ប្រធានការិយាល័យសុខាភិបាលស្រុកអង្គរជុំ បានស្នើទៅអភិបាលស្រុកពួក ដើម្បីចុះប្រមូលឱសថនិងថ្នាំផ្សំដែលលក់ខុសច្បាប់នៅតាមតូបចាប់ហួយនិងក្នុងផ្សារ ដើម្បីយកមកកម្ទេចចោល។
ការស្នើនេះធ្វើឡើងតាមលិខិតរបស់លោកវេជ្ជបណ្ឌិត ម៉ក់ សំអឿន ប្រធានការិយាល័យស្រុកអង្គរជុំ ខេត្តសៀមរាប កាលពីថ្ងៃចន្ទ ដោយរកឃើញថា មានការលក់ដូរឱសថនិងថ្នាំផ្សំយ៉ាងអនាធិបតេយ្យដែលហួសកាលបរិច្ឆេទ ខូចគុណភាព និងប្រើប្រាស់មិនបានត្រឹមត្រូវតាមវេជ្ជបញ្ជា ធ្វើឱ្យប៉ះពាល់យ៉ាងធ្ងន់ធ្ងរដល់សុខភាពប្រជាពលរដ្ឋ។
លោកបន្តថា ការិយាល័យប្រតិបត្តិសុខាភិបាលស្រុកអង្គរជុំ គ្របដណ្ដប់ទៅលើស្រុកចំនួន៣ រួមមាន ស្រុកពួក ស្រុកអង្គរជុំ និងស្រុកវ៉ារិន ហើយការចេញលិខិតស្នើនេះ នឹងបានបញ្ជូនទៅស្រុកទាំងបីនេះផងដែរ ក្រោយរកឃើញថា ស្រុកទាំង៣នោះនៅតែមានករណីបន្តលក់ថ្នាំខុសច្បាប់និងខូចគុណភាព។
លោកវេជ្ជបណ្ឌិត ម៉ក់ សំអឿន បញ្ជាក់ថា៖ «រឿងភស្តុតាង ដូចដែលខ្ញុំជម្រាបអ៊ីចឹង ការលក់ថ្នាំនេះ គឺមិនមែនមានតែនៅស្រុកអង្គរជុំនោះទេ គឺលក់សឹងតែគ្រប់កន្លែងហ្នឹងឯង។ ហើយយើងចុះឃើញទៅ យើងធ្លាប់ប្រមូលតាំងពីជាង១០ឆ្នាំមុន។ ខ្ញុំប្រមូលម្ដងហើយ ហើយខ្ញុំប្រមូលបានច្រើនណាស់ ជាង២ ០០០តូបឯណោះ តាំងពីជាង១០ឆ្នាំមុន។ តែឥលូវយើងសង្កេតឃើញថា គាត់លក់ឡើងវិញ អ៊ីចឹងយើងក៏ធ្វើការងារហ្នឹងម្ដងទៀត។»
មន្ត្រីជំនាញដដែលអះអាងថា មកទល់ពេលនេះ គឺលោកពុំទាន់ទទួលបានការឯកភាពជាលក្ខណៈពេញលេញពីស្រុកទាំង៣នេះទេ ហើយចំពោះវិធានការ គឺនឹងធ្វើទៅតាមដំណាក់កាល។
លោកបន្តថា៖ «មកទល់ពេលនេះ គឺខាងស្រុកពួក និយាយទៅគឺស្រុកទាំងបីហ្នឹង គឺយើងអត់ទាន់បានលិខិតត្រលប់មកវិញ ឯកភាព ឱ្យបានធ្វើទេ គ្រាន់តែថា អង្គរជុំ និងបារិន គាត់បានឆ្លើយថាគាត់ឯកភាពហើយ គ្រាន់តែថាសិទ្ធិផ្លូវការមិនទាន់មានអ៊ីចឹងហ្អា! ហើយមកដល់ពេលនេះ ខាងស្រុកពួក គាត់មិនទាន់បានទាក់ទងមកខាងខ្ញុំទេ គាត់ចាំអ្នកជំនាញមកនិយាយពីនីតិវិធីមួយចំនួនទៀត។»
ទោះជាយ៉ាងនេះក្ដី លោកវេជ្ជបណ្ឌិត ម៉ក់ សំអឿន បញ្ជាក់ថា វិធានការដំបូង មន្ត្រីជំនាញនឹងអប់រំជាមុនសិន ហើយនឹងប្រមូលថ្នាំខូចគុណភាពនិងខុសច្បាប់ទាំងនោះ ប៉ុន្តែប្រសិនបើរកឃើញថា អាជីវករទាំងនោះប្រព្រឹត្តល្មើសទៀត នឹងចាត់វិធានការច្បាប់តែម្តង។
តាមប្រភពដដែលបានឱ្យដឹងថា ការចរាចរថ្នាំខុសច្បាប់និងខូចគុណភាពទាំងនោះ ភាគច្រើនចេញពីកន្លែងឱសថស្ថានស្របច្បាប់ទៅលក់បន្តឱ្យអាជីវករទាំងនោះ ការទិញលួចលាក់ពីអ្នកលក់ខុសច្បាប់ដូចគ្នានៅក្នុងផ្សារ និងមួយទៀតគឺខាងក្រុមហ៊ុនឱសថផងដែរ៕