កម្មករ-កម្មការិនីក្រុមហ៊ុនខេនស្ព័តស៊ូ (Can Sports Shoe Co.,Ltd.) ប្រមាណ៨ ០០០នាក់នៅខេត្តកំពង់ឆ្នាំង បានចូលធ្វើការវិញហើយ ក្រោយក្រុមហ៊ុនព្រមដោះស្រាយលក្ខខណ្ឌការងារ និងបន្ទាប់ពីកម្មករបានតវ៉ាបិទកំណាត់ផ្លូវជាតិលេខ៥ ខណៈកម្មករអះអាងថា ដំណោះស្រាយនេះកើតឡើងដោយសារការជ្រោមជ្រែងពីសហជីព។
ការសម្រេចចូលធ្វើការវិញនេះ គឺបន្ទាប់ពីពួកគេបានតវ៉ាបិទកំណាត់ផ្លូវជាតិលេខ៥ កាលពីព្រឹកថ្ងៃទី៣១ ខែឧសភា ដើម្បីទាមទារឱ្យថៅកែដោះស្រាយបញ្ហាចំនួន៣៥ចំណុច និងលើកកម្ពស់លក្ខខណ្ឌការងារឱ្យបានល្អប្រសើរនៅក្នុងក្រុមហ៊ុន។
កម្មការិនីធ្វើការនៅរោងចក្រ ខេនស្ព័តស៊ូ អ្នកស្រី វ៉ា សុខុម ប្រាប់វីអូឌីថា គាត់និងកម្មករផ្សេងទៀតបានចូលធ្វើការវិញកាលពីថ្ងៃទី២ ខែឧសភា ម្សិលមិញ បន្ទាប់ពីក្រុមហ៊ុនបានព្រមព្រៀងជាមួយសំណើរបស់កម្មករ។
យ៉ាងណា អ្នកស្រីថា កម្មករបានទទួលដំណោះស្រាយបន្ទាប់ពីមានកិច្ចអន្តរាគមន៍ពីសំណាក់សហជីព។
អ្នកស្រីថា៖ «ដោះស្រាយរួចអស់ហើយ! បានចូលធ្វើការ២ថ្ងៃទាំងថ្ងៃហ្នឹងហើយ។ ចូលធ្វើទាំងអស់គ្នាតើ! គេព្រមទាំងអស់ហើយ! អត់មានអីទៀតទេ! សហជីពគេតវ៉ាអស់ហើយ»។
បែបនេះក្ដី កម្មការិនីនៅរោងចក្រ ខេនស្ព័តស៊ូ រូបនេះ បញ្ជាក់ថា បើក្រុមហ៊ុនអនុវត្តតាមកិច្ចព្រមព្រៀង នោះកម្មករនឹងទទួលបានអត្ថប្រយោជន៍ពីការងារ ខណៈកន្លងទៅ ថៅកែតែងកេងកម្លាំងកម្មករ ដោយជំពាក់ប្រាក់កាសកម្មករ និងសងវិញមិនគ្រប់ ជាដើម។
អនុប្រធានមន្ទីរការងារ និងបណ្ដុះបណ្ដាលវិជ្ជាជីវៈ ខេត្តកំពង់ឆ្នាំង លោក ស៊ឹម សុវឌ្ឍនៈ បដិសេធតបនឹងសំណួរវីអូឌី ដោយប្រាប់ឱ្យអ្នកសារព័ត៌មានទាក់ទងទៅប្រធានមន្ទីរការងារខេត្តកំពង់ឆ្នាំងវិញ។
យ៉ាងណា ប្រធានមន្ទីរការងារខេត្តកំពង់ឆ្នាំង លោក សោម ស៊ីណាត សុំមិនបកស្រាយ ដោយប្រាប់ថា លោកជាប់រវល់។
តាមសេចក្ដីជូនដំណឹងរបស់កម្មករ-កម្មការិនីនិយោជិតនៃក្រុមហ៊ុន ខេនស្ពតស៊ូ កាលថ្ងៃទី២១ ខែឧសភា ឆ្នាំ២០២២ បានឱ្យដឹងថា ពួកគាត់ទាមទារនិងចូលរួមយ៉ាងមុតមាំក្នុងការធ្វើកូដកម្ម ដើម្បីទាមទារលក្ខខណ្ឌការងារនៅក្នុងក្រុមហ៊ុននេះ ក្នុងគោលដៅបង្កើតទំនាក់ទំនងវិជ្ជាជីវៈ និងដើម្បីលើកកម្ពស់លក្ខខណ្ឌការងារឱ្យបានល្អប្រសើរនៅក្នុងក្រុមហ៊ុន។
សេចក្តីជូនដំណឹងដដែលបន្តថា ពួកគេមានការខកចិត្តខ្លាំងនិងមិនអាចទទួលយកបានទេ ចំពោះការបដិសេធរបស់ក្រុមហ៊ុនដែលបានជំទាស់សេចក្ដីបង្គាប់របស់ក្រុមប្រឹក្សាអាជ្ញាកណ្ដាលគ្រប់សំណុំរឿងទាំងអស់។ ពួកគេចាត់ទុកការមិនអនុវត្តរបស់ថៅកែក្រុមហ៊ុនបង្ហាញឱ្យឃើញថា គ្មានឆន្ទៈដោះស្រាយ និងមិនគោរពច្បាប់កម្ពុជា ដែលករណីនេះ ក៏ជាទង្វើមួយមិនគោរពសិទ្ធិមនុស្សផងដែរ។
សេចក្តីជូនដំណឹងរបស់ក្រុមកម្មករទាំងនោះក៏បានលើកឡើងនូវបញ្ហាផ្សេងទៀតដែលពួកគេទាមទារឱ្យមានដំណោះស្រាយផងដែរ ក្នុងនោះ ទាមទារឱ្យក្រុមហ៊ុនបើកប្រាក់ជូនកម្មករ-កម្មការិនីណាដែលប្រើប្រាស់ដំណាច់ឆ្នាំនៅសល់គិតត្រឹមចុងខែធ្នូ និងកុំបញ្ឈប់កម្មករដែលមិនអាចធ្វើការថែមម៉ោងបាន និងត្រូវបើកប្រាក់ឈ្នួលដល់កម្មករដែលខាងក្រុមហ៊ុនបានជំពាក់២ខែនោះផងដែរ។
ក្រៅពីនោះ ក្រុមកម្មករបានទាមទារឱ្យក្រុមហ៊ុនដកប្រធានផ្នែកនៅអគារ SIPCA4 ចេញពីក្រុមហ៊ុន ដោយសារតែប្រធានផ្នែករូបនេះបានបង្ខំឱ្យកម្មករធ្វើការថែមម៉ោង ទោះបីជាកម្មករឈឺឬរវល់យ៉ាងណាក៏ដោយ។
ក្នុងអំឡុងពេលកម្មករធ្វើកូដកម្មនេះ សហជីពប្រចាំរោងចក្រនេះចំនួន៣នាក់ក៏ត្រូវបានសមត្ថកិច្ចឃាត់ខ្លួនយកទៅសួរនាំរយៈពេលជាច្រើនម៉ោង ពាក់ព័ន្ធនឹងការធ្វើកូដកម្មរបស់កម្មករនេះ។
យ៉ាងណា ស្នងការរងនៃស្នងការដ្ឋាននគរបាលខេត្តកំពង់ឆ្នាំង លោក អៀ ប៊ុនធឿន អះអាងថា សហជីពទាំង៣នាក់នោះត្រូវបានសមត្ថកិច្ចដោះលែងវិញហើយ បន្ទាប់ពីបានសួរនាំនិងឱ្យបំពេញបែបបទមួយចំនួនរួចនោះ។ លោកព្រមានថា បើសិនជាកម្មករធ្វើកូដកម្មដោយមិនបានសុំច្បាប់អនុញ្ញាត និងបិទផ្លូវទៀតនោះ សមត្ថកិច្ចនឹងចាត់វិធានការច្បាប់ ដោយសារការបិទផ្លូវនេះធ្វើឱ្យប៉ះពាល់ដល់សណ្ដាប់ធ្នាប់សាធារណៈ៕
