អ្នកស្រាវជ្រាវផ្នែកភូមិសាស្ត្រនយោបាយថា បើទោះជាអាមេរិកផ្លាស់ប្ដូរមន្ត្រីទូតថ្មីប្រចាំកម្ពុជា ក៏នឹងមិនធ្វើឱ្យទំនាក់ទំនងរវាងកម្ពុជា-អាមេរិកមានភាពប្រសើរឡើងវិញដែរ ពោលគឺវាអាស្រ័យលើប្រយោជន៍ភូមិសាស្ត្រនយោបាយនិងឆន្ទៈនៃភាគីទាំង២។
ការអះអាងនេះធ្វើឡើងបន្ទាប់ពីមានព័ត៌មានពីការផ្លាស់ប្តូរឯកអគ្គរដ្ឋទូតថ្មីរបស់អាមេរិកប្រចាំកម្ពុជា ស្របពេលស្ថានភាពទំនាក់ទំនងកម្ពុជា អាមេរិកនៅមានភាពតានតឹង និងមិនទាន់មានភាពវិវត្តណាមួយល្អប្រសើរនោះឡើយ។
អ្នកស្រាវជ្រាវផ្នែកភូមិសាស្ត្រនយោបាយ លោក វណ្ណ ប៊ុនណា មានប្រសាសន៍ថា ការផ្លាស់ប្តូរឯកអគ្គរដ្ឋទូតអាមេរិកប្រចាំកម្ពុជា មិនមែនជារឿងប្លែកទេ។ លោកថា រឿងនេះទំនងជាឯកអគ្គរដ្ឋទូតបច្ចុប្បន្នដល់អាណត្តិ ខណៈបានបំពេញបេសកកម្មនេះតាំងពីឆ្នាំ២០១៩ ស្របពេលជាទូទៅ អាណត្តិរបស់ឯកអគ្គរដ្ឋទូតជាមធ្យមមានរយៈពេល៣ឆ្នាំប៉ុណ្ណោះ។
បើទោះណាជាគេសង្កេតឃើញថា បច្ចុប្បន្នទំនាក់ទំនងរវាងកម្ពុជានិងអាមេរិកមានភាពរកាំរកូសនិងធ្លាក់ចុះជាបន្តបន្ទាប់ក៏ដោយ តែលោកថា នេះមិនមែនជាហេតុផលក្នុងការផ្លាស់ប្តូរឯកអគ្គរដ្ឋទូតថ្មីទេ ខណៈសមត្ថភាពអ្នកទាំង២ក្នុងវិស័យការទូតមានភាពប្រហាក់ប្រហែលគ្នា។
យ៉ាងណា លោកយល់ថា ការផ្លាស់ប្តូរនេះ គឺដើម្បីឱ្យស៊ីចង្វាក់គ្នានឹងគោលនយោបាយក្នុងអាណត្តិរបស់ប្រធានាធិបតីថ្មី។
លោក ប៊ុនណា ថា៖ «លោក W. Patrick Murphy គឺត្រូវបានតែងតាំងនៅក្នុងរដ្ឋកាលរបស់លោក Donald Trump ហើយមកដល់បច្ចុប្បន្ន សហរដ្ឋអាមេរិកគឺដឹកនាំដោយលោក Joe Biden។ អ៊ីចឹងហើយប្រហែលលោក Joe Biden ចង់ផ្លាស់ប្តូរមន្ត្រីឯកអគ្គរដ្ឋទូតប្រចាំកម្ពុជាដែរ ដើម្បីឱ្យស៊ីគ្នាខ្លាំងទៅនឹងគោលនយោបាយនៅក្នុងអាណត្តិរបស់គាត់»។
បែបនេះក្តី អ្នកស្រាវជ្រាវផ្នែកភូមិសាស្ត្រនយោបាយរូបនេះថា បើទោះអាមេរិកព្យាយាមផ្លាស់ប្តូរមន្ត្រីទូតថ្មីមកកម្ពុជា ក៏នឹងមិនធ្វើឱ្យទំនាក់ទំនងរវាងកម្ពុជា-អាមេរិកមានភាពប្រសើរឡើងវិញទេ វាលុះណាតែប្រទេសទាំង២មានឆន្ទៈ។
លោកបន្តថា៖ «ទំនាក់ទំនងកម្ពុជា-សហរដ្ឋអាមេរិក វាមិនល្អប្រសើរដោយគ្រាន់តែមានការប្តូរឯកអគ្គរដ្ឋទូតសហរដ្ឋអាមេរិកទេ។ វាត្រូវការការធ្វើការគ្រប់ជ្រុងជ្រោយ ការចូលរួមច្រើន ជាពិសេសទាក់ទងនឹងឥទ្ធិពលរបស់ចិនលើកម្ពុជា។ ហើយមួយទៀត គឺចេតនាឬក៏ប្រយោជន៍ជាភូមិសាស្ត្រនយោបាយនៃសហរដ្ឋអាមេរិកនិងកម្ពុជាហ្នឹងវាមានកម្រិតណា? ហើយកម្ពុជាមានឆន្ទៈកម្រិតណានៅក្នុងការស្តារទំនាក់ទំនងឡើងវិញ»។
អ្នកនាំពាក្យស្ថានទូតអាមេរិកប្រចាំនៅកម្ពុជា អ្នកស្រី Stephanie Arzate មានប្រសាសន៍ថា ឯកអគ្គរដ្ឋទូតអាមេរិកថ្មីដែលនឹងមកកាន់តួនាទីបន្តនៅកម្ពុជា គឺលោក Robert Forden។ យ៉ាងណា អ្នកស្រីថា លោក Robert Forden ត្រូវតែទទួលការបញ្ជាក់ដោយព្រឹទ្ធសភាអាមេរិកជាមុនសិន មុនពេលក្លាយជាឯកអគ្គរដ្ឋទូតផ្លូវការ ខណៈមិនទាន់អាចបញ្ជាក់អំពីកាលបរិច្ឆេទជាក់លាក់នៃការចាប់ផ្តើមបំពេញតួនាទីរបស់លោកនៅកម្ពុជានៅឡើយ។
អ្នកស្រី Stephanie Arzate ថា៖ «ដូចគ្នាទៅនឹងឯកអគ្គរដ្ឋទូតអាមេរិកគ្រប់រូបដែរ លោក Robert Forden ត្រូវតែមានការបញ្ជាក់ដោយព្រឹទ្ធសភាអាមេរិក មុនពេលក្លាយជាឯកអគ្គរដ្ឋទូតផ្លូវការ»។
អ្នកស្រី Stephanie Arzate មិនបានបញ្ជាក់ពីហេតុផលដែលជំរុញឱ្យមានការផ្លាស់ប្តូរឯកអគ្គរដ្ឋទូតអាមេរិកប្រចាំកម្ពុជានាពេលនេះ ថាតើជាការបញ្ចប់អាណត្តិអ្នកចាស់ ឬពាក់ព័ន្ធគោលនយោបាយនោះទេ។ ក្នុងនោះ អ្នកស្រីគ្រាន់តែបញ្ជាក់ថា ឯកអគ្គរដ្ឋទូតបច្ចុប្បន្ន គឺលោក W. Patrick Murphy នឹងបន្តតួនាទីរបស់លោកនៅភ្នំពេញសិន។
លោក W. Patrick Murphy បានក្លាយជាឯកអគ្គរដ្ឋទូតសហរដ្ឋអាមេរិកប្រចាំកម្ពុជា តាំងពីខែកញ្ញា ឆ្នាំ២០១៩។ អ្នកស្រី Stephanie Arzate មិនបានបញ្ជាក់ទេ ថាតើលោក Murphy នឹងបញ្ចប់ភារកិច្ចជាឯកអគ្គរដ្ឋទូតនៅកម្ពុជានៅពេលណានោះទេ៕
