ក្រសួងការងារ និងបណ្ដុះបណ្ដាលវិជ្ជាជីវៈ ឱ្យដឹងថា អតីតបុគ្គលិកណាហ្គាវើលដ៍ចំនួន៤នាក់បន្ថែមទៀតបានយល់ព្រមទទួលប្រាក់ដំណាច់បញ្ចប់កិច្ចសន្យាការងារពីក្រុមហ៊ុនរួចមកហើយ។
តាមសេចក្ដីប្រកាសព័ត៌មានរបស់ក្រសួងការងារ នៅថ្ងៃទី២ ខែមិថុនា ឆ្នាំ២០២២នេះ បានលើកឡើងថា កន្លងមក មន្ត្រីជំនាញរបស់ក្រសួងបានធ្វើការពិនិត្យផ្ទៀងផ្ទាត់ការទូទាត់ប្រាក់ដំណាច់បញ្ចប់កិច្ចសន្យាការងារជាមួយតំណាងក្រុមហ៊ុន ហើយពិនិត្យឃើញថា ការទូទាត់ទាំង៤ចំណុចនោះបានធ្វើឡើងត្រឹមត្រូវស្របតាមច្បាប់ និងលិខិតបទដ្ឋានគតិយុត្តិ ពាក់ព័ន្ធនឹងការបញ្ឈប់ពីការងាររួម។
ក្រសួងបន្តថា គិតត្រឹមថ្ងៃទី២ ខែមិថុនានេះ អតីតបុគ្គលិកក្រុមហ៊ុនណាហ្គាវើលដ៍ចំនួន៤នាក់បន្ថែមទៀតបានព្រមទទួលយកសំណងប្រាក់ដំណាច់បញ្ចប់កិច្ចសន្យាការងារពីក្រុមហ៊ុនរួចហើយ។
ក្រសួងការងារបញ្ជាក់ក្នុងសេចក្តីប្រកាសព័ត៌មានថា៖ «ដូច្នេះ គិតមកដល់ថ្ងៃនេះ [ថ្ងៃព្រហស្បតិ៍ម្សិលមិញ] មានអតីតបុគ្គលិកសរុបចំនួន១៩៦រូប ក្នុងចំណោម៣៧៣រូប បានយល់ព្រមទទួលយកការទូទាត់នូវប្រាក់ដំណាច់បញ្ចប់កិច្ចសន្យាការងារពីក្រុមហ៊ុន ដែលធ្វើឱ្យចំនួនអតីតបុគ្គលិកដែលមិនព្រមទទួលយកសំណងនៅសល់ត្រឹម១៧៧រូប»។
វិវាទការងារក្រុមហ៊ុនណាហ្គាវើលដ៍នេះបានកើតឡើងអស់រយៈពេលជាង១ឆ្នាំមកហើយ ក្រោយពេលដែលក្រុមហ៊ុននេះបានបញ្ឈប់បុគ្គលិកចំនួន១ ៣២៩នាក់ ក្នុងចំណោមបុគ្គលិកសរុបជាង៨ ០០០នាក់ពីការងារ ក្រោមហេតុផលថា ជួបវិបត្តិហិរញ្ញវត្ថុដោយសារតែបញ្ហាជំងឺកូវីដ-១៩៕