លោកនាយករដ្ឋមន្ត្រី ហ៊ុន សែន ស្នើឱ្យឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា បញ្ជូនសាររបស់លោកទៅកាន់រដ្ឋបាលលោក ចូ បៃឌិន ឱ្យឆ្លើយបំភ្លឺ ជុំវិញសកម្មភាពបុរសជនជាតិខ្មែរអាមេរិកាំងម្នាក់ដែលគប់ស្បែកជើងមកលើរូបលោក ក្នុងពេលធ្វើទស្សនកិច្ចនៅសហរដ្ឋអាមេរិក។
ការលើកឡើងរបស់ប្រមុខរដ្ឋាភិបាលកម្ពុជា លោក ហ៊ុន សែន បានធ្វើឡើងនៅក្នុងពិធីជួបសំណេះសំណាលជាមួយក្រុមសមាគមគ្រូពេទ្យស្ម័គ្រចិត្តប្រឆាំងជំងឺកូវីដ-១៩ នៅឯសាលពិព័រណ៍ជ្រោយចង្វារ រាជធានីភ្នំពេញ នៅព្រឹកថ្ងៃទី១៧ ខែឧសភា ឆ្នាំ២០២២។
លោកនាយករដ្ឋមន្ត្រី ហ៊ុន សែន បានផ្តាំទៅសហរដ្ឋអាមេរិកថា ការគប់ស្បែកជើងមិនមែនជារឿងតូចតាចទេ ហើយបើអាមេរិកចាត់ទុកថា នេះជារឿងសិទ្ធិបញ្ចេញមតិ នោះលើពិភពលោកក៏គ្មានច្បាប់ទម្លាប់ទៀតដែរ។ លោកបានគូសបញ្ជាក់ថា លោកមិនឱ្យសហរដ្ឋអាមេរិកចាត់វិធានការផ្លូវច្បាប់លើបុគ្គលដែលយកស្បែកជើងគប់លោកនោះទេ ក៏ប៉ុន្តែលោកបានចោទសួរថា ប្រសិនបើសហរដ្ឋអាមេរិកចាត់ទុកថា អំពើហិង្សានោះជាការបញ្ចេញមតិនោះ ចរន្តបែបនេះនឹងមានគ្រប់ទីកន្លែង។
លោកថា៖ «ខ្ញុំផ្ដាំផ្ញើទៅភាគីអាមេរិក ខ្ញុំមិនមែនប្រដៅអាមេរិកទេ! អាមេរិកត្រូវគិតឱ្យច្បាស់លើចំណុចនេះ សង្ឃឹមថា ឯកឧត្ដមអគ្គរដ្ឋទូតនៅទីក្រុងភ្នំពេញ បញ្ជូនសារនេះទាំងស្រុងទៅកាន់រដ្ឋបាលអាមេរិក។ ប្រសិនបើជាអាមេរិកចាត់ទុករឿងនេះ វាជាសិទ្ធិបញ្ចេញមតិ ប្រហែលជារឿងនេះនឹងកើតនៅគ្រប់ប្រទេសទាំងអស់ រាប់ទាំងនៅកម្ពុជា។ អ៊ីចឹងក្រុមអ្នកប្រឆាំង ហ៊ុន សែន ទាំងប៉ុន្មានត្រៀមត្រូវក្បាលនឹងស្បែកជើង។ រឿងនេះមិនមែនជារឿងតូចតាចទេ សុំសហរដ្ឋអាមេរិកគិតគូរឱ្យបានច្បាស់»។
តាមរយៈវីដេអូឃ្លីបមួយដែលត្រូវបានផ្សព្វផ្សាយលើបណ្ដាញសង្គមនានា កាលពីយប់ថ្ងៃទី១១ ខែឧសភា បានបង្ហាញពីបុរសវ័យជាង៦០ឆ្នាំម្នាក់ ពាក់អាវធំ ក្រវាត់ក បានដោះស្បែកជើងប៊ូរបស់ខ្លួនគប់សំដៅទៅកាន់លោកនាយករដ្ឋមន្ត្រី ហ៊ុន សែន ដែលកំពុងឈរថតហ្សែលហ្វី (Selfie) ជាមួយអ្នកគាំទ្ររូបលោក នៅខាងក្រៅសណ្ឋាគារមួយនៅសហរដ្ឋអាមេរិក។ ប៉ុន្តែជាសំណាងល្អ ស្បែកជើងនេះមិនត្រូវចំលោកនាយករដ្ឋមន្ត្រី ហ៊ុន សែន នោះទេ ដោយធ្លាក់ចំទូរសព្ទដៃរបស់អ្នកគាំទ្រស្ទើរតែជ្រុះចេញពីដៃ។
បុរសខ្មែរអាមេរិកាំងរូបនោះត្រូវបានគេស្គាល់ឈ្មោះ អ៊ុក ទូច ជាអតីតយោធាសម័យសាធារណរដ្ឋខ្មែររបស់លោក លន់ នល់ ដែលបច្ចុប្បន្នរស់នៅរដ្ឋកាលីហ្វ័រញ៉ា សហរដ្ឋអាមេរិក។
ភ្លាមៗនោះ ប្រមុខរដ្ឋាភិបាលកម្ពុជា លោក ហ៊ុន សែន មិនបានបង្ហាញការខឹងសម្បារទៅកាន់បុរសរូបនេះឡើយ ហើយផ្ទុយទៅវិញ លោកបានអំពាវនាវឱ្យអ្នកគាំទ្ររបស់លោកនៅសហរដ្ឋអាមេរិកអត់ធ្មត់ និងមិនតបតចំពោះជនដែលបង្កហេតុនិងអ្នកដែលប្រឆាំងលោកដោយហិង្សា ដែលនាំឱ្យខុសនឹងច្បាប់សហរដ្ឋអាមេរិកនោះទេ។
លោកថា៖ «ខ្ញុំបានទទួលសំណូមពរពីទីក្រុងភ្នំពេញ កម្លាំងបីសុំធ្វើបាតុកម្មប្រឆាំងស្ថានទូតអាមេរិក ទាមទារឱ្យអាមេរិកដោះស្រាយ ប៉ុន្តែខ្ញុំបានប្រាប់មកទីក្រុងភ្នំពេញថា កុំធ្វើអ្វីទាំងអស់ៗ! ហេតុអ្វីបានជាខ្ញុំត្រូវប្រាប់គេអ៊ីចឹង? ចាំទេ? ២០១៦ ក្នុងពេលដែលខ្ញុំទៅប្រទេសបារាំង នៅឯណេះគេធ្វើបាតុកម្មប្រឆាំង[នៅ]បារាំង ប្រតិកម្មនៅភ្នំពេញ វាយអ្នកតំណាងរាស្ត្រនោះ ខ្ញុំព្រួយណាស់អារឿងហ្នឹង អ៊ីចឹងបានខ្ញុំត្រូវគ្រប់គ្រងសភាពការណ៍ភ្លាម អត់ឱ្យធ្វើអ្វីទេ»។
ស្ថានទូតអាមេរិកប្រចាំនៅរាជធានីភ្នំពេញ នៅមិនទាន់ឆ្លើយតបចំទៅនឹងសំណួររបស់វីអូឌីនៅឡើយទេ ពាក់ព័ន្ធការលើកឡើងរបស់លោកនាយករដ្ឋមន្ត្រី ហ៊ុន សែន ដោយគ្រាន់តែបានលើកឡើងពីភាពជោគជ័យនៃកិច្ចប្រជុំអាស៊ាន-អាមេរិក ដែលប្រព្រឹត្តទៅកាលពីថ្ងៃទី១២ និងទី១៣ ខែឧសភាប៉ុណ្ណោះ។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា បានសម្ដែងការព្រួយបារម្ភជាខ្លាំងចំពោះការវិវត្តនៃសំណុំរឿងនេះ។ លោកសង្ឃឹមថា សហរដ្ឋអាមេរិកនឹងឆ្លើយតបយ៉ាងណា ដើម្បីបញ្ចៀសកុំឱ្យមានអំពើហិង្សាណាមួយនៅពេលខាងមុខ។
លោកថា៖ «ចំពោះយើងសង្គមស៊ីវិល យើងពិតជាមានការព្រួយបារម្ភណាស់ ហើយយើងក៏មិនចង់ឃើញសង្គមកម្ពុជាយើងមានអំពើហិង្សាកើតឡើងដែរ។ ហើយយើងក៏ដឹងដែរថា ក្នុងសង្គមណាមួយក៏ដោយ ក៏គេមិនចង់ឃើញមានអំពើហិង្សាកើតឡើងនោះទេ។ អ៊ីចឹងយើងមានការព្រួយបារម្ភយ៉ាងខ្លាំង មិនដឹងថាតើសហរដ្ឋអាមេរិកអាចបកស្រាយនូវអ្វីដែលជាការលើកឡើងរបស់ប្រមុខរដ្ឋាភិបាល[កម្ពុជា]បាន ដោយមិនមានការប៉ះទង្គិច ឬធ្វើឱ្យមានភាពឈឺចាប់អីបន្តកើតមានទៅទៀត។ អ៊ីចឹងក្នុងនាមយើងជាអ្នកធ្វើកិច្ចការងារសង្គម យើងពិតជាមានការព្រួយបារម្ភ ហើយក៏មិនចង់ឃើញរូបភាពហិង្សាណាមួយកើតឡើងបន្តទៀតទេ បន្ទាប់ពីមានព្រឹត្តិការណ៍គប់ស្បែកជើងហ្នឹងមក»។
យ៉ាងណាក្តី សម្រាប់លោកនាយករដ្ឋមន្ត្រី ហ៊ុន សែន ករណីគប់ស្បែកជើងទៅមេដឹកនាំនៅលើពិភពលោកនេះ មិនមែនជាលើកទីមួយឡើយ។ ក្នុងនោះរួមមាន អតីតប្រធានាធិបតីអាមេរិក លោក ចច ប៊ូស ក៏ធ្លាប់ត្រូវបានអ្នកកាសែតដោះស្បែកជើងគប់ចំនួន២ដង តែមិនត្រូវ។ ដោយឡែក កាលពីឆ្នាំមុន ប្រធានាធិបតីបារាំង លោក អេម៉ានូអ៊ែល ម៉ាក្រុង ក៏ត្រូវបានយុវជនម្នាក់ទះកំផ្លៀងផងដែរ នៅពេលលោកចុះជួបអ្នកគាំទ្រ៕
