ក្រសួងសុខាភិបាលបានបន្តរកឃើញករណីឆ្លងជំងឺកូវីដ-១៩ ចំនួន៣ករណីបន្ថែមទៀតកាលពីថ្ងៃម្សិលមិញ ខណៈលោកនាយករដ្ឋមន្ត្រី ហ៊ុន សែន បញ្ជាក់ថា នៅព្រឹកថ្ងៃសុក្រនេះបានរកឃើញបន្ថែម៦នាក់ទៀត។
សេចក្តីប្រកាសរបស់ក្រសួងសុខាភិបាល ចុះថ្ងៃទី១ ខែកក្កដា ឆ្នាំ២០២២ បានឱ្យដឹងថា កាលពីថ្ងៃម្សិលមិញ ក្រសួងបានបន្តរកឃើញករណីឆ្លងជំងឺកូវីដ-១៩ថ្មី ចំនួន៣ករណី ដែលសុទ្ធតែជាប្រភេទអូមីក្រុង និងជាករណីធ្វើតេស្តស្នើសុំវិញ្ញាបនបត្រទៅក្រៅប្រទេស។ ចំពោះអ្នកជាសះស្បើយ និងអ្នកស្លាប់វិញ ក្រសួងថាមិនមាននោះទេ។
ចំណែកលោកនាយករដ្ឋមន្ត្រី ហ៊ុន សែន បានថ្លែងក្នុងពិធីអបអរទិវាមច្ឆជាតិ នៅព្រឹកថ្ងៃទី១ ខែកក្កដា ឆ្នាំ២០២២នេះថា តាមព័ត៌មានដែលលោកទទួលបាន គិតត្រឹមព្រឹកថ្ងៃសុក្រនេះ បានរកឃើញករណីឆ្លងចំនួន៦ករណីទៀត ក្នុងនោះមាន៥ករណីជាអ្នកនៅខេត្ត និង១ករណីជាអ្នកនៅរាជធានីភ្នំពេញ។
ករណីនេះ លោកនាយករដ្ឋមន្រ្តី ហ៊ុន សែន បានអំពាវនាវដល់ប្រជាពលរដ្ឋទាំងអស់ត្រូវបន្តទៅចាក់វ៉ាក់សាំងដូសជំរុញឱ្យបានគ្រប់ៗគ្នា ក៏ដូចជាត្រូវបង្កើនការប្រុងប្រយ័ត្ននិងរក្សាអនាម័យឱ្យបានខ្ពស់ ខណៈជំងឺកូវីដ-១៩បម្លែងថ្មី អូមីក្រុង កំពុងចាប់ផ្តើមឆ្លងរីករាលឡើងជាថ្មីម្ដងទៀត។
លោកថ្លែងថា៖ «អ៊ីចឹងខ្ញុំសុំវិលត្រលប់មកអំពាវនាវបងប្អូនប្រជាពលរដ្ឋរបស់យើង ទទួលយកដូសជំរុញ! គេដើរដល់ដូសទីប៉ុន្មាន ទៅយកដូសប៉ុណ្ណឹងទៅ។ ឥលូវបងប្អូនខ្លះបានតែពីរដូសនោះទេ អ៊ីចឹងទៅយកអាបី [ដូសទី៣] អ្នកបានបី ទៅយកបួន! អ្នកបានបួន ទៅយកប្រាំ! ព្រោះយើងរៀបចំដើម្បីការពារជីវិតប្រជាជន»។
លោកនាយករដ្ឋមន្ត្រី ហ៊ុន សែន បន្ថែមថា៖ «វ៉ាក់សាំងនៅកម្ពុជា គឺវ៉ាក់សាំងអត់មានពណ៌សម្បុរទេ! អត់មានគិតថាអ្នកនេះបក្សនេះ អ្នកនេះបក្សនោះ អត់មានគិតពីជាតិសាសន៍ សាសនានោះទេ។ អ្នកឯងកាន់សាសនាអីក៏ដោយ ជនជាតិអីក៏ដោយ ខ្ញុំចាក់ជូនទាំងអស់ ឱ្យតែរស់នៅលើដីខ្មែរ»។
បើតាមសេចក្តីប្រកាសរបស់ក្រសួងសុខាភិបាល គិតមកដល់ថ្ងៃទី៣០ ខែមិថុនា ឆ្នាំ២០២២ កម្ពុជាបានរកឃើញករណីឆ្លងជំងឺកូវីដ-១៩សរុបចំនួន ១៣៦ ២៨២នាក់ ក្នុងនោះជាសះស្បើយ ១៣៣ ២០៦នាក់ និងករណីស្លាប់ចំនួន ៣ ០៥៦នាក់៕