ការឆ្លើយតបពីអ្នកនយោបាយ និងក្រុមអង្គការសង្គមស៊ីវិល ជុំវិញសារព្រមានរបស់នាយករដ្ឋមន្ត្រីនៅពេលនេះ ខណៈរដ្ឋាភិបាលបានហៅហេតុការណ៍ «គប់ស្បែកជើង» ដែលបានកើតឡើងនៅសហរដ្ឋអាមេរិក ថាអាចជាប់ពាក់ព័ន្ធក្រុមប្រឆាំងនៅកម្ពុជា ដោយព្រមានឆ្លើយតបវិញ ប្រសិនបើជំហររបស់អាមេរិកចាត់ទុកសកម្មភាពនោះ គឺជាផ្នែកមួយនៃការសិទ្ធិបញ្ចេញមតិទៅវិញ។
បើទោះជាបែបនេះក្ដី មន្រ្តីជាន់ខ្ពស់គណបក្សភ្លើងទៀន លោក ថាច់ សេដ្ឋា បានបដិសេធថា តាមពិតទៅ នេះជារឿងដែលគួរឱ្យហួសចិត្ត ព្រោះអ្នកប្រព្រឹត្តបទល្មើសនោះមិនមែនជាសមាជិក ឬអ្នកគាំទ្ររបស់គណបក្សប្រឆាំងទេ តែជាមនុស្សដែលស្និទ្ធនឹងគណបក្សប្រជាជនកម្ពុជាទៅវិញ។
បើតាមអនុប្រធានគណបក្សភ្លើងទៀន ប្រសិនបើរឿងនេះ លោក ហ៊ុន សែន បែរជាបង្វែរ និងដាក់បន្ទុកមកលើគណបក្សប្រឆាំង វាមិនខុសអីពីខឹងគោហើយវាយរទេះនោះឡើយ។
លោកបន្តថា៖ «អាហ្នឹងបើយើងគិតទៅ វាគឺជារឿងផ្ទៃក្នុងរបស់គណបក្សប្រជាជន។ ហើយអ្វីដែលខ្ញុំចង់មានមតិទៅលើរឿងហ្នឹង សូមកុំឱ្យយករឿងហ្នឹងធ្វើជារឿងសងសឹក និងគំនុំគុំកួន»។
លោកនាយករដ្ឋមន្រ្តី បានព្រមានដោយត្រង់ទៅក្រុមប្រឆាំង និងអ្នកធ្វើអត្ថាធិប្បាយពីបញ្ហាសង្គមនិងនយោបាយ ថាត្រូវមានការប្រយ័ត្នប្រយែងឱ្យបានខ្ពស់ ដោយលោក ហ៊ុន សែន ចាត់ទុកថា សកម្មភាពឆ្លើយតបដូចគ្នានៃការប្រើប្រាស់អំពើហិង្សាកើតចេញពីការគប់ស្បែកជើងនេះ នឹងត្រូវកើតឡើងនៅទូទាំងប្រទេសនិងបណ្ដារដ្ឋដទៃទៀតនៅជុំវិញពិភពលោក ចំពោះក្រុមប្រឆាំងវិញ។
ការថ្លែងដូច្នេះរបស់លោកនាយករដ្ឋមន្រ្តី ធ្វើឡើងនៅព្រឹកថ្ងៃទី១៧ ខែឧសភានេះ ក្នុងពិធីជួបជាមួយក្រុមគ្រូពេទ្យស្ម័គ្រចិត្ត ដែលហៅថា «ក្រុមគ្រូពេទ្យស្ម័គ្រចិត្តសម្ដេចតេជោ» នៅសាលពិព័រណ៍ជ្រោយចង្វារ រាជធានីភ្នំពេញ។
បើតាមលោក ហ៊ុន សែន ប្រសិនបើព្រឹត្តិការណ៍គប់ស្បែកជើងប្រឆាំងរូបលោក នៅលើទឹកដីសហរដ្ឋអាមេរិក ហើយប្រសិនបើរឿងនេះត្រូវសហរដ្ឋអាមេរិកចាត់ទុកថា វាគ្រាន់ត្រឹមតែជាការប្រើប្រាស់សិទ្ធិទេ លោកព្រមានថា វាសនាមេដឹកនាំរបស់ក្រុមប្រឆាំងនៅកម្ពុជាក៏នឹងត្រូវជួបហេតុការណ៍ដូចរូបលោកបានឆ្លងកាត់រួចកាលពីប៉ុន្មានថ្ងៃមុនេះនៅអាមេរិក។
លោកបន្តថា៖ «តែអ្វីដែលខ្ញុំកំពុងតែព្រួយ គឺសុវត្ថិភាពមេដឹកនាំប្រឆាំង និយាយឱ្យច្បាស់អ៊ីចឹងតែម្តង។ បើនៅណោះ គេចាត់ទុកថាជាសិទ្ធិនៃការបញ្ចេញមតិ នៅណេះក៏អាចគប់ក្បាលមេដឹកនាំប្រឆាំងនៅស្រុកខ្មែរបានដែរ។ សូមគិតកន្លែងហ្នឹងឱ្យច្បាស់»។
ក្រៅពីនេះ លោកនាយករដ្ឋមន្រ្តីក៏បានព្រមានដូចគ្នានេះដែរ ចំពោះអ្នកវិភាគមួយចំនួន។ លោកផ្ដាំទុកជាមុនថា អ្នកគាំទ្ររដ្ឋាភិបាល នៅពេលនេះ កំពុងក្ដៅក្រហាយចំពោះអ្វីដែលបានកើតឡើងចំពោះរូបលោក នៅលើទឹកដីសហរដ្ឋអាមេរិក។ ក្នុងន័យនេះ ប្រសិនបើអ្នកវិភាគសង្គមលើកឡើងចំណុចណាមួយដែលនាំទៅដល់ការបញ្ឆេះកំហឹង ស្ថានការណ៍នេះវាកាន់តែរីកធំឡើង។
ហេតុដូច្នេះ បើតាមលោក ហ៊ុន សែន ការវិភាគរបស់ក្រុមអង្គការមិនមែនរដ្ឋាភិបាលជុំវិញព្រឹត្តិការណ៍នេះ គួរធ្វើឡើងដោយថ្លឹងថ្លែងក្នុងកម្រិតវិជ្ជាជីវៈឱ្យបានត្រឹមត្រូវ។
លោកបន្តថា៖ «អង្គការក្រៅរដ្ឋាភិបាលនានាប្រយ័ត្នប្រយែងទៅលើការធ្វើអត្ថាធិប្បាយខុស ព្រោះនៅប្រទេសកម្ពុជាកំពុងខឹងសម្បារយ៉ាងខ្លាំងត្រៀមតែនឹងផ្ទុះទេ។ សូមឱ្យមានការប្រុងប្រយ័ត្នទៅលើការធ្វើអត្ថាធិប្បាយណាមួយ សម្រាប់អ្នកនៅក្នុងប្រទេសកម្ពុជា»។
នាយកទទួលបន្ទុកកិច្ចការទូទៅ នៃអង្គការការពារសិទ្ធិមនុស្សលីកាដូ លោក អំ សំអាត យល់ឃើញថា សង្គមស៊ីវិលគឺជាដៃគូសហការដ៏ល្អមួយរបស់រដ្ឋាភិបាល ហើយក៏ជាផ្នែកមួយជួយកែលម្អចំណុចខ្វះខាតរបស់រដ្ឋាភិបាលដែរ។ ម្យ៉ាងវិញទៀត ការអត្ថាធិប្បាយណាមួយ គឺផ្អែកលើស្ថានភាពជាក់ស្តែង ដែលមិនមែនជាការដើរហួសបន្ទាត់នៃវិជ្ជាជីវៈក្នុងក្របខណ្ឌសិទ្ធិមនុស្សនិងប្រជាធិបតេយ្យទេ។
លោកបន្តថា៖ «យើងជាអង្គការសង្គមស៊ីវិលដែលធ្វើការផ្នែកសិទ្ធិមនុស្ស យើងមិនមែនជាសត្រូវរបស់រដ្ឋាភិបាល ឬក៏ជា[សត្រូវ]របស់អាជ្ញាធរទេ។ តាមការពិតទៅ យើងជាអង្គការសង្គមស៊ីវិល និងគឺជាដៃគូរបស់រដ្ឋាភិបាល»។
បើតាមលោក អំ សំអាត ក្នុងនាមជាអ្នកផ្តល់ការអត្ថាធិប្បាយ ជាពិសេសពាក់ព័ន្ធបញ្ហាសិទ្ធិមនុស្ស លោកដូចជាមិនមានការព្រួយបារម្ភណាមួយ ចំពោះការព្រមានរបស់លោកនាយករដ្ឋមន្រ្តីនេះទេ ព្រោះការផ្តល់យោបល់របស់លោកធ្វើឡើងក្នុងកម្រិតបច្ចេកទេស និងគោលការណ៍ បទបញ្ជា និងនីតិវិធី ដែលមានចែងរបស់ស្ថាប័ន។
មិនខុសគ្នាដែរ ប្រធានអង្គការអភិវឌ្ឍន៍ផ្នត់គំនិត លោក សេក សុជាតិ ដែលតែងផ្តល់សំឡេងនៅតាមប្រព័ន្ធផ្សព្វផ្សាយកន្លងទៅ យល់ឃើញថា លោកហាក់មិនខ្លាចរអាចំពោះអ្វីដែលលោក ហ៊ុន សែន ថ្លែងនៅពេលនេះទេ ប្រសិនបើការបញ្ចេញមតិនោះប្រកបដោយវិជ្ជាជីវៈនិងក្រមសីលធម៌។
លោក សេក សុជាតិ អះអាងថា លោកនឹងនៅតែបន្តប្រើប្រាស់សិទ្ធិនេះ ដើម្បីជួយកែលម្អចំណុចខ្វះខាតបន្ថែមទៀតរបស់រដ្ឋាភិបាល។
លោកបន្តថា៖ «ខ្ញុំមិនសូវជាយកការភ័យខ្លាចធ្វើជាមូលហេតុ ដើម្បីគេហៅថា នៅក្នុងការបញ្ចេញមតិ ឬក៏សម្ដែងការយល់ឃើញរបស់ខ្លួន ពាក់ព័ន្ធនឹងកិច្ចការរបស់សង្គមទេ។ អ្វីដែលខ្ញុំលើកនេះ គ្រប់អ្នកវិភាគ ឬក៏គ្រប់អ្នកបកស្រាយទៅលើបញ្ហាផ្សេងៗនៅក្នុងសង្គមនេះ ប្រសិនបើយើងប្រកាន់យកនូវវិជ្ជាជីវៈ ហើយរក្សាបាននូវសីលធម៌ ហើយនិងមានគុណធម៌ នៅក្នុងការសម្ដែងមតិឬក៏ការបញ្ចេញយោបល់ ខ្ញុំជឿជាក់ថា វានឹងមិនជួបបញ្ហាទេ»។
លោក អ៊ុក ទូច បានផ្តល់បទសម្ភាសន៍ឱ្យបណ្ដាញសារព័ត៌មាន បញ្ជាក់ថា លោកមានសាច់ញាតិដែលជាមនុស្សស្និទ្ធជាមួយលោកស្រី ម៉ែន សំអន ឧបនាយករដ្ឋមន្រ្តី និងជារដ្ឋមន្រ្តីទំនាក់ទំនងរដ្ឋសភា ព្រឹទ្ធសភា និងអធិការកិច្ច។ ការគប់ស្បែកជើងប្រឆាំងវត្តមានលោក ហ៊ុន សែន នៅក្នុងទឹកដីអាមេរិកនេះ ត្រូវបានលោក អ៊ុក ទូច បញ្ជាក់ថា ដោយសារលោកមិនសប្បាយចិត្តនឹងការដឹកនាំប្រទេសរបស់លោកនាយករដ្ឋមន្រ្តី៕
