ក្រុមហ៊ុនបញ្ជាទិញ Adidas បានស្នើដល់ក្រសួងការងារកម្ពុជា ស៊ើបអង្កេតករណីសមត្ថកិច្ចឃាត់ខ្លួនតំណាងសហជីពប្រចាំរោងចក្រ ខេនស្ព័តស៊ូ (Can Sports Shoes Cambodia) នៅខេត្តកំពង់ឆ្នាំង កាលពីខែមុន។
កាលពីថ្ងៃទី៣១ ខែឧសភា ឆ្នាំ២០២២ តំណាងសហជីព៥នាក់ប្រចាំរោងចក្រ ខេនស្ព័តស៊ូ ស្ថិតនៅភូមិចម្ការស្វាយ ឃុំសេដ្ឋី ស្រុកសាមគ្គីមានជ័យ ខេត្តកំពង់ឆ្នាំង ត្រូវសមត្ថកិច្ចឃាត់ខ្លួនរយៈពេលខ្លីជាបន្តបន្ទាប់ ខណៈកម្មកររាប់ពាន់ផ្ទុះការតវ៉ាទាមទារលក្ខខណ្ឌការងារ។
ក្នុងលិខិតចុះថ្ងៃទី១៤ ខែមិថុនា ឆ្នាំ២០២២ តំណាងក្រុមហ៊ុន Adidas លោក វីល្លៀម អាឌឺសាន់ អនុប្រធានថ្នាក់សកលកិច្ចការសង្គម និងបរិស្ថាន បានផ្ញើលិខិតមួយទៅរដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ លោក អ៊ិត សំហេង ឱ្យធ្វើការស៊ើបអង្កេតលើសកម្មភាពរបស់ប៉ូលិសដែលឃាត់ខ្លួនរយៈពេលខ្លី លើតំណាងសហជីពប្រចាំរោងចក្រ ខេនស្ព័តស៊ូ នេះ។
លោក វីល្លៀម អាឌឺសាន់ ក៏បានស្នើដល់ក្រសួងការងារ ជូនដំណឹងដោយតម្លាភាពនៃលទ្ធផលស៊ើបអង្កេតដល់ភាគីពាក់ព័ន្ធដែលប៉ះពាល់ និងការពារកុំឱ្យហេតុការណ៍នោះកើតឡើងម្តងទៀតនាពេលអនាគត ដោយថា សកម្មភាពនោះបានរំលោភលើសិទ្ធិសេរីភាពសមាគមនិងសិទ្ធិសហជីព។
ក្នុងលិខិតដដែលនោះបានលើកឡើងថា រោងចក្រ ខេនស្ព័តស៊ូ មានសហជីពមូលដ្ឋានចំនួន១០ ហើយសហជីពចំនួន៤ បានជូនដំណឹងទៅថៅកែ និងអាជ្ញាធរមូលដ្ឋាន មុនពួកគេធ្វើកូដកម្ម ហើយសហជីពនេះក៏កំពុងតែស្ថិតក្នុងការចរចាជាមួយអ្នកគ្រប់គ្រងរោងចក្រផងដែរ។
បើតាមលិខិតនេះ ដើមចមនៃវិវាទការងារនេះកើតចេញពីការទាមទារឱ្យមានអ្នកលក់ដូរអាហារក្នុងបរិវេណរោងចក្រប្រហែល២០០នាក់ និងទាមទារឱ្យពន្លឿនការកាត់ប្រាក់វិភាគទានប្រចាំខែជូនសហជីពពីប្រាក់ខែកម្មករដែលផ្លាស់ប្ដូរពីសហជីពចាស់ទៅសហជីពថ្មី។
លិខិតដដែលបានលើកឡើងទៀតថា ថ្នាក់ដឹកនាំសហជីព២នាក់ត្រូវបានចាប់និងឃុំខ្លួននៅស្នងការប៉ូលិសខេត្ត ក្នុងអំឡុងពេលកំពុងតែចរចាគ្នា ហើយនៅថ្ងៃបន្ទាប់ កម្មករបានចាប់ផ្ដើមប្រមូលផ្ដុំធ្វើកូដកម្មដោយសន្ដិវិធីនៅមុខខ្លោងទ្វាររោងចក្រ។ ទន្ទឹមនោះ ថ្នាក់ដឹកនាំសហជីព៣នាក់ទៀតត្រូវបានចាប់ខ្លួន ប៉ុន្ដែត្រូវបានដោះលែងវិញក្នុងរយៈពេល២៤ម៉ោងបន្ទាប់ និងតម្រូវឱ្យចុះហត្ថលេខាលើកិច្ចសន្យាមិនឱ្យបន្ដធ្វើកូដកម្ម។
លិខិតបញ្ជាក់ថា មូលហេតុនៃការចាប់ខ្លួននៅមិនទាន់មានភាពច្បាស់លាស់នៅឡើយ ប៉ុន្ដែសមត្ថកិច្ចបានភ្ជាប់ទៅនឹងបទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» ហើយថ្នាក់ដឹកនាំសហជីពត្រូវបានដោះលែងដោយគ្មានការចោទប្រកាន់ និងមិនមានភស្ដុតាងបន្ថែមអំពីការចោទប្រកាន់នេះ។
តំណាងក្រុមហ៊ុនបញ្ជាទិញ Adidas បានលើកឡើងទៀតថា ការចាប់ខ្លួនសមាជិកសហជីពដោយមិនមានការចោទប្រកាន់ គឺជាការរឹតត្បិតលើសេរីភាព ហើយរដ្ឋាភិបាលគួរចាត់វិធានការដោយដាក់ចេញនូវសេចក្ដីណែនាំដ៏សមស្របមួយ ដើម្បីការពារនូវហានិភ័យដែលកើតចេញពីការចាប់ខ្លួនសមាជិកសហជីពបែបនេះ។
តំណាងអ្នកបញ្ជាទិញ បន្តថា ដើម្បីជាប្រយោជន៍ដល់ការអនុវត្តតួនាទីនិងកាតព្វកិច្ចរបស់រដ្ឋាភិបាលឱ្យបានត្រឹមត្រូវតាមអនុសញ្ញា ILO ច្បាប់សហជីព និងច្បាប់ស្តីពីការងាររបស់កម្ពុជានោះ ក្រសួងការងារត្រូវធ្វើការស៊ើបអង្កេតលើសកម្មភាពអនុវត្តការងាររបស់ប៉ូលិស និងជូនដំណឹងដោយតម្លាភាពអំពីលទ្ធផលពីការស៊ើបអង្កេតនោះដល់ភាគីរងផលប៉ះពាល់ រួមទាំងការពារមិនឱ្យហេតុការណ៍នេះកើតឡើងម្ដងទៀតផងដែរ៕