ប្រធានាធិបតីស្រីលង្កា នៅថ្ងៃពុធម្សិលមិញ បានឱ្យដឹងថា រូបលោកបានជំរុញដល់មេដឹកនាំរុស្ស៊ី លោក វ្លាឌីមៀរ ពូទីន ឱ្យជួយប្រទេសរបស់ខ្លួនតាមរយៈការនាំចូលប្រេងឥន្ធនៈ ខណៈដែលប្រទេសនេះបច្ចុប្បន្នកំពុងតែប្រឈមនឹងវិបត្តិសេដ្ឋកិច្ចដ៏ធ្ងន់ធ្ងរបំផុត។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ថ្លែងតាមរយៈបណ្ដាញសង្គម ធ្វីតធ័រ (Twitter) លោកប្រធានាធិបតី ហ្កូតាបាយ៉ា រ៉ាចាប៉ាកសា (Gotabaya Rajapaksa) បានបន្តថា រូបលោកបានផ្ញើសារទៅកាន់លោក វ្លាឌីមៀរ ពូទីន ដោយបានស្នើសុំការគាំទ្រឥណទានពីប្រទេសរុស្ស៊ី ក្នុងការនាំចូលប្រេងឥន្ធនៈមកកាន់ប្រទេសរបស់ខ្លួន។
គួរបញ្ជាក់ថា ប្រជាជនស្រីលង្កាទាំងឡាយបានទទួលរងនូវការខ្វះខាតប្រេងឥន្ធនៈ ថាមពល អាហារ ឱសថ និងរបស់របរផ្សេងៗទៀត អស់រយៈពេលជាច្រើនសប្តាហ៍មកហើយ ខណៈដែលក្រុមគ្រូពេទ្យក៏បានព្រមានពីប្រព័ន្ធសុខភាពទាំងមូលដែលអាចនឹងដួលរលំនាពេលខាងមុខផងដែរ។
ទាក់ទិននឹងករណីនេះ ការតវ៉ានានាតាមដងផ្លូវក៏បានចាប់ផ្តើមកើតឡើងជាបន្តបន្ទាប់ និងវិវត្តកាន់តែខ្លាំងឡើងផងដែរ ដោយប្រជាពលរដ្ឋបានចេញមកតវ៉ា ដើម្បីទាមទារឱ្យប្រធានាធិបតីរបស់ខ្លួនចុះចេញពីតំណែង។
ទោះជាយ៉ាងណា រដ្ឋមន្ត្រីនៃប្រទេសស្រីលង្កាមួយរូបធ្លាប់បានបញ្ជាក់ឱ្យដឹងកាលពីពេលកន្លងទៅថា លោកប្រធានាធិបតី ហ្កូតាបាយ៉ា រ៉ាចាប៉ាកសា នឹងមិនលាលែងពីតំណែងឡើយ បើទោះបីជាមានបាតុកម្មនានាក្នុងប្រទេសប្រឆាំងនឹងវិធានការរបស់លោកក្នុងការដោះស្រាយវិបត្តិសេដ្ឋកិច្ចដ៏អាក្រក់បំផុតរបស់ប្រទេសនេះក៏ដោយ៕
