មេធាវីការពារក្ដីឱ្យកញ្ញា សេង ធារី គ្រោងដាក់ពាក្យប្ដឹងទៅសាលាឧទ្ធរណ៍រាជធានីភ្នំពេញ នៅសប្ដាហ៍ក្រោយ ជំទាស់នឹងការសម្រេចរបស់សាលាដំបូងរាជធានីភ្នំពេញ ដែលផ្ដន្ទាទោសឱ្យកូនក្ដីរបស់ខ្លួនជាប់ពន្ធនាគារ៦ឆ្នាំ ក្រោមបទចោទ «ញុះញង់ និងរួមគំនិតក្បត់»។
មេធាវីការពារក្ដីឱ្យកញ្ញា សេង ធារី គឺលោក ជូង ជូងី បានប្រាប់វីអូឌីនៅថ្ងៃព្រហស្បតិ៍នេះ បន្ទាប់ជួបកូនក្ដីរបស់ខ្លួនៅពន្ធនាគារខេត្តព្រះវិហារ ថារយៈពេលមួយសប្ដាហ៍មកនេះ កញ្ញា សេង ធារី មិនមានបញ្ហាសុខភាពអ្វីនោះទេ គ្រាន់តែមិនទទួលបានព័ត៌មាន ជាពិសេសសេចក្ដីសម្រេចរបស់តុលាការតែម្ដង។
លោកបញ្ជាក់ថា ក្នុងជំនួបជាមួយកូនក្ដីប្រហែល២ម៉ោងនៅពន្ធនាគារខេត្តព្រះវិហារនោះ កញ្ញា សេង ធារី បានសម្រេចឱ្យរូបលោកដែលជាមេធារីការពារក្តី ប្ដឹងសាទុក្ខទៅសាលាឧទ្ធរណ៍រាជធានីភ្នំពេញដែលជាតុលាការជាន់ខ្ពស់ទៀត បន្ទាប់ពីបានដឹងសេចក្ដីសម្រេចរបស់សាលាដំបូងរាជធានីភ្នំពេញ។
កញ្ញា សេង ធារី ជាមេធាវីអាមេរិក ត្រូវបានសមត្ថកិច្ចចាប់បញ្ជូនខ្លួនទៅឃុំនៅពន្ធនាគារព្រៃស (ម២) ភ្លាមៗ កាលពីថ្ងៃទី១៤ ខែមិថុនា ឆ្នាំ២០២២ ក្រោយពីសាលាដំបូងរាជធានីភ្នំពេញ ចេញសាលក្រមផ្តន្ទាទោសគាត់ដាក់ពន្ធនាគារ៦ឆ្នាំ ក្រោមបទចោទ «រួមគំនិតក្បត់ និងញុះញង់»។
ក្រោយពីឃុំខ្លួននៅពន្ធនាគារព្រៃសបានមួយថ្ងៃនោះ នៅថ្ងៃទី១៥ ខែមិថុនា ឆ្នាំ២០២២ កញ្ញា សេង ធារី ត្រូវបានសមត្ថកិច្ចបញ្ជូនទៅឃុំនៅពន្ធនាគារខេត្តព្រះវិហារវិញ។
អ្នកនាំពាក្យអគ្គនាយកនៃអគ្គនាយកដ្ឋានពន្ធនាគារនៃក្រសួងមហាផ្ទៃ លោក នុត សវនា បានប្រាប់វីអូឌីកាលពីសប្ដាហ៍មុនថា ការដែលមន្ត្រីពន្ធនាគារហាមមេធាវីមិនឱ្យចូលជួបកញ្ញា សេង ធារី ក្នុងពន្ធនាគារព្រៃស និងបានបញ្ជូនទៅឃុំពន្ធនាគារខេត្តព្រះវិហារ ដោយសារបញ្ហាសន្តិសុខ និងក្តាប់បានព័ត៌មានថា នឹងមានការត្រៀមធ្វើបាតុកម្មនៅមុខពន្ធនាគារ។
យ៉ាងណាក៏ដោយ ការចោទប្រកាន់ និងកាត់ទោសលើកញ្ញា សេង ធារី និងមេដឹកនាំ រួមទាំងសកម្មជនផ្សេងទៀត កាលពីថ្ងៃទី១៤ ខែមិថុនា ឆ្នាំ២០២២នេះ តុលាការសម្អាងថា កញ្ញា សេង ធារី បានបង្ហោះសារលើបណ្ដាញសង្គមគាំទ្រគម្រោងធ្វើមាតុភូមិនិវត្តន៍របស់លោក សម រង្ស៊ី អតីតប្រធានគណបក្សប្រឆាំង កាលពីអំឡុងឆ្នាំ២០១៩៕
