ប្រទេសស្រីលង្កា នឹងអនុញ្ញាតការផ្គត់ផ្គង់ប្រេងឥន្ធនៈសម្រាប់តែសេវាកម្មចាំបាច់មួយចំនួនប៉ុណ្ណោះ ដែលក្នុងនោះរួមមាន វិស័យសុខាភិបាល និងសេវាដឹកជញ្ជូនសាធារណៈ [រថភ្លើង និងឡានក្រុង] សម្រាប់រយៈពេលពីរសប្ដាហ៍ ដើម្បីជួយសម្រួលដល់បញ្ហាកង្វះប្រេងឥន្ធនៈធ្ងន់ធ្ងរនៅក្នុងប្រទេស។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
អ្នកនាំពាក្យគណៈរដ្ឋមន្ត្រីមួយរូប លោក Bandula Gunewardena ថ្លែងថា ប្រទេសស្រីលង្កានឹងផ្គត់ផ្គង់ប្រេងឥន្ធនៈសម្រាប់តែរថភ្លើង ឡានក្រុង សេវាវេជ្ជសាស្រ្ត និងយានជំនិះដែលដឹកជញ្ជូនអាហារតែប៉ុណ្ណោះ ដោយត្រូវអនុវត្តចាប់ពីថ្ងៃអង្គារនេះ រហូតដល់ថ្ងៃទី១០ ខែកក្កដាខាងមុខ។
ទាក់ទិននឹងករណីនេះ អ្នកនាំពាក្យរូបនោះបន្ថែមថា សាលារៀននៅតាមទីក្រុងនានាក៏នឹងត្រូវបិទផងដែរ ខណៈប្រជាពលរដ្ឋទាំងឡាយត្រូវបានជំរុញឱ្យធ្វើការពីផ្ទះដើម្បីកាត់បន្ថយចំណាយ។
លោក Bandula Gunewardena បន្តថា៖ «ប្រទេសស្រីលង្កាមិនដែលប្រឈមមុខនឹងវិបត្តិសេដ្ឋកិច្ចធ្ងន់ធ្ងរបែបនេះនោះទេក្នុងប្រវត្តិសាស្ត្ររបស់ខ្លួន»។
គួរបញ្ជាក់ថា ប្រទេសស្រីលង្កា បច្ចុប្បន្នកំពុងតែទទួលរងនូវវិបត្តិសេដ្ឋកិច្ចដ៏អាក្រក់បំផុតមួយដែលមិនធ្លាប់កើតមានពីមុនមក ខណៈទុនបម្រុងអន្តរជាតិក៏ស្ថិតក្នុងកម្រិតទាបបំផុត ដែលបានបង្កឱ្យប្រទេសមួយនេះជួបប្រទះបញ្ហាកង្វះថវិកាធ្ងន់ធ្ងរសម្រាប់ការនាំចូលអាហារ ឱសថ និងប្រេងឥន្ធនៈ ជាដើម។
ទោះជាយ៉ាងណា រដ្ឋមន្ត្រីនៃប្រទេសស្រីលង្កាមួយរូបធ្លាប់បានបញ្ជាក់ឱ្យដឹងកាលពីពេលកន្លងទៅថា លោកប្រធានាធិបតី ហ្កូតាបាយ៉ា រ៉ាចាប៉ាកសា (Gotabaya Rajapaksa) នឹងមិនលាលែងពីតំណែងឡើយ បើទោះបីជាមានបាតុកម្មនានាក្នុងប្រទេសប្រឆាំងនឹងវិធានការរបស់លោក ក្នុងការដោះស្រាយវិបត្តិសេដ្ឋកិច្ចដ៏អាក្រក់បំផុតរបស់ប្រទេសនេះក៏ដោយ៕
