សមត្ថកិច្ចជំនាញនៃមន្ទីរប្រឆាំងគ្រឿងញៀន បង្ក្រាបមន្ទីរពិសោធន៍លួចលាក់និងកែច្នៃផលិតគ្រឿងញៀនចំនួន៣ទីតាំង នៅរាជធានីភ្នំពេញ និងខេត្តកំពង់ស្ពឺ ក្នុងនោះបានចាប់ខ្លួនជនជាតិចិនតៃវ៉ាន់៤នាក់ និងរឹបអូសសារធាតុញៀនជាង១ ៤០០គីឡូក្រាម និងសារធាតុគីមីជាង១១តោន។
យោងតាមទំព័រហ្វេសប៊ុករបស់មន្ទីរប្រឆាំងគ្រឿងញៀន នៅថ្ងៃទី២៦ ខែឧសភា ឆ្នាំ២០២២នេះ បានឱ្យដឹងថា បន្ទាប់ពីការស្រាវជ្រាវរយៈពេល២ខែរួចមក នៅថ្ងៃទី១៩ ខែឧសភាថ្មីៗនេះ ជំនាញនៃមន្ទីរប្រឆាំងគ្រឿងញៀន និងស្នងការដ្ឋាននគរបាលរាជធានីភ្នំពេញនិងខេត្តកំពង់ស្ពឺ ដោយមានការសម្របសម្រួលពីព្រះរាជអាជ្ញាររងអមសាលាដំបូងរាជធានីភ្នំពេញនិងខេត្តកំពង់ស្ពឺផងនោះ បានបង្ក្រាបទីតាំងមន្ទីរពិសោធន៍លួចលាក់កែច្នៃគ្រឿងញៀនចំនួន៣ទីតាំង ក្នុងនោះមាន២ទីតាំង ស្ថិតនៅចម្ការស្វាយ ក្នុងឃុំសង្កែសាទប ស្រុកឱរ៉ាល់ និងឃុំយាយម៉ៅពេជ្រនិល ស្រុកភ្នំស្រួច ខេត្តកំពង់ស្ពឺ និងមួយទីតាំងទៀតស្ថិតក្នុងសង្កាត់បឹងកេងកង១ ខណ្ឌបឹងកេងកង រាជធានីភ្នំពេញ។
ប្រភពដដែលបន្តថា ក្នុងប្រតិបត្តិការបង្ក្រាបនោះដែរ សមត្ថកិច្ចជំនាញបានឃាត់ខ្លួនបុរសជាជនសង្ស័យចំនួន៤នាក់ ជាជនជាតិតៃវ៉ាន់ ក្នុងនោះមានឈ្មោះ TIEN CHAN FU អាយុ២៨ឆ្នាំ ជាមេការ, ឈ្មោះ KHOU PO WEN អាយុ២៨ឆ្នាំ, ឈ្មោះ TENG KUO CHING អាយុ៣៩ឆ្នាំ និងឈ្មោះ LIN YI CHHENG អាយុ៣១ឆ្នាំ ដោយអ្នកទាំង៣ជាអ្នកបច្ចេកទេស។
ចំណែកវត្ថុតាង មន្ទីរប្រឆាំងគ្រឿងញៀនរឹបអូសបាននូវម៉ាស៊ីន ឧបករណ៍ សម្ភារសម្រាប់កែច្នៃ ផលិត វេចខ្ចប់មួយចំនួនធំ និងសារធាតុគ្រឿងញៀនប្រភេទកេតាមីនទម្ងន់ជាង៤០គីឡូក្រាម ល្បាយសារធាតុញៀនកេតាមីនទម្ងន់១ ៤២៥គីឡូក្រាម ថ្នាំគ្រាប់នីមេតាហ្សេប៉ាមទម្ងន់០,៩ក្រាម និងសារធាតុគីមីផ្សំជាង១១តោន។
បច្ចុប្បន្ន ជនសង្ស័យ ព្រមទាំងវត្ថុតាង ត្រូវបានមន្ទីរប្រឆាំងគ្រឿងញៀនកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការបន្តតាមនីតិវិធី៕
