អាជ្ញាធរក្នុងខេត្តព្រះសីហនុបានឱ្យដឹងថា បុរសជាជនជាតិវៀតណាមម្នាក់បានស្លាប់ភ្លាមៗបន្ទាប់ពីធ្លាក់ពីលើអគារខុនដូមួយកន្លែងក្នុងក្រុងព្រះសីហនុ។
យោងតាមនាយប៉ុស្តិ៍នគរបាលសង្កាត់លេខ២ លោក សេង ហ៊ត ថ្លែងថា បុរសជនជាតិវៀតណាម អាយុ៣៥ឆ្នាំ ខាងលើនេះ បានស្លាប់ភ្លាមៗបន្ទាប់ពីធ្លាក់ពីលើខុនដូ ខណៈការស៊ើបអង្កេតលម្អិតទាក់ទិននឹងករណីនេះកំពុងតែបន្តធ្វើឡើង។
លោកបន្ថែមថា៖ «អ្នកដែលស្លាប់ក្នុងករណីនេះ គឺជាជនជាតិវៀតណាម មិនមែនជាជនជាតិចិនឡើយ។ ទោះជាយ៉ាងណា យើងនៅមិនទាន់អាចកំណត់បានអត្តសញ្ញាណជនរងគ្រោះច្បាស់លាស់នៅឡើយទេ»។
ប្រភពដដែលបន្តថា ហេតុការណ៍ធ្លាក់ពីលើអគារខុនដូដែលបង្កឱ្យជនរងគ្រោះស្លាប់នេះបានកើតឡើងកាលពីវេលាម៉ោង៧និង៣០នាទីព្រឹកថ្ងៃចន្ទ ប៉ុន្តែអាជ្ញាធរនៅមិនទាន់អាចបញ្ជាក់បានពីមុខរបរដែលបុរសនោះធ្វើមុនស្លាប់នៅខេត្តព្រះសីហនុឡើយ។
ទាក់ទិននឹងករណីនេះ វីអូឌី បានទាក់ទងអធិការរងក្រុងព្រះសីហនុ លោក ឱ វីរៈ ប៉ុន្តែលោកបានប្រាប់ឱ្យសួរទៅកាន់នគរបាលឃុំជំនួសវិញ។
វីអូឌី ក៏បានទាក់ទងស្ត្រីម្នាក់ធ្វើការនៅអគ្គកុងស៊ុលវៀតណាមប្រចាំខេត្តព្រះសីហនុ ដើម្បីសាកសួរបន្ថែមអំពីករណីនេះ ប៉ុន្តែស្រ្តីរូបនោះបានឱ្យដឹងថាខ្លួនមិនមានតួនាទីឆ្លើយសំណួរអ្នកសារព័ត៌មាននោះទេ ហើយបានស្នើឱ្យអ្នកសារព័ត៌មានដាក់សំណួរតាមរយៈអ៊ីមែលជំនួសវិញ។ ទោះជាយ៉ាងណា សំណួរដែលបានផ្ញើតាមរយៈអ៊ីមែលនៅមិនទាន់មានការឆ្លើយតបឡើយ គិតរហូតមកដល់ពេលនេះ។
គួរបញ្ជាក់ថា បុរសជាជនជាតិវៀតណាមមួយរូបផ្សេងទៀត កាលពីពេលថ្មីៗនេះ ក៏បានស្លាប់ផងដែរ បន្ទាប់ពីធ្លាក់ពីលើជាន់ទី៨ នៃកាស៊ីណូក្នុងក្រុងបាវិតមួយកន្លែង ដែលត្រូវបានគេស្គាល់ថាជាកម្មសិទ្ធិរបស់សមាជិកព្រឹទ្ធសភាមកពីគណបក្សប្រជាជនកម្ពុជា។
សម្រាប់ហេតុការណ៍ធ្លាក់ពីលើអាគារក្នុងក្រុងព្រះសីហនុវិញ គេសង្កេតឃើញថា ករណីនេះមានការកើតឡើងជាញឹកញាប់ ដែលកាលពីចុងខែមីនាកន្លងទៅ ក៏កើតមាន២ករណីផងដែរ។
ខេត្តព្រះសីហនុ ក្នុងរយៈពេលប៉ុន្មានឆ្នាំចុងក្រោយនេះ បានក្លាយជាទីតាំងដែលសម្បូរទៅដោយសកម្មភាពខុសច្បាប់កើតឡើងជាបន្តបន្ទាប់ ដែលក្នុងនោះរួមមាន ការបង្ខំឱ្យធ្វើការងារ ការឃុំខ្លួនក្នុងប្រតិបត្តិការឆបោកតាមប្រព័ន្ធអនឡាញ ហើយក្នុងករណីមួយចំនួន ជនរងគ្រោះក៏បានលើកឡើងពីគោលបំណងលោតពីលើអគារដើម្បីគេចខ្លួនផងដែរ៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Man Dies Falling From Condo in Sihanoukville