ក្រសួងការងារ និងបណ្ដុះបណ្ដាលវិជ្ជាជីវៈ ប្រកាសពីការបញ្ចប់ការផ្ដល់ប្រាក់ឧបត្ថម្ភសម្រាប់កម្មករនិយោជិតដែលព្យួរការងារក្នុងវិស័យទេសចរណ៍ លើកលែងតែសណ្ឋាគារនៅក្នុងខេត្តសៀមរាប ខណៈការឆ្លងរាលដាលជំងឺកូវីដ-១៩ ត្រូវបានគ្រប់គ្រងដោយប្រសិទ្ធភាព។
សេចក្តីជូនដំណឹងរបស់ក្រសួងការងារ ចុះថ្ងៃទី១៤ ខែមិថុនា ឆ្នាំ២០២២ បានលើកឡើងថា ដោយការគ្រប់គ្រងស្ថានភាពនៃការរីករាលដាលជំងឺកូវីដ-១៩ នៅតាមរោងចក្រ និងសហគ្រាស ប្រកបដោយប្រសិទ្ធភាពខ្ពស់ ធ្វើឱ្យអាជីវកម្មក្នុងវិស័យទេសចរណ៍ ដូចជា សណ្ឋាគារ ផ្ទះសំណាក់ ភោជនីយដ្ឋាន និងភ្នាក់ងារទេសចរណ៍ក្នុងបណ្តារាជធានីខេត្ត បានបើកដំណើរការជាបណ្តើរៗឡើងវិញ។
ករណីនេះ ក្រសួងថា រដ្ឋាភិបាលបានសម្រេចបញ្ចប់ការអនុវត្តវិធានការក្នុងការផ្តល់ប្រាក់ឧបត្ថម្ភចំនួន៤០ដុល្លារក្នុង១ខែ សម្រាប់កម្មករនិយោជិតដែលព្យួរកិច្ចសន្យាការងារក្នុងវិស័យទេសចរណ៍ គិតចាប់ពីថ្ងៃទី១៤ ខែមិថុនា ឆ្នាំ២០២២តទៅ លើកលែងតែកម្មករនិយោជិតដែលបម្រើការផ្នែកសណ្ឋាគារ ក្នុងខេត្តសៀមរាបប៉ុណ្ណោះ។
ក្រសួងការងារ ក៏បានបញ្ជាក់ដែរថា ចាប់ពីថ្ងៃជូនដំណឹងនេះតទៅ ម្ចាស់ឬនាយកសហគ្រាសត្រូវអនុវត្តការព្យួរកិច្ចសន្យាការងារតាមការព្រមព្រៀងគ្នា រវាងនិយោជកនិងកម្មករនិយោជិត ស្របតាមខ្លឹមសារមាត្រា៧១ និង៧២ នៃច្បាប់ស្តីពីការងារ។
រដ្ឋាភិបាលបានប្រកាសពីការផ្តល់ប្រាក់ឧបត្ថម្ភដល់កម្មករនិយោជិត កាលពីអំឡុងឆ្នាំ២០២០ ក្រោយពីកម្ពុជាជួបវិបត្តិនៃការឆ្លងរាលដាលជំងឺកូវីដ-១៩៕
