តំណាងពលរដ្ឋចំនួន ៧នាក់ ត្រូវបានតុលាការសាលាដំបូងរាជធានីភ្នំពេញ កោះហៅឱ្យចូលបំភ្លឺនៅដើមខែក្រោយនេះ បន្ទាប់ពីនាំគ្នាតវ៉ាជំរុញឱ្យអាជ្ញាធរពាក់ព័ន្ធ ដោះស្រាយជម្លោះដីធ្លីជាប់បឹងតាមោកជូនពួកគេ។
ពលរដ្ឋចំនួន ២៥០គ្រួសារ រស់នៅជាប់បឹងតាមោក ស្ថិតក្នុងសង្កាត់សំរោងត្បូង ខណ្ឌព្រែកព្នៅ រាជធានីភ្នំពេញ បាននាំគ្នាតវ៉ាដីធ្លីជាបន្តបន្ទាប់ ចាប់តាំងពីពាក់កណ្តាលខែមិថុនា រហូតមកដល់ខែកក្កដា ឆ្នាំ២០២២នេះ ក្រោយពីអាជ្ញាធរមូលដ្ឋានចោទពួកគាត់ថារស់នៅលើដីចំណីផ្លូវដោយខុសច្បាប់។
ក្នុងដីកាកោះហៅចុះថ្ងៃទី១៤ ខែមិថុនា ឆ្នាំ២០២២ ដែលមានខ្លឹមសារដូចគ្នា ហើយវីអូឌីទើបទទួលបាននៅថ្ងៃសុក្រនេះ តំណាងអយ្យការអមសាលាដំបូងរាជធានីភ្នំពេញ លោក ទុង រតនា បានកោះហៅតំណាងពលរដ្ឋចំនួន ៧នាក់ រួមមាន អ្នកស្រី ប្រាក់ សុភា, អ្នកស្រី ខេន សាអយ, អ្នកស្រី ផន សុខុម, អ្នកស្រី គង់ តឿ, អ្នកស្រី ផន សុំ, អ្នកស្រី តាន់ ខ្ទី និងអ្នកស្រី អំ ភឿន ឱ្យចូលទៅបំភ្លឺចំពោះតុលាការ នៅថ្ងៃទី៣ និងទី០៤ ខែសីហា ឆ្នាំ២០២២ ក្រោមបទចោទ «រារាំង ញុះញង់ បង្កើតសកម្មភាពអនាធិបតេយ្យតាមដងផ្លូវសាធារណៈ» ទៅតាមបណ្តឹងរបស់លោក មាស សម្បូរ ដែលពលរដ្ឋប្រាប់ថា ជាប្រធានសន្តិសុខខណ្ឌព្រែកព្នៅ។
តំណាងពលរដ្ឋដែលទទួលបានដីកាកោះរបស់តុលាការ គឺអ្នកស្រី ប្រាក់ សុភា មានប្រសាសន៍នៅថ្ងៃសុក្រនេះថា ក្រោយទទួលបានដីកានេះ អ្នកស្រី និងប្រជាសហគមន៍ មានការឈឺចាប់ និងខកចិត្ត ចំពោះអាជ្ញាធរកាន់តែខ្លាំង ដែលមិនព្រមដោះស្រាយដីធ្លីជូនពលរដ្ឋហើយ ហើយបានប្តឹងតំណាងពលរដ្ឋទៅតុលាការយ៉ាងអយុត្តិធម៌ថែមទៀត។
អ្នកស្រី ប្រាក់ សុភា ចាត់ទុកករណីតុលាការកោះហៅតំណាងពលរដ្ឋនេះថា ជាការគំរាមកំហែង និងបំបាក់ស្មារតី មិនឱ្យប្រជាពលរដ្ឋហ៊ានចេញតវ៉ារឿងដីធ្លីបន្តទៅទៀត។
អ្នកស្រីបន្ថែមថា៖ «ខ្ញុំឈឺចាប់ខ្លាំងណាស់ ខ្ញុំតវ៉ាទាមទារឱ្យមានការដោះស្រាយដីផ្ទះ ចុះហេតុអីបានជាអាជ្ញាធរខណ្ឌបែរជាដាក់គំនាបដោយយកប្រព័ន្ធតុលាការគាបសង្កត់ពួកខ្ញុំអីចឹង។ អីចឹងវាជារឿងអយុត្តិធម៌មួយសម្រាប់ពួកខ្ញុំ ១០៨ខ្នងផ្ទះណាស់»។
តំណាងពលរដ្ឋម្នាក់ទៀត អ្នកស្រី ផន សុខុម ឱ្យដឹងថា តំណាងពលរដ្ឋនឹងចូលទៅបំភ្លឺតាមដីកាកោះរបស់តុលាការ ដោយថា ពួកគាត់មិនបានធ្វើអ្វីខុសដូចការចោទប្រកាន់របស់អាជ្ញាធរនោះទេ។ អ្នកស្រីបន្តថា ពលរដ្ឋគ្រាន់តែទាមទារសិទ្ធិដីធ្លីដែលគាត់បានរស់នៅ និងអាស្រ័យផលតាំងពីឆ្នាំ១៩៩០មកតែប៉ុណ្ណោះ។
អ្នកស្រីបន្ថែមថា៖ «វាអយុត្តិធម៌ណាស់ ប្រជាពលរដ្ឋមិនបានទៅធ្វើអ្វីខុសដូចអាជ្ញាធរប្តឹងថា ញុះញង់ ឬបង្កើតសកម្មភាពអនាធិបតេយ្យតាមដងផ្លូវសាធារណៈទេ។ ប្រជាពលរដ្ឋតវ៉ាដោយសន្តិវិធី ដើម្បីទាមទារឱ្យអាជ្ញាធរពាក់ព័ន្ធដោះស្រាយដីធ្លីជូនពួកខ្ញុំតែប៉ុណ្ណោះ មិនគួរណាអាជ្ញាធរចោទពួកខ្ញុំថាតវ៉ាដោយខុសច្បាប់នោះទេ»។
វីអូឌី មិនអាចសុំការបញ្ជាក់ជុំវិញករណីនេះ ពីដើមបណ្តឹង លោក មាស សម្បូរ ដែលពលរដ្ឋប្រាប់ថា ជាប្រធានសន្តិសុខខណ្ឌព្រែកព្នៅនោះបានទេ នៅរសៀលថ្ងៃសុក្រនេះ។
មន្ត្រីសម្របសម្រួលគម្រោងធុរកិច្ច និងសិទ្ធិមនុស្ស នៅមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត មានប្រសាសន៍ថា អាជ្ញាធរតែងតែប្រើប្រាស់កម្លាំង និងប្រព័ន្ធតុលាការ ដើម្បីបង្ក្រាប និងបំបាក់ស្មារតីលើពលរដ្ឋ កុំឱ្យហ៊ានតវ៉ា ជាពិសេសពលរដ្ឋមានជម្លោះដីធ្លី។ លោកបន្តថា ទង្វើរបស់អាជ្ញាធរ គឺមិនអាចដោះស្រាយបញ្ហាចប់បានឡើយ ហើយទង្វើនេះ បានរំលោភសិទ្ធិពលរដ្ឋធ្ងន់ធ្ងរ ដែលធានាដោយច្បាប់ជាតិ និងអន្តរជាតិផងដែរ។
លោកបន្ថែមថា៖ «សិទិ្ធមានដីធ្លី និងសិទ្ធិមានលំនៅឋានសមរម្យរបស់ប្រជាពលរដ្ឋ ត្រូវបានយ៉ាងធ្ងន់ធ្ងរដោយកម្លាំងអាជ្ញាធរ និងប្រព័ន្ធតុលាការ។ យើងដឹងហើយថា ពលរដ្ឋមានទាមទារឱ្យមានដំណោះស្រាយឱ្យបានសមរម្យសម្រាប់ពួកគាត់ អាហ្នឹងជាសិទ្ធិដែលមានចែងនៅក្នុងរដ្ឋធម្មនុញ្ញ និងច្បាប់ពិសេសដទៃទៀត ក៏ដូចជាបទដ្ឋានកតិយុត្តិដែលប្រទេសយើងបានផ្តល់សច្ចាប័ន»។
អភិបាលខណ្ឌព្រែកព្នៅ លោក សុខ សម្បត្តិ ប្រាប់វីអូឌីកាលពីថ្ងៃទី២២ ខែមិថុនា ឆ្នាំ២០២២ ថាពលរដ្ឋទាំងនោះ បានរស់នៅលើចំណីផ្លូវលេខ១៣០ ដោយខុសច្បាប់ ដែលផ្លូវនេះ រដ្ឋាភិបាលមានគម្រោងពង្រីកឱ្យបាន៥០ម៉ែត្រ។ លោកថា អាជ្ញាធរមិនអាចឱ្យពលរដ្ឋទាំងនោះអភិវឌ្ឍន៍នៅនឹងកន្លែងបានឡើយ។
អភិបាលខណ្ឌរូបនេះបន្តថា កន្លងមក អាជ្ញាធរខណ្ឌ និងរដ្ឋបាលរាជធានីភ្នំពេញ បានសម្របសម្រួលដោះស្រាយជាច្រើនដងហើយ ដោយសុំដោះដូរដីឱ្យពលរដ្ឋទៅកន្លែងផ្សេងដែលរៀបចំដោយអាជ្ញាធរ ស្ថិតក្នុងភូមិសំរោងត្បូងដូចគ្នា និងចេញបណ្ណកម្មសិទ្ធិស្របច្បាប់ជូនពលរដ្ឋថែមទៀត ប៉ុន្តែពលរដ្ឋទាំងនោះមិនព្រមទទួលយកការដោះស្រាយនេះ ដែលធ្វើឱ្យការដោះស្រាយអូសបន្លាយយូរបែបនេះ។
កាលពីថ្ងៃទី១ខែកក្តដានេះ ប្រជាពលរដ្ឋ២៥០គ្រួសារ រស់នៅជាប់បឹងតាមោក ស្ថិតក្នុងសង្កាត់សំរោងត្បូង ខណ្ឌព្រែកព្នៅ រាជធានីភ្នំពេញ បានដាក់ញត្តិរកកិច្ចអន្តរាគមន៍ពីស្ថាប័នរដ្ឋចំនួន៣ រួមមាន ក្រសួងរៀបចំដែនដី នគរូបនីយកម្ម និងសំណង់ ទីស្តីការគណៈរដ្ឋមន្ត្រី និងរដ្ឋសភា ឱ្យជួយដោះស្រាយបញ្ហាដីធ្លីជូនពួកគាត់ ដោយថា ពួកគាត់បានរស់នៅបានជម្លោះតាំងពីឆ្នាំ១៩៩០៕
