លោកនាយករដ្ឋមន្ត្រី ហ៊ុន សែន អំពាវនាវដោយទទូចដល់ប្រជាពលរដ្ឋដែលមិនទាន់ទទួលវ៉ាក់សាំងកូវីដ-១៩គ្រប់ដូស ទៅទទួលយកវ៉ាក់សាំង ជាពិសេសពលរដ្ឋដែលមិនទាន់បានចាក់ដូសទី៣ ដែលមានជាង៥លាននាក់ ដើម្បីបង្កើនភាពស៊ាំក្នុងសហគមន៍ បើទោះកម្ពុជាមិនមានករណីឆ្លងថ្មីជាង៥០ថ្ងៃមកហើយក៏ដោយ។
តាមរយៈសារជាសំឡេងនៅថ្ងៃចន្ទនេះ លោកនាយករដ្ឋមន្ត្រី ហ៊ុន សែន បានថ្លែងថា ភាពស៊ាំដែលបានមកពីការចាក់វ៉ាក់សាំង បានបង្កើតនូវភាពល្អប្រសើរ ដែលមិនឱ្យមានអ្នកឆ្លងនិងអ្នកស្លាប់ដោយសារជំងឺកូវីដ-១៩បន្តទៅទៀតទេ។ ប៉ុន្តែលោកថា ភាពស៊ាំនៅសហគមន៍នេះនៅមិនទាន់អាចធានាបានគ្រប់គ្រាន់នៅឡើយ ដោយសារចំនួនប្រជាពលរដ្ឋដែលបានចាក់វ៉ាក់សាំងប្រឆាំងកូវីដ-១៩ ដូសទី៣ ទើបតែបានជាង៩លាននាក់ បើធៀបនឹងចំនួនពលរដ្ឋ១៥លាននាក់ដែលនឹងត្រូវទទួលវ៉ាក់សាំងដូសទី៣។
បើតាមលោកនាយករដ្ឋមន្ត្រី ហ៊ុន សែន នៅមានពលរដ្ឋជាង៥លាននាក់ទៀតដែលមិនទាន់ទៅទទួលវ៉ាក់សាំងកូវីដ-១៩ ដូសទី៣ នៅឡើយ ខណៈអ្នកចាក់វ៉ាក់សាំងដូសទី៤ មានជាង២លាននាក់ និងអ្នកចាក់ដូសទី៥ បានជាង២០ម៉ឺននាក់។
លោកនាយករដ្ឋមន្ត្រី ហ៊ុន សែន បានថ្លែងថា៖ «សម្រាប់បងប្អូនដែលមិនទាន់បានទទួលដូសទី៣ ត្រូវស្វះស្វែងទៅរកដូសទី៣ បញ្ហាមិនមែននៅលើវ៉ាក់សាំងនោះទេ អ្វីដែលជាការលំបាក គឺបងប្អូនមិនព្រមមករកវ៉ាក់សាំងតែម្តង នេះជាបញ្ហាដែលអាចបង្កនូវស្ថានភាពដ៏លំបាកនៅពេលក្រោយ។ កូវីដ-១៩ ពិតមែនតែវាមិនមានឆ្លងនៅកម្ពុជា ប៉ុន្តែកូវីដ-១៩ មិនទាន់ទៅណាឆ្ងាយពីយើងនៅឡើយទេ សូម្បីតែនៅកម្ពុជាមិនមានឆ្លង ប៉ុន្តែមិនមានសេចក្តីថាមិនមានកូវីដ-១៩នៅជិតយើងនោះទេ»។
លោកក៏បានណែនាំទៅក្រសួងពាក់ព័ន្ធ និងអាជ្ញាធររាជធានី-ខេត្ត បង្កើតនូវក្រុមចាក់វ៉ាក់សាំង ដើម្បីចុះចាក់ជូនប្រជាពលរដ្ឋនៅតាមភូមិនិងលំនៅឋានរបស់ពលរដ្ឋផងដែរ។
បើតាមរបាយការណ៍របស់ក្រសួងសុខាភិបាល គិតមកដល់ថ្ងៃម្សិលមិញ គឺមានរយៈពេល៥១ថ្ងៃហើយដែលកម្ពុជាមិនមានករណីឆ្លងថ្មី និងអ្នកស្លាប់បន្ថែមដោយសារជំងឺកូវីដ-១៩។ ក្រសួងបញ្ជាក់ថា គិតមកដល់ពេលនេះ អ្នកឆ្លងជំងឺកូវីដ-១៩នៅកម្ពុជា មានចំនួន១៣៦ ២៦២នាក់ ក្នុងនោះបានជាសះស្បើយចំនួន១៣៣ ២០៦នាក់ និងស្លាប់ចំនួន៣ ០៥៦នាក់៕