ពលករចំណាកស្រុកមួយចំនួនដែលកំពុងធ្វើការនៅប្រទេសថៃ សម្រេចចិត្តមិនត្រលប់មកកម្ពុជាដើម្បីបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥នេះទេ ដោយសារកត្តាជីវភាព។
ពលករខ្មែរដែលធ្វើការនៅប្រទេសថៃ អ្នកស្រី ប៊ុនធឿន រស្មី មានប្រសាសន៍នៅថ្ងៃទី២ ខែមិថុនា ឆ្នាំ២០២២នេះថា គាត់ទៅធ្វើការនៅប្រទេសថៃជាច្រើនឆ្នាំមកហើយ ប៉ុន្តែនៅប៉ុន្មានឆ្នាំចុងក្រោយនេះ ស្ថានភាពឆ្លងរាលដាលនៃជំងឺកូវីដ-១៩ ធ្វើឱ្យពួកគាត់ជួបបញ្ហាប្រឈមច្រើនក្នុងជីវភាពគ្រួសារ។ ដោយសារបញ្ហានេះ អ្នកស្រីថា រូបគាត់មិនអាចធ្វើដំណើរពីប្រទេសថៃ មកបោះឆ្នោតជ្រើសរើសក្រុមប្រឹក្សាឃុំ-សង្កាត់នៅកម្ពុជា នៅថ្ងៃទី៥ ខែមិថុនា ខាងមុខនេះទេ។
អ្នកស្រីនិយាយថា៖ «ដោយសារការធ្វើដំណើរមកតែម្នាក់ឯង ណាមួយខ្ញុំខ្វះខាតលុយដែរ អ៊ីចឹងខ្ញុំអត់មានលុយធ្វើដំណើរមកខ្មែរវិញទេ អ៊ីចឹងអត់មក[បោះឆ្នោត]ទេ»។
លោក ពឹង វុឌ្ឍី មានស្រុកកំណើតនៅភូមិដងទង់ ឃុំដំបូកខ្ពស់ ស្រុកអង្គជ័យ ខេត្តកំពត ដែលអះអាងថាជាពលករចំណាកស្រុកធ្វើការនៅប្រទេសថៃ ឱ្យដឹងដែរថា គាត់ចង់ត្រលប់មកបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥នេះដែរ ប៉ុន្តែដោយសារមិនមានថវិកាគ្រប់គ្រាន់សម្រាប់ការចំណាយលើការធ្វើដំណើរ ហើយបច្ចុប្បន្នជាប់បំណុលគេផងនោះ ដូច្នេះគាត់សម្រេចចិត្តមិនត្រលប់មកបោះឆ្នោតទេ។
លោកនិយាយថា៖ «ខ្ញុំអត់បានទៅ[ប្រទេសខ្មែរ]ទេបង ចាំអាណត្តិក្រោយទៀត ឥលូវវារកលុយអត់បាន ខ្ញុំកំពុងជំពាក់គេ»។
អ្នកនាំពាក្យរដ្ឋបាលខេត្តបាត់ដំបង លោក សៀម ប៊ុនរិទ្ធិ មានប្រសាសន៍ថា រយៈពេលជិត១ខែនេះ មានពលករប្រមាណ១៥០នាក់បាននាំគ្នាធ្វើដំណើរស្ទើរជារៀងរាល់ថ្ងៃ ពីប្រទេសថៃត្រឡប់មកកម្ពុជា តាមច្រកព្រំដែនក្នុងខេត្តនេះ ដែលចំនួននេះមិនមានអ្វីប្រែប្រួលខុសពីថ្ងៃធម្មតានោះទេ។ លោកកត់សម្គាល់ថា នៅអាណត្តិនេះ មិនសូវមានពលករសម្រុកមកបោះឆ្នោតច្រើនដូចអាណត្តិមុនៗនោះទេ ។
លោកថា៖ «កាលអំឡុងពេលកូវីដ-១៩ ពលករត្រលប់មកច្រើនដូចបាក់ទំនប់។ អ៊ីចឹងរាល់ថ្ងៃ ពលករមកធម្មតាទេ រាយៗទេ សូម្បីតែជិតបោះឆ្នោត អត់មានកម្មករឬពលករមកគំហុកដូចមុនៗ គឺអត់មានទេ»។
ទោះជាយ៉ាងណា លោក សៀម ប៊ុនរិទ្ធិ អំពាវនាវទៅប្រជាពលរដ្ឋ និងពលករដែលចំណាកស្រុកទៅក្រៅប្រទេស មកចូលរួមការបោះឆ្នោតជ្រើសរើសក្រុមប្រឹក្សាឃុំ-សង្កាត់ទាំងអស់គ្នា ដើម្បីជ្រើសរើសថ្នាក់ដឹកនាំដែលខ្លួនពេញចិត្ត។
ចំណែក អ្នកនាំពាក្យរដ្ឋបាលខេត្តបន្ទាយមានជ័យ លោកស្រី រស់ សុផានី មានប្រសាសន៍ថា ជាធម្យម មានពលករស្របច្បាប់និងមិនស្របច្បាប់ប្រមាណ២០០នាក់បានធ្វើដំណើរពីប្រទេសថៃត្រលប់មកកម្ពុជាវិញតាមច្រកព្រំដែនជារៀងរាល់ថ្ងៃ ដើម្បីចូលរួមបោះឆ្នោតជ្រើសរើសក្រុមប្រឹក្សាឃុំ-សង្កាត់។ ប៉ុន្តែលោកស្រីថា ចំនួននេះមិនច្រើនដូចពីអាណត្តិមុនៗនោះទេ ខណៈឆ្នាំនេះស្ថានភាពកូវីដ-១៩ទើបតែធូរស្រាល។
លោកស្រីមានប្រសាសន៍ថា៖ «មានខ្លះស្របច្បាប់ មានខ្លះក៏មិនស្របច្បាប់ គ្រាន់តែថាអត្រាអ្នកដែលស្របច្បាប់ច្រើន ចូល៨០%ហើយ ដែលគាត់មក គឺគាត់មកបោះឆ្នោត»។
អ្នកនាំពាក្យគណបក្សភ្លើងទៀន លោក ថាច់ សេដ្ឋា មានប្រសាសន៍ថា ដើមចមដែលនាំឱ្យពលករខ្មែរនៅក្រៅប្រទេសមិនបានត្រលប់មកបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិនេះ ដោយសារតែពួកគាត់ទើបតែជួបបញ្ហាប្រឈមនឹងវិបត្តិកូវីដ-១៩ និងប៉ះពាល់ដល់សេដ្ឋកិច្ចគ្រួសារជាដើម។ ទោះយ៉ាងណា លោកបង្ហាញការសោកស្ដាយ បើសិនជាពលករចំណាកស្រុកមួយចំនួនមិនបានមកបោះឆ្នោតជ្រើសរើសតំណាងដែលខ្លួនពេញចិត្ត ស្របតាមគោលការណ៍ប្រជាធិបតេយ្យ ។
លោកបន្ថែមថា កន្លងមក គណបក្សប្រឆាំងធ្លាប់ស្នើទៅរដ្ឋាភិបាលឱ្យបង្កើតការិយាល័យបោះឆ្នោតនៅតាមស្ថានទូតនៃប្រទេសដែលមានពលករចំណាកស្រុកនោះដែរ ប៉ុន្តែរដ្ឋាភិបាលកម្ពុជាបដិសេធ។
លោកមានប្រសាសន៍ថា៖ «មានស្ថានទូតនៅទីនោះបោះឆ្នោតបានតើ! ប៉ុន្តែគាត់មិនធ្វើ ដោយសារតែគាត់ដឹងថា អ្នកដែលនៅក្រៅប្រទេស មិនថា អ្នករៀនសូត្រចេះដឹង ឬនៅប្រទេសផ្សេងៗ គេយល់ដឹងពីប្រជាធិបតេយ្យ មិនថានៅប្រទេសថៃ ឬប្រទេសនៅជិតៗហ្នឹងទេ ក៏គេយល់ដឹង ឃើញទង្វើរបស់រដ្ឋាភិបាល មិនមានអ្នកណាគេគាំទ្រទេ បង្កការឈឺចាប់កាន់តែខ្លាំងឡើងៗ ធ្វើឱ្យពលករចំណាកស្រុក»។
វីអូឌី មិនអាចសុំការអត្ថាធិប្បាយជុំវិញករណីនេះពីអ្នកនាំពាក្យគណបក្សប្រជាជនកម្ពុជា លោក សុខ ឥសាន បានទេ នៅថ្ងៃព្រហស្បតិ៍នេះ។
អ្នកគ្រប់គ្រងកម្មវិធីការងារ នៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) លោក ឃុន ថារ៉ូ មានប្រសាសន៍ថា ជារៀងរាល់អាណត្តិ ពលករខ្មែរដែលធ្វើការនៅប្រទេសថៃបាននាំគ្នាធ្វើដំណើរត្រលប់មកកម្ពុជាតាមច្រកព្រំដែននានាយ៉ាងច្រើនកុះករ ដើម្បីចូលរួមបោះឆ្នោតថ្នាក់ជាតិ និងថ្នាក់ក្រោមជាតិ។
ប៉ុន្តែសម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥នេះ លោកសង្កេតឃើញថា ហាក់មានពលករតិចតួចប៉ុណ្ណោះដែលបានត្រលប់មកមាតុប្រទេសវិញ ដើម្បីចូលរួមការបោះឆ្នោត ដោយសារការធ្វើដំណើរមកស្រុកកំណើតម្តងៗត្រូវចំណាយទ្វេដង។ ទោះជាបែបនេះក្តី លោកលើកទឹកចិត្តដល់ពលករចំណាកស្រុកទាំងអស់ គួរតែមកចូលរួមការបោះឆ្នោត ដើម្បីជ្រើសរើសថ្នាក់ដឹកនាំដែលខ្លួនពេញចិត្ត និងជួយការពារប្រយោជន៍ពួកគាត់នៅពេលជួបបញ្ហាប្រឈមនានាក្នុងមូលដ្ឋានរបស់ខ្លួន។
លោក ឃុន ថារ៉ូ ថ្លែងថា៖ «សំឡេងឆ្នោត ជាការសម្រេចអនាគត សម្រាប់ការជ្រើសរើសនូវថ្នាក់ដឹកនាំមួយក្នុងមូលដ្ឋានឃុំសង្កាត់ វាសំខាន់ណាស់។ ទោះជាយ៉ាងណាក៏ដោយ គោលនយោបាយទាំងឡាយដែលទាក់ទងនឹងឃុំសង្កាត់ វាឆ្លើយតបទៅនឹងស្ថានភាពជាក់ស្តែងចំពោះទីផ្សារការងារ កិច្ចគាំទ្រសង្គម ទាក់ទងបញ្ហាកសិករ បញ្ហាកសិកម្ម គោលនយោបាយនូវការអភិវឌ្ឍនូវហេដ្ឋារចនាសម្ព័ន្ធនៅក្នុងសហគមន៍គាត់ជាដើមហ្នឹង វាជាការចាំបាច់ណាស់សម្រាប់ពួកគាត់»។
លោកបន្ថែមថា៖ «បើសិនជាពួកគាត់មិនមានការចូលរួមឱ្យបានពេញលេញទេ មានន័យថា បញ្ហាប្រឈមរបស់គាត់ ក្នុងនាមជាពលករចំណាកស្រុកដែលធ្វើការនៅស្រុកគេ នៅតែប្រឈមទៅនឹងហានិភ័យ បញ្ហាប្រឈមទាំងអស់ហ្នឹង។ ទោះជាយ៉ាងណា ទាក់ទងនឹងការចំណាយក្នុងការធ្វើដំណើរក៏ដោយ ខ្ញុំគិតថា វានឹងអាចចូលរួមឱ្យមានការផ្លាស់ប្តូរលំហប្រជាធិបតេយ្យនៅក្នុងមូលដ្ឋាន»។
តាមប្រតិទិន ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥នេះ នឹងប្រព្រឹត្តិទៅនៅថ្ងៃអាទិត្យទី៥ ខែមិថុនា ឆ្នាំ២០២២ខាងមុខនេះ ៕