ពលរដ្ឋខ្មែរអាមេរិកាំងរាប់សិបនាក់បានដើរដង្ហែក្បួនធ្វើបាតុកម្មនៅមុខក្រសួងការបរទេសអាមេរិក ដើម្បីទាមទារឱ្យមានការគោរពសិទ្ធិមនុស្សនិងលទ្ធិប្រជាធិបតេយ្យនៅក្នុងប្រទេសកម្ពុជា ខណៈលោកនាយករដ្ឋមន្ត្រី ហ៊ុន សែន ចូលរួមកិច្ចប្រជុំកំពូលអាស៊ាន-អាមេរិក កាលពីល្ងាចថ្ងៃទី១២ ខែឧសភា។
បាតុកម្មដែលមានការផ្សព្វផ្សាយនៅលើបណ្ដាញសង្គមដែរនោះ ក៏មានការចូលរួមពីពលរដ្ឋចម្រុះជាតិសាសន៍ប្រមាណ៤០០នាក់ ដូចជា ពលរដ្ឋថៃ ឡាវ មីយ៉ាន់ម៉ា និងវៀតណាម ផងដែរ ដោយពួកគេចូលរួមក្នុងគោលបំណងដូចគ្នានេះ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន បានថ្លែងថា ការធ្វើបាតុកម្មនេះ គឺជារឿងធម្មតានៅក្នុងប្រទេសប្រកាន់លទ្ធិប្រជាធិបតេយ្យ ប៉ុន្តែវានឹងមិនមានឥទ្ធិពលអ្វីមកលើរដ្ឋាភិបាលកម្ពុជានោះទេ។
លោកថា៖ «ជារឿងធម្មតានៅក្នុងសង្គមប្រជាធិបតេយ្យ វាចៀសមិនរួចពីថាមានអ្នកគាំទ្រនិងអ្នកមិនគាំទ្រ! ហើយអ្នកមិនគាំទ្រ គេមិនសប្បាយចិត្តទេ គេចេះតែធ្វើអ៊ីចឹងទៅ តាមអំពើចិត្ត ការវាយតម្លៃថាថោកទាប ថាមានចរិតតិរច្ឆាន ឬមួយថាការដែលធ្វើឱ្យប៉ះពាល់ដល់កិត្តិយសអី អាហ្នឹងចិត្តគេៗចង់បានអ៊ីចឹងហើយ បានជាគេធ្វើអ៊ីចឹង។ ក៏ប៉ុន្តែវាមិនមែនមហាជនទូទៅ មិនមែនចេះតែវាយតម្លៃទៅតាមការចង់បានរបស់ពួកប្រឆាំងនោះទេ»។
នាយកប្រតិបត្តិអង្គការអភិវឌ្ឍន៍ផ្នត់គំនិត លោក សេក សុជាតិ មើលឃើញថា បាតុកម្មនេះនឹងមិនមានឥទ្ធិពលឬប្រែប្រួលទៅលើគោលជំហររបស់លោកនាយករដ្ឋមន្ត្រី ហ៊ុន សែន និងរដ្ឋាភិបាលកម្ពុជានោះទេ។
លោកថា៖ «ការពិតទៅ ការធ្វើបាតុកម្មរបស់បងប្អូនប្រជាពលរដ្ឋយើងនៅសហរដ្ឋអាមេរិកហ្នឹង វាមិនធ្វើឱ្យកម្ពុជាមានការប្រែប្រួលទេ ជាពិសេសលោកនាយករដ្ឋមន្ត្រី ហ៊ុន សែន ក៏លោកមិនចាត់ទុកថាការធ្វើបាតុកម្មនោះជារឿងធំដែរ ព្រោះកម្លាំងគាំទ្រលោកនៅសហរដ្ឋអាមេរិកហ្នឹង វាមានទំហំធំធេង ឬច្រើនអីចឹង ហ្នឹងទី១! ហើយទី២ ពាក់ព័ន្ធនឹងប្រជាធិបតេយ្យនៅកម្ពុជា យើងឃើញហើយថា កម្ពុជាតែងតែប្រកាសជាដដែលៗថា ខ្លួនគឺជាប្រទេសដែលមានលទ្ធិប្រជាធិបតេយ្យ ហើយក៏ជាប្រទេសដែលអនុវត្តប្រជាធិបតេយ្យ និងសិទ្ធិមនុស្ស គឺធ្វើតាមច្បាប់របស់កម្ពុជាទាំងអស់។ ដូច្នេះ ខ្ញុំជឿជាក់ថា វាមិនមានអ្វីប្រែប្រួលសម្រាប់កម្ពុជានោះទេ»។
លោកនាយករដ្ឋមន្ត្រី ហ៊ុន សែន កំពុងស្ថិតនៅសហរដ្ឋអាមេរិក ដើម្បីចូលរួមកិច្ចប្រជុំកំពូលពិសេសអាស៊ាន-អាមេរិក តបតាមការអញ្ជើញរបស់ប្រធានាធិបតីអាមេរិក លោក ចូ បៃឌិន ចាប់ពីថ្ងៃទី១២-១៣ ខែឧសភា។
កាលពីល្ងាចថ្ងៃទី១២ ខែឧសភា ប្រធានាធិបតីអាមេរិក លោក ចូ បៃឌិន បានស្វាគមន៍មេដឹកនាំអាស៊ានចំនួន៩ប្រទេស (លើកលែងប្រទេសមីយ៉ាន់ម៉ា) នៅសេតវិមាន White House ជាលើកដំបូង និងជាប្រវត្តិសាស្ត្រ។
ក្រៅពីបាតុកម្មប្រឆាំងនឹងលោកនាយករដ្ឋមន្ត្រី ហ៊ុន សែន ប្រព័ន្ធផ្សព្វផ្សាយគាំទ្ររដ្ឋាភិបាលក៏បានផ្សព្វផ្សាយជាបន្តបន្ទាប់ពីការទទួលស្វាគមន៍របស់ពលរដ្ឋខ្មែរអាមេរិកាំង និងកាណាដា ប្រមាណជា២ ០០០នាក់ផងដែរ៕