មន្រ្តីជាន់ខ្ពស់រដ្ឋាភិបាលអះអាងថា កម្ពុជានៅមិនទាន់ទទួលបានព័ត៌មានជាក់លាក់អំពីប្រេងឆៅដែលបាត់ជិត៣០ម៉ឺនបារ៉ែលនេះនៅឡើយទេ ខណៈមន្រ្តីដែលទទួលបន្ទុកកិច្ចការនេះបានបដិសេធក្នុងការផ្តល់ព័ត៌មាននៅពេលសួរនាំអំពីសំណុំរឿងប្រេងឆៅនេះ។
ប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន បដិសេធ នៅថ្ងៃព្រហស្បតិ៍នេះថា ករណីបាត់ប្រេងឆៅនេះ ក្នុងនាមមន្រ្តីរដ្ឋាភិបាល លោកពិតជាមិនទាន់បានទទួលដំណឹងណាមួយជាផ្លូវការ អំពីវឌ្ឍនភាពនៃការនាំប្រេងឆៅនេះត្រលប់មកកម្ពុជាវិញនៅឡើយទេ។
បើតាមលោក ផៃ ស៊ីផាន តាមពិតទៅ កិច្ចការនេះមានតែក្រសួងរ៉ែនិងថាមពលទេ ជាអ្នកទទួលខុសត្រូវ និងជាអ្នកធ្វើកិច្ចការនេះដោយផ្ទាល់។ ចំណែកមន្រ្តីនាំពាក្យរដ្ឋាភិបាលអាចដឹងពីការវិវត្តអំពីប្រេងឆៅនេះបាន លុះត្រានាយករដ្ឋមន្រ្តីទម្លាក់ព័ត៌មាននេះមក ទើបអង្គភាពអ្នកនាំពាក្យរដ្ឋាភិបាល មានទិន្នន័យផ្សព្វផ្សាយបន្តបាន។
លោកបន្តថា៖ «ទៅសួរខាងប្រេងវិញ ទាល់ខាងហ្នឹងគេទទួលព័ត៌មានហើយ ធ្វើរបាយការណ៍ជូនទៅនាយករដ្ឋមន្រ្តី បាននាយករដ្ឋមន្រ្តីទម្លាក់មក។ អ្នកនាំពាក្យរបស់រាជរដ្ឋាភិបាល និងអ្នកកំពូលរបស់រាជរដ្ឋាភិបាលគឺនាយករដ្ឋមន្រ្តី។ បើនាយករដ្ឋមន្រ្តីមិនទាន់បានទទួលព័ត៌មានទេ ខ្ញុំក៏អត់ដែរ»។
អគ្គនាយក នៃអគ្គនាយកដ្ឋានប្រេងកាតកម្ពុជា នៃក្រសួងរ៉ែ និងថាមពល លោក ជៀប សួរ បដិសេធក្នុងការផ្តល់ព័ត៌មានលម្អិតនៅថ្ងៃព្រហស្បតិ៍នេះ អំពីមូលហេតុដែលនាំឱ្យមានភាពយឺតយ៉ាវនៃការបញ្ជូនប្រេងឆៅនេះត្រលប់មកកម្ពុជាវិញ ដោយអះអាងយ៉ាងខ្លីថា កំពុងជាប់រវល់។
លោកបន្តថា៖ «ហេឡូ! ពីណាគេហ្នឹង? ខ្ញុំកំពុងប្រជុំ កំពុងតែប្រជុំសិន»។
បើទោះជាបែបណា កាលពីដើមខែកញ្ញា ឆ្នាំមុន រដ្ឋាភិបាល តាមរយៈក្រសួងរ៉ែ និងថាមពល បានប្តេជ្ញាចិត្តរួចហើយថា ប្រេងឆៅដែលត្រូវបានក្រុមហ៊ុន Kris Energy លួចដឹកចេញពីកម្ពុជាទៅនេះ នឹងនាំមកវិញឱ្យបាន។
កាលពីពាក់កណ្ដាលខែសីហា ឆ្នាំ២០២១ លោក ជៀប សួរ ក៏បានប្រាប់បណ្ដាញព័ត៌មានក្នុងស្រុកដែរថា តាមរយៈក្រសួងការបរទេស រដ្ឋាភិបាលបានដាក់បណ្ដឹងរួចហើយទៅរដ្ឋាភិបាលឥណ្ឌូនេស៊ី ដើម្បីទាមទារសិទ្ធិក្នុងនាមជាម្ចាស់ផ្ទះ ដើម្បីនាំប្រេងឆៅមកគ្រប់គ្រងវិញ។
ការឆ្លើយតបភ្លាមៗរបស់រដ្ឋាភិបាលអំពីរឿងនេះនាពេលកន្លងទៅ គឺកើតឡើងក្រោយពេលដែលរដ្ឋាភិបាលឥណ្ឌូនេស៊ីបានប្រកាសកាលពីថ្ងៃទី២៥ ខែសីហា កន្លងទៅ ថាខ្លួនរឹបអូសបាននាវាដឹកប្រេងមួយគ្រឿង ហើយនាវាដែលត្រូវបានកងទ័ពជើងទឹកឥណ្ឌូនេស៊ីចាប់បាននោះមានផ្ទុកប្រេងឆៅជិត៣០ម៉ឺនបារ៉ែល និងមាននាវិកនៅលើកប៉ាល់នោះផង។
នាយកប្រតិបត្តិ នៃអង្គការអភិវឌ្ឍន៍ផ្នត់គំនិត លោក សេក សុជាតិ ក៏ឯកភាពដែរ ដែលថាក្រសួងឬស្ថាប័នរបស់រដ្ឋមានចំណែកនៃការទទួលខុសត្រូវទៅតាមការងាររបស់ខ្លួន។ បើទោះជាបែបណា សម្រាប់លោក សេក សុជាតិ នៅតែយល់ឃើញថា ប្រសិនបើមន្រ្តីនាំពាក្យរបស់រដ្ឋាភិបាលឆ្លើយមិនបានដឹងរឿង ហើយទុកកិច្ចការនេះឱ្យថ្នាក់ដឹកនាំកំពូលត្រូវរាយការណ៍មកក្រោមវិញ វាគឺជារឿងដែលគួរឱ្យអស់សំណើចសម្រាប់ស្ថាប័នរបស់រដ្ឋ។
លោកបន្តថា៖ «ខ្ញុំយល់ឃើញថា ព័ត៌មាននេះគឺជាព័ត៌មានមួយដែលគួរឱ្យពិចារណាដែរ ដែលមន្រ្តីនៅថ្នាក់ក្រោមដែលជាសេនាធិការរបស់នាយករដ្ឋមន្រ្តី គឺជាអ្នកដែលត្រូវស្វែងរកនិងតាមដានព័ត៌មាននេះឱ្យបានជាប់លាប់ ហើយរាយការណ៍ទៅនាយករដ្ឋមន្រ្តី ឬក៏នាយករដ្ឋមន្រ្តីត្រូវតាមដានហើយធ្វើកិច្ចការនេះ ហើយរាយការណ៍ឱ្យមន្រ្តីថ្នាក់ក្រោមវិញ។ នេះជាអ្វីដែលខ្ញុំមើលឃើញ! វាហាក់បីដូចជាដើរបញ្ច្រាស ថានាយករដ្ឋមន្រ្តីគឺជាអ្នកធ្វើការឱ្យមន្រ្តីថ្នាក់ក្រោម ហើយមន្រ្តីថ្នាក់ក្រោមគឺជាមេដឹកនាំរង់ចាំលទ្ធផលពីនាយករដ្ឋមន្រ្តីដែលជាអ្នកធ្វើការឱ្យខ្លួនវិញ»។
ការបាត់ប្រេងឆៅប្រមាណ៣០ម៉ឺនបារ៉ែល ដែលស្មើជាង៤០លានលីត្រនេះ ហើយបើគិតជាទឹកប្រាក់មានតម្លៃប្រមាណ២០លានដុល្លារអាមេរិក។ ចំណែកក្រុមអង្គការមិនមែនរដ្ឋាភិបាលដែលធ្វើការលើវិស័យប្រេងកាត ធ្លាប់លើកឡើងថា រឿងនេះនឹងនាំឱ្យមានការសង្ស័យទៅលើការគ្រប់គ្រងរបស់អាជ្ញាធរកម្ពុជា ឬមានជាប់ពាក់ព័ន្ធក្នុងហេតុផលណាមួយដែលនាំឱ្យនាវានេះអាចដឹកប្រេងឆៅទៅបានដោយស្រួលបែបនេះ។
ប្រេងឆៅដែលបាត់ដំណឹងពីដែនសមុទ្រកម្ពុជា តាំងពីខែមិថុនា ឆ្នាំ២០២១ មកដល់ពេលនេះ កម្ពុជានៅពុំទាន់មានព័ត៌មានផ្លូវការណាមួយថាតើប្រេងឆៅជិត៣០ម៉ឺនបារ៉ែលនេះនឹងត្រូវបញ្ជូនមកដល់កម្ពុជាវិញនៅពេលណាឱ្យប្រាកដនៅឡើយទេ៕