ក្រសួងសុខាភិបាល និងក្រសួងអប់រំ យុវជន និងកីឡា អំពាវនាវដល់យុវជននិងពលរដ្ឋចៀសវាងប្រើប្រាស់បារីអេឡិចត្រូនិច ដែលបង្កផលប៉ះពាល់ធ្ងន់ធ្ងរដល់សុខភាព និងអាចឈានដល់ការបាត់បង់ជីវិតផងដែរ។
សេចក្ដីជូនព័ត៌មានរបស់ក្រសួងសុខាភិបាល ចុះថ្ងៃទី២៤ ខែមិថុនា ឆ្នាំ២០២២ បានលើកឡើងថា មានភស្តុតាងជាច្រើនបង្ហាញថា ការប្រើប្រាស់បារីអេឡិចត្រូនិច (e-cigarette) បង្កផលប៉ះពាល់ដល់សុខភាព បណ្ដាលឱ្យញៀន បង្កផលប៉ះពាល់ធ្ងន់ធ្ងរដល់បេះដូងនិងសួត រហូតដល់បាត់បង់ជីវិត ដោយសារនៅពេលប្រើប្រាស់បារីអេឡិចត្រូនិច សារធាតុគីមី និងជាតិនីកូទីន ត្រូវបានស្រូបចូលទៅក្នុងរាងកាយ ហើយចូលទៅក្នុងខួរក្បាលរបស់អ្នកជក់។
ក្រសួងបន្តថា ការប្រើប្រាស់បារីអេឡិចត្រូនិច ក្នុងចំណោមកុមារ និងមនុស្សវ័យជំទង់ មានផលប៉ះពាល់ធ្ងន់ធ្ងរដល់ការអភិវឌ្ឍខួរក្បាល ដែលនាំឱ្យកើតផលវិបាករយៈពេលវែង និងអាចប៉ះពាល់ដល់ការចងចាំ ការសិក្សា និងបង្កជាជំងឺថប់អារម្មណ៍ ជាដើម។
ដោយយល់ឃើញថា បារីអេឡិចត្រូនិចពិតជាបង្កគ្រោះថ្នាក់ និងផលប៉ះពាល់ដល់សុខភាពធ្ងន់ធ្ងរ និងគំរាមកំហែងដល់អាយុជីវិតអ្នកប្រើប្រាស់ ក្រសួងថា កម្ពុជាបានហាមឃាត់ការប្រើប្រាស់ និងការធ្វើអាជីវកម្មលក់ចែកចាយបារីអេឡិចត្រូនិចនេះតាំងពីឆ្នាំ២០១៤មក ហើយនៅឆ្នាំ២០២១ រដ្ឋាភិបាលក៏បានបន្ថែមសេចក្តីណែនាំ ស្តីពីការចាត់វិធានការបង្ការ ទប់ស្កាត់ការនាំចូល ការជួញដូរ ការធ្វើអាជីវកម្ម និងការប្រើប្រាស់ផលិតផល «អេចឈ៍ ធី ភី (HTPs)» នៅកម្ពុជាផងដែរ។
តែយ៉ាងណា ក្រសួងសុខាភិបាលនៅសង្កេតឃើញថា មានជនឆ្លៀតឱកាសមួយចំនួននៅបន្តផ្សព្វផ្សាយលក់ផលិតផល អេចឈ៍ ធី ភី (HTPs) ឬ (e-cigarette) នៅលើបណ្តាញសង្គម ក្រោមខ្លឹមសារបំផ្លើសថា ជាឧបករណ៍សម្រាប់ផ្ដាច់ការជក់បារី ជាផលិតផលមានសុវត្ថិភាពជាងបារីធម្មតា ដែលការផ្សព្វផ្សាយនេះជាទង្វើល្មើសច្បាប់ និងផ្ទុយពីសេចក្តីណែនាំរបស់រដ្ឋាភិបាល។
ករណីនេះ ក្រសួងសុខាភិបាលបានអំពាវនាវដល់យុវជន យុវនារី និងប្រជាពលរដ្ឋទាំងអស់ កុំសាកល្បង និងកុំជឿតាមការឃោសនាទាំងនោះ ខណៈការប្រើប្រាស់បារីអេឡិចត្រូនិចនេះបង្កគ្រោះថ្នាក់ ផលប៉ះពាល់ដល់សុខភាពនិងសង្គម និងអាចឱ្យអ្នកប្រើប្រាស់ឈានទៅរកការប្រើប្រាស់គ្រឿងញៀនផ្សេងទៀតទៅថ្ងៃអនាគត។
ពាក់ព័ន្ធនឹងបារីអេឡិចត្រូនិចនេះដែរ ក្រសួងអប់រំ យុវជន និងកីឡា នៅថ្ងៃសុក្រនេះ ក៏បានចេញសេចក្តីណែនាំពីការទប់ស្កាត់ការប្រើប្រាស់បារីប្រភេទនេះ និងផលិតផល នៅតាមគ្រឹះស្ថានសិក្សាសាធារណៈនិងឯកជនផងដែរ។
ក្រសួងអប់រំបានណែនាំដល់អង្គភាពចំណុះក្រសួង មន្ទីរអប់រំរាជធានី-ខេត្ត ការិយាល័យអប់រំនៃរដ្ឋបាលក្រុងស្រុកខណ្ឌ និងគ្រឹះស្ថានសិក្សារដ្ឋនិងឯកជនទាំងអស់ ត្រូវផ្សព្វផ្សាយពីផលប៉ះពាល់ធ្ងន់ធ្ងរនៃការប្រើប្រាស់បារីអេឡិចត្រូនិចនេះដល់បុគ្គលិកអប់រំនិងអ្នកសិក្សា និងត្រូវហាមដាច់ខាតការប្រើប្រាស់ ការចែកចាយ ការជួញដូរ ការផ្សព្វផ្សាយពាណិជ្ជកម្មគ្រប់រូបភាពទាំងក្នុងនិងជុំវិញបរិវេណគ្រឹះស្ថានសិក្សា។
ក្រសួងក៏បានណែនាំឱ្យមានការសហការជាមួយមាតាបិតា អាណាព្យាបាល បុគ្គលិកអប់រំ និងអ្នកសិក្សា ក្នុងការកំណត់មុខសញ្ញា ទីតាំងចែកចាយ និងជួញដូរបារីអេឡិចត្រូនិច ដើម្បីរាយការណ៍ជូនសមត្ថកិច្ចចាត់វិធានការទៅតាមផ្លូវច្បាប់ផងដែរ៕