន្ធមិត្តយោធាណាតូ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
អតីតប្រធានាធិបតី ដែលបច្ចុប្បន្នជាអនុប្រធានក្រុមប្រឹក្សាសន្តិសុខរុស្ស៊ី លោក Dmitry Medvedev បានបន្ថែមឱ្យដឹងទៀតថា ការបង្កជម្លោះបែបនេះជាមួយអង្គការណាតូ គឺអាចនឹងនាំមកនូវហានិភ័យនៃការប្រែក្លាយទៅជាសង្រ្គាមនុយក្លេអ៊ែរយ៉ាងពេញលេញ។
ប្រភពដដែលនេះបានបន្តឱ្យដឹងតាមរយៈការបង្ហោះក្នុងប្រព័ន្ធតេឡេក្រាម (Telegram) ថា៖ «បណ្តាប្រទេសដែលជាសមាជិកណាតូនានា មានការបញ្ជូនសព្វាវុធជាហូរហែចូលទៅកាន់អ៊ុយក្រែន រួមនឹងការបណ្តុះបណ្តាលកងទ័ពឱ្យប្រើប្រាស់ឧបករណ៍របស់លោកខាងលិច ការបញ្ជូនទាហានស៊ីឈ្នួល និងការធ្វើសមយុទ្ធនៃប្រទេសសម្ព័ន្ធមិត្តនៅជិតព្រំដែនរបស់យើងផងដែរ ដែលសកម្មភាពអស់ទាំងនេះហាក់បង្កើនលទ្ធភាពនៃជម្លោះដោយផ្ទាល់ និងបើកចំហមួយរវាងណាតូ និងរុស្ស៊ី»។
លោក Dmitry Medvedev បន្តថា៖ «ជម្លោះបែបនេះ [បើកើតមានឡើង] តែងតែបង្កឱ្យមានជាហានិភ័យនៃការប្រែក្លាយទៅជាសង្រ្គាមនុយក្លេអ៊ែរពេញលេញ ដែលវានឹងក្លាយជាសេណារីយ៉ូដ៏មហន្តរាយមួយសម្រាប់មនុស្សគ្រប់គ្នា»។
ទោះជាយ៉ាងណា អ្នកនាំពាក្យវិមានក្រឹមឡាំង លោក Dmitry Peskov ធ្លាប់បានបញ្ជាក់ឱ្យដឹងកាលពីពេលកន្លងទៅថា គោលនយោបាយសន្តិសុខរបស់រុស្ស៊ីកំណត់ថា ប្រទេសនេះនឹងប្រើប្រាស់អាវុធនុយក្លេអ៊ែរសម្រាប់តែករណីដែលអត្ថិភាពរបស់ខ្លួនត្រូវបានគំរាមកំហែងប៉ុណ្ណោះ។
ការថ្លែងបញ្ជាក់របស់អ្នកនាំពាក្យរូបនេះត្រូវបានធ្វើឡើងបន្ទាប់ពីបណ្ដាប្រទេសលោកខាងលិចមានការព្រួយបារម្ភថា ការប៉ះទង្គិចរវាងប្រទេសទាំង២ អាចនឹងវិវត្តទៅជាសង្រ្គាមនុយក្លេអ៊ែរ។
រុស្ស៊ីបានបើកការឈ្លានពានទ្រង់ទ្រាយធំរបស់ខ្លួនទៅលើអ៊ុយក្រែនតាមផ្លូវគោក ផ្លូវអាកាស និងសមុទ្រ កាលពីថ្ងៃទី២៤ ខែកុម្ភៈ ដែលធ្វើឡើងបន្ទាប់ពីការប្រកាសសង្រ្គាមមួយដោយប្រធានាធិបតីរុស្ស៊ី លោក វ្លាឌីមៀរ ពូទីន ខណៈដែលខ្លួនក៏ធ្លាប់បានបញ្ជាដាក់អាវុធនុយក្លេអ៊ែរប្រទេសរបស់លោកឱ្យស្ថិតក្នុងការត្រៀមខ្ពស់ផងដែរ៕