មន្ត្រីជាន់ខ្ពស់រដ្ឋសភាអះអាងថា ស្ថាប័នមួយនេះនឹងអន្តរាគមន៍លើញត្តិរបស់កូដករណាហ្គាវើលដ៍តាមនីតិវិធីដែលធ្លាប់ធ្វើ ប៉ុន្តែពុំបានបញ្ជាក់ថានឹងចាត់ការដោយរបៀបណានោះទេ។
ការអះអាងនេះធ្វើឡើងបន្ទាប់ពីកូដករណាហ្គាវើលដ៍ជាង១០០នាក់ នៅព្រឹកថ្ងៃទី២០ ខែមិថុនានេះ បានប្រមូលផ្តុំគ្នាដាក់ញត្តិនៅខុទ្ទកាល័យនាយករដ្ឋមន្ត្រី និងរដ្ឋសភា ដើម្បីស្នើឱ្យជួយអន្តរាគមន៍រកដំណោះស្រាយវិវាទការងារជាមួយក្រុមហ៊ុន ណាហ្គាវើលដ៍ ដែលបានអូសបន្លាយជាង១ឆ្នាំមកហើយ។
អ្នកនាំពាក្យរដ្ឋសភា លោក ឡេង ប៉េងឡុង មានប្រសាសន៍ប្រាប់ VOD នៅរសៀលថ្ងៃចន្ទនេះថា រដ្ឋសភាបានទទួលញត្តិពីតំណាងកូដករហើយ ហើយស្ថាប័នមួយនេះនឹងប្រគល់ញត្តិនោះទៅគណៈកម្មការទី១ ផ្នែកសិទ្ធិមនុស្ស ទទួលពាក្យបណ្តឹង អង្កេត និងទំនាក់ទំនងរដ្ឋសភា ដែលភារកិច្ចក្នុងការចាត់ចែងលើកិច្ចការ ដើម្បីពិនិត្យនិងដោះស្រាយ។ តែយ៉ាងណា លោកមិនទាន់អាចដឹងថា ករណីនេះនឹងត្រូវការពេលយូរប៉ុនណា និងចាត់ការដោយរបៀបណានោះទេ។
លោកថា៖ «ទទួលញត្តិហើយ យើងនឹងរៀបចំតាមនីតិវិធី ដើម្បីធ្វើការងារតាមការសំណូមពរនៅក្នុងញត្តិហ្នឹង […] គេធ្វើទៅតាមនីតិវិធីរបស់គេ គេថាគេធ្វើអន្តរាគមន៍ទៅតាមទម្លាប់ គេធ្វើយ៉ាងម៉េច គេធ្វើអ៊ីចឹង។ [តើរដ្ឋសភានឹងហៅតំណាងក្រសួងការងារ ដើម្បីជជែកដេញដោលរកច្រកចេញលើករណីនេះទេ?] អាហ្នឹងស្រេចតែខាងតំណាងរាស្រ្ត! ខ្ញុំមិនអាចឆ្លើយជំនួសគាត់បានទេ បើតំណាងរាស្រ្តគាត់យល់ម៉េច គឺគាត់ធ្វើអ៊ីចឹង! អាហ្នឹងជាសិទ្ធិ ជាបុព្វសិទ្ធិរបស់តំណាងរាស្ត្រ លោកចង់ធ្វើម៉េច លោកធ្វើទៅតាមច្បាប់»។
ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ បានលើកឡើងថា ការដែលពួកគេនាំគ្នាទៅដាក់ញត្តិនៅរដ្ឋសភា និងខុទ្ទកាល័យនាយករដ្ឋមន្ត្រីនេះ ដោយសារតែវិវាទការងាររវាងបុគ្គលិក និងក្រុមហ៊ុនណាហ្គាវើលដ៍ បានអូសបន្លាយពេលជាង១ឆ្នាំមកហើយ ក្រោយថៅកែបានបញ្ឈប់ពួកគេពីការងារដោយអយុត្តិធម៌ និងមិនអនុលោមតាមច្បាប់។
ជាមួយគ្នានេះដែរ កញ្ញាថា ការជួបចរចាចំនួន១១ដងរវាងតំណាងកូដករ តំណាងសហជីព និងតំណាងក្រុមហ៊ុន ក្រោមការសម្របសម្រួលរបស់ក្រសួងការងារ ក្រោយកូដករចេញធ្វើកូដកម្មរយៈពេល៦ខែមកនេះ ក៏ពុំមានលទ្ធផលជាផ្លែផ្កានោះដែរ ទើបពួកគេសម្រេចចិត្តរកការអន្តរាគមន៍ពីស្ថាប័នទាំងពីរនេះ។
បើតាមកញ្ញា ឈឹម ស៊ីថរ ក្រុមកូដករស្នើដល់លោកនាយករដ្ឋមន្ត្រី ហ៊ុន សែន និងរដ្ឋសភា ជួយអន្តរាគមន៍ដោះស្រាយវិវាទការងារចំនួន៣ចំណុច ក្នុងនោះ ស្នើឱ្យជួយជំរុញទៅក្រុមហ៊ុនទទួលយកកូដករដែលនៅសេសសល់ប្រមាណ២០០នាក់ចូលធ្វើការវិញ និងទូទាត់សំណងឱ្យបានត្រឹមត្រូវតាមផ្លូវច្បាប់ ព្រមទាំងស្នើសុំឱ្យមានការទម្លាក់បទចោទទៅលើថ្នាក់ដឹកនាំនិងសមាជិកសហជីពទាំង១៥នាក់វិញ។
កញ្ញាថា៖ «យើងសង្ឃឹមថា ញត្តិរបស់យើងដែលយើងបានដាក់ គោលបំណងជាក់លាក់នៅក្នុងការស្វែងរកការអន្តរាគមន៍ហ្នឹង នឹងបានទៅដល់ដៃប្រមុខថ្នាក់ដឹកនាំរបស់យើង ឱ្យលោកច្បាស់អំពីអ្វីដែលកម្មករចង់បាន។ កុំឱ្យព័ត៌មានលាបពណ៌ ព័ត៌មានបំភ្លៃការពិតបាន បានទៅដល់ដៃថ្នាក់ដឹកនាំ»។
បើតាមតំណាងកូដកររូបនេះ អំឡុងពេលដាក់ញត្តិនៅខុទ្ទកាល័យនាយករដ្ឋមន្ត្រីនោះ មន្ត្រីខុទ្ទកាល័យមួយរូបបានចេញមកទទួលញត្តិរបស់ក្រុមកូដករ និងសន្យាបញ្ជូនញត្តិនេះទៅថ្នាក់លើ ដើម្បីពិនិត្យនិងរកដំណោះស្រាយ។
ចំណែក ប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន ថ្លែងថា លោកមិនទាន់បានដឹងករណីញត្តិនេះនៅឡើយទេ។ តែយ៉ាងណា លោកយល់ថា ជារឿងល្អមួយដែលកូដករណាហ្គាយកញត្តិទៅដាក់ជូនស្ថាប័ននាយករដ្ឋមន្ត្រី ដើម្បីសុំកិច្ចអន្តរាគមន៍ជាជាងការដើរដាក់ញត្តិទៅតាមបណ្តាស្ថានទូតបរទេស។
លោកថា៖ «ការស្នើសុំទៅនាយករដ្ឋមន្ត្រីហ្នឹង អាហ្នឹងជាការត្រឹមត្រូវមួយជាជាងការដើរតាមថ្នល់ ដើរតាមអី អាហ្នឹងយើងចេះតែស្វែងរក។ ប្រសិនបើយើងប្រៀបធៀបការដាក់ញត្តិទៅទូត និងដាក់ញត្តិមកនាយករដ្ឋមន្ត្រី ខ្ញុំថាដាក់ញត្តិមកនាយករដ្ឋមន្ត្រីជាជម្រើសល្អជាជាងការដាក់ទៅទូត ព្រោះទូតគេអត់ហ៊ានលូកដៃអីខ្លាំងមកលើដែនអធិបតេយ្យភាពរបស់កម្ពុជា»។
នាយកទទួលបន្ទុកកិច្ចការទូទៅ នៃអង្គការសិទ្ធិមនុស្សលីកាដូ លោក អំ សំអាត ជំរុញឱ្យរដ្ឋសភាយកចិត្តទុកដាក់អន្តរាគមន៍ដោះស្រាយបញ្ចប់វិវាទការងារនៅក្រុមហ៊ុនណាហ្គាវើលដ៍នេះ ដោយសាររដ្ឋសភាជាកន្លែងទទួលសំណូមពរ និងបញ្ហារបស់ប្រជាពលរដ្ឋ ដើម្បីយកទៅដោះស្រាយ។
លោកថា៖ «បើសិនជាឃើញថា បញ្ហាហ្នឹងវាពាក់ព័ន្ធនឹងនីតិវិធីយ៉ាងម៉េច រដ្ឋសភាមាន២ជម្រើស។ ទី១ បញ្ជូនលិខិត ហើយនិងលិខិតអន្តរាគមន៍ទៅក្រសួងដែលពាក់ព័ន្ធហ្នឹង ជួយធ្វើអន្តរាគមន៍និងដោះស្រាយ។ ទី២ បើបញ្ហាហ្នឹងវា[មាន]ដំណោះស្រាយហ្នឹងយ៉ាងម៉េច អីយ៉ាងម៉េច រដ្ឋសភាក៏មានសិទ្ធិកោះហៅរដ្ឋមន្ត្រីក្រសួងដែលពាក់ព័ន្ធហ្នឹងមកឆ្លើយបំភ្លឺដែរ»។
គួរបញ្ជាក់ថា វិវាទការងារក្រុមហ៊ុន ណាហ្គាវើលដ៍ នេះបានកើតឡើងអស់រយៈពេលជាង១ឆ្នាំមកហើយ ក្រោយពេលដែលក្រុមហ៊ុននេះបានបញ្ឈប់បុគ្គលិកចំនួន១ ៣២៩នាក់ ក្នុងចំណោមបុគ្គលិកសរុបជាង៨ ០០០នាក់ពីការងារ ក្រោមហេតុផលថា ជួបវិបត្តិហិរញ្ញវត្ថុដោយសារតែបញ្ហាជំងឺកូវីដ-១៩៕