រាជរដ្ឋាភិបាលកម្ពុជា បានសម្រេចកំណត់យកថ្ងៃទី១០ ខែកក្កដា ដើម្បីកាន់ទុក្ខ ចំពោះមរណភាពរបស់អតីតនាយករដ្ឋមន្ត្រីជប៉ុន លោក ស៊ិនហ្សូ អាបេ (Shinzo Abe) ដែលត្រូវបានខ្មាន់កាំភ្លើងបាញ់ប្រហារបណ្តាលឱ្យស្លាប់បាត់បង់ជីវិតកាលពីម្សិលមិញ។
លោកនាយករដ្ឋមន្ត្រី ហ៊ុន សែន បានថ្លែងសារពិសេសនៅថ្ងៃទី៩ ខែកក្កដានេះថា មរណភាពរបស់លោក អាបេ ស៊ិនហ្សូ មិនត្រឹមតែជាការបាត់បង់ប្រកបដោយភាពសោកស្តាយ តក់ស្លុត រន្ធត់ និងអាឡោះអាល័យសម្រាប់តែប្រជាពលរដ្ឋជប៉ុនប៉ុណ្ណោះ តែសម្រាប់ប្រជាពលរដ្ឋនៅលើពិភពលោក រួមទាំងប្រជាពលរដ្ឋកម្ពុជាផងដែរ។
លោកបន្តថា ក្នុងការកាន់តំណែងជានាយករដ្ឋមន្ត្រីជប៉ុនទាំងពីរលើក លោក អាបេ ស៊ិនហ្សូ បានប្រឹងប្រែងយ៉ាងខ្លាំងដល់ការជំរុញទំនាក់ទំនងរវាងជប៉ុន និងកម្ពុជា រហូតក្លាយទៅជាដៃគូយុទ្ធសាស្ត្រនៅឆ្នាំ២០១៣។ បន្ថែមពីលើនោះ លោក អាបេ ក៏បានជំរុញនូវការផ្តល់ជំនួយគាំទ្រដល់ការអភិវឌ្ឍគ្រប់វិស័យនៅកម្ពុជា ហេដ្ឋារចនាសម្ព័ន្ធ និងជំរុញដល់ទំនាក់ទំនងរវាងអាស៊ាន និងជប៉ុន រួមទាំងជំរុញដល់ទំនាក់ទំនងមេគង្គ-ជប៉ុនផងដែរ។
ករណីនេះកម្ពុជា សម្រេចឱ្យមានការកាន់មរណទុក្ខនៅទូទាំងប្រទេសមួយថ្ងៃ គឺនៅថ្ងៃអាទិត្យ ទី១០ ខែកក្កដា ឆ្នាំ២០២២ ដើម្បីជាការដឹងគុណអតីតនាយករដ្ឋមន្ត្រីជប៉ុន លោក អាបេ។
លោក ហ៊ុន សែន បន្ថែមថា៖ «ដើម្បីសម្តែងនូវការដឹងគុណចំពោះមនោសញ្ចេតនាការស្រឡាញ់ដ៏ស្មោះត្រង់របស់ឯកឧត្តម អាបេ ស៊ិនហ្សូ សម្តេចតេជោ បានសម្រេចឱ្យមានការកាន់មរណទុក្ខនៅទូទាំងប្រទេសមួយថ្ងៃ គឺនៅថ្ងៃអាទិត្យ ទី១០ ខែកក្កដា ឆ្នាំ២០២២»។
បន្ថែមពីនេះលោក ហ៊ុន សែន បានណែនាំដល់គណៈកម្មាធិការបុណ្យជាតិ និងអន្តរជាតិ ឱ្យយកចិត្តទុកដាក់រៀបចំការកាន់មរណទុក្ខនេះ ដោយតម្រូវឱ្យមានការបង្ហូតទង់ជាតិនៅពាក់កណ្តាលដង នៅតាមសាលារៀន និងតាមក្រសួង ស្ថាប័ននានារបស់ជាតិថែមទៀតផង។
នាយកប្រតិបត្តិអង្គការអភិវឌ្ឍន៍ផ្នត់គំនិត លោកបណ្ឌិត សេក សុជាតិ មានប្រសាសន៍គាំទ្រនឹងការសម្រេចរបស់រដ្ឋាភិបាលក្នុងការកំណត់យកថ្ងៃ១០កក្កដា ដើម្បីកាន់ទុក្ខ ចំពោះមរណភាពរបស់អតីតនាយករដ្ឋមន្ត្រីជប៉ុន ដោយសារអតីតនាយករដ្ឋមន្ត្រីរូបនោះធ្លាប់ជួយកម្ពុជាច្រើនក្នុងការអភិវឌ្ឍន៍កន្លងមក។ ប៉ុន្តែលោកថា ការកាន់ទុក្ខនេះ គួរតែមានការកំណត់ឱ្យមានការចូលរួមកាន់ទុក្ខស្មើភាពគ្នា ដូចករណីឃាតករបាញ់សម្លាប់លោកបណ្ឌិត កែម ឡី ដោយមិនមានការរឹតត្បិតជាដើម។
លោកមានប្រសាសន៍ថា៖ «ការកំណត់ថ្ងៃ១០កក្កដា ដើម្បីកាន់ទុក្ខអតីតនាយករដ្ឋមន្ត្រីជប៉ុន លោក ស៊ិនហ្ស អាបេ រដ្ឋាភិបាលអាចកំណត់នៅកន្លែងណាមួយបាន ប៉ុន្តែសង្គមស៊ីវិលដែលចង់រំលឹកខួបលោកបណ្ឌិតកែម ឡី គឺរដ្ឋាភិបាលគួរតែអនុញាតឱ្យមានការគោរពចំថ្ងៃហ្នឹងដែរ ប៉ុន្តែគាត់អាចធ្វើនៅកន្លែងណាដែលឃាតករបាញ់សម្លាប់លោកបណ្ឌិត កែម ឡី ឬក៏កន្លែងគេហដ្ឋារបស់លោក ឬក៏កន្លែងណាមួយដូចគ្នាដែរ»។
អតីតនាយករដ្ឋមន្ត្រីជប៉ុន លោក ស៊ិនហ្សូ អាបេ បានទទួលមរណភាពកាលពីរសៀលថ្ងៃទី៨ ខែកក្កដា ឆ្នាំ២០២២នេះ បន្ទាប់ពីឃាតកបានបាញ់ប្រហារទៅលើរូបលោក ក្នុងអំឡុងពេលលោកឈរថ្លែងសុន្ទរកថាមួយនៅក្នុងទីក្រុង Nara ភាគខាងលិចប្រទេសជប៉ុន កាលពីថ្ងៃទី៨ ខែដដែលនោះ។
បើតាមសារព័ត៌មានជប៉ុន NHK ឱ្យដឹងថា ភ្លាមៗក្រោយការបាញ់ប្រហារទៅលើ អតីតនាយករដ្ឋមន្រ្តីជប៉ុន កម្លាំងសមត្ថកិច្ចបានចាប់ខ្លួនបុរសម្នាក់ និងបានដកអាវុធចេញពីខ្លួនរបស់គេ។ ប្រភពដដែលថា បុរសនោះ មានអាយុ ៤១ឆ្នាំ និងមានឈ្មោះ តេស៊ូយ៉ា យ៉ាម៉ាហ្កាមី ប៉ុន្តែមូលហេតុពិតប្រាកដជុំវិញសំណុំរឿងឃាតកម្មទៅលើលោក ស៊ិនហ្សូ អាបេ នេះនៅមិនទាន់ត្រូវបានបញ្ជាក់ច្បាស់លាស់នៅឡើយ៕