ក្រសួងការងារ និងបណ្ដុះបណ្ដាលវិជ្ជាជីវៈ ឱ្យដឹងថា ការសម្របសម្រួលរកដំណោះស្រាយជុំវិញវិវាទការងាររបស់កូដករណាហ្គាវើលដ៍ និងភាគីក្រុមហ៊ុន នៅមិនទាន់មានការព្រមព្រៀងរួមគ្នាលើចំណុចដែលក្រុមកូដករបានស្នើឱ្យដោះស្រាយនៅឡើយ។
សេចក្តីប្រកាសព័ត៌មានរបស់ក្រសួងការងារ ចុះថ្ងៃទី០៨ ខែមិថុនា ឆ្នាំ២០២២ បានលើកឡើងថា ក្រសួងបានបន្តអញ្ជើញគូភាគីវិវាទដែលជាតំណាងកូដករ និងតំណាងក្រុមហ៊ុនណាហ្គាវើសដ៍ ទៅប្រជុំដោះស្រាយជាលើកទី១៣ កាលពីថ្ងៃម្សិលមិញ ប៉ុន្តែនៅមិនទាន់ទទួលលទ្ធផលជាផ្លែផ្កានោះទេ ដោយសារតំណាងក្រុមហ៊ុននៅមិនទាន់ឯកភាពគ្នាលើចំណុចមួយចំនួនដែលស្នើឡើងដោយតំណាងសហជីពនិងកូដករ។
បើតាមក្រសួងការងារ ក្នុងកិច្ចប្រជុំចរចារកដំណោះស្រាយនោះ ភាគីសហជីព និងតំណាងកូដករណាហ្គាវើលដ៍ បានស្នើឡើង៥ចំណុច ក្នុងនោះស្នើឱ្យកម្មករនិយោជិត២០០នាក់ដែលក្រុមហ៊ុនបញ្ឈប់ពីការងារបានចូលធ្វើការវិញ ដោយដោះដូរជាមួយកម្មករនិយោជិតដែលកំពុងបម្រើការងារហើយស្ម័គ្រចិត្តលាឈប់, ទម្លាក់រាល់បទចោទទាំងអស់ដល់ថ្នាក់ដឹកនាំនិងសមាជិកដែលត្រូវបានចោទប្រកាន់, ស្នើក្រុមហ៊ុនបញ្ឈប់ការរើសអើងអ្នកធ្វើកូដកម្ម និងស្នើក្រសួងការងារបើកការិយាល័យសហជីពនៅសង្កាត់ទន្លេបាសាក់ ខណ្ឌចំការមន រាជធានីភ្នំពេញ ឡើងវិញ ដើម្បីធ្វើទំនាក់ទំនងការងារវិញ ជាដើម។
ក្រសួងបានស្រង់មតិរបស់សហជីពនិងតំណាងកូដករថា៖ «ដោយសារមូលហេតុកូវីដ-១៩បានធូរស្រាល ហើយអ្នកដែលមានបំណងបន្តការងារមានតែ១៧៥នាក់ទេ តាមការលើកឡើងរបស់ក្រុមហ៊ុន ហើយចំនួននេះលែងជាបន្ទុកធ្ងន់ធ្ងរសម្រាប់ក្រុមហ៊ុនទៀតហើយ ដូច្នេះ តំណាងកម្មករនៅតែទទូចឱ្យទទួលយកអ្នកនៅសេសសល់ដែលជាតំណាងសហជីពនិងសមាជិកចូលធ្វើការវិញ ព្រោះនេះគឺជាដំណោះស្រាយពិតប្រាកដ។ ចំណែកកម្មករនិយោជិតនៅតែបន្តធ្វើកូដកម្ម សុំទុកសិទ្ធឱ្យពួកគាត់សម្រេចធ្វើកូដកម្មឬចូលធ្វើការវិញ»។
សេចក្ដីជូនដំណឹងរបស់ក្រសួងការងារ បន្តថា ជុំវិញការស្នើរបស់សហជីពនិងតំណាងកូដករនេះ តំណាងក្រុមហ៊ុនណាហ្គាវើលដ៍នៅបន្តបដិសេធ និងទទូចឱ្យកម្មករនិយោជិតដែលនៅសល់ប្រមាណ១៧៥នាក់ទៅទទួលយកកញ្ចប់បញ្ចប់កិច្ចសន្យាការងារ ដោយថា ការធ្វើបែបនេះ ពួកគេនឹងទទួលបានថវិកាបន្ថែម។
ក្រសួងបានបញ្ជាក់ទៀតថា ក្រោយពីការចរចានៅពុំទាន់មានការឯកភាពគ្នា ក្រសួងបានកំណត់កាលបរិច្ឆេទប្រជុំបន្ទាប់នៅរសៀលថ្ងៃទី២២ ខែមិថុនា ឆ្នាំ២០២២បន្តទៀត ដើម្បីឱ្យភាគីទាំងពីរមានឱកាសពិចារណាអំពីលទ្ធភាពនៃការសម្បទានគ្នាទៅវិញទៅមក ដើម្បីឈានទៅបញ្ចប់វិវាទនេះ។
ក្រសួងការងារក៏ស្នើឱ្យភាគីទាំងពីរមានការយោគយល់គ្នាខ្ពស់ ក្នុងការចូលរួមដោះស្រាយបញ្ចប់វិវាទការងារនេះដោយសន្តិវិធី និងថែរក្សាសន្តិសុខ សណ្តាប់ធ្នាប់សាធារណៈ។
យោងតាមនីតិវិធី ក្រសួងថា ប្រសិនបើវិវាទការងារនេះមិនអាចស្វែងរកដំណោះស្រាយបានដោយការផ្សះផ្សា នីតិវិធីបន្ទាប់ គឺអាចបញ្ជូនទៅតុលាការ ដើម្បីរកដំណោះស្រាយចុងក្រោយ។
វិវាទការងារក្រុមហ៊ុនណាហ្គាវើលដ៍នេះបានកើតឡើងអស់រយៈពេលជាង១ឆ្នាំមកហើយ ក្រោយពេលដែលក្រុមហ៊ុននេះបានបញ្ឈប់បុគ្គលិកចំនួន១ ៣២៩នាក់ ក្នុងចំណោមបុគ្គលិកសរុបជាង៨ ០០០នាក់ពីការងារ ក្រោមហេតុផលថា ជួបវិបត្តិហិរញ្ញវត្ថុដោយសារតែបញ្ហាជំងឺកូវីដ-១៩៕