ក្រសួងការងារ និងបណ្ដុះបណ្ដាលវិជ្ជាជីវៈ បានណែនាំពីការធ្វើយុទ្ធនាការផ្សព្វផ្សាយពីការអនុវត្តរបបសន្តិសុខសង្គមផ្នែកប្រាក់សោធន សម្រាប់បុគ្គលទាំងឡាយដែលស្ថិតក្រោមបទប្បញត្តិនៃច្បាប់ស្ដីពីការងារ។
ក្នុងសេចក្ដីណែនាំរបស់ក្រសួងការងារនៅថ្ងៃចន្ទនេះបានឱ្យដឹងថា យុទ្ធនាការផ្សព្វផ្សាយនេះមានរយៈពេល៩០ថ្ងៃ ចាប់ខែកក្កដា ដល់ដំណាច់ខែកញ្ញា ឆ្នាំពី២០២២ នៅតាមបណ្ដាតំបន់សេដ្ឋកិច្ចពិសេស សួនឧស្សហកម្ម រោងចក្រ សហគ្រាស គ្រឹះស្ថាន ទូទាំងរាជធានី ខេត្តក្រុង ស្រុក ខណ្ឌ។
ក្នុងសេចក្ដីណែនាំដដែលបន្ថែមថា ដើម្បីឱ្យការរៀបចំយុទ្ធនាការផ្សព្វផ្សាយនេះបានទូលំទូលាយនិងប្រកបដោយប្រសិទ្ធភាព ក្រសួងស្នើសុំដល់ម្ចាស់រោងចក្រ សហគ្រាស គ្រឹះស្ថាន ត្រូវផ្ដល់កិច្ចសហការផ្ដល់ទីកន្លែងរៀបចំកម្មករនិយោជិត។ លើសពីនេះ ត្រូវធានាថា កម្មករនិយោជិតរបស់ខ្លួនបានចូលរួមឈ្វេងយល់ពីកាតព្វកិច្ច និងផលប្រយោជន៍ពីរបបសន្តិសុខសង្គមផ្នែកប្រាក់សោធននេះ រយៈពេលយ៉ាងតិចចំនួន២ម៉ោងក្នុងមួយពេល។
នៅព្រឹកថ្ងៃទី១១ ខែកក្កដា ក្រសួងការងារក៏បានបើកកិច្ចប្រជុំអំពីការផ្សព្វផ្សាយនេះ ដោយមានការចូលរួមពីរដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ លោក អ៊ិត សំហេង ផងដែរ។ ថ្លែងក្នុងឱកាសនោះ រដ្ឋមន្ត្រីរូបនេះបានឱ្យដឹងថា របបប្រាក់សោធននេះ និយោជក និងកម្មករនិយោជិត ត្រូវមានកាតព្វកិច្ចដូចគ្នាក្នុងការអនុវត្តរបបនេះ តាមការកំណត់របស់ក្រុមប្រឹក្សាជាតិគាំពារសង្គម ក្នុងរយៈពេល៥ឆ្នាំដំបូង ហើយអត្រាបង់វិភាគទានមាន៤% ដែលភាគីនីមួយៗត្រូវបង់២%។
លោកបានថ្លែងថា៖ «កាតព្វកិច្ចរបស់យើងនៅក្នុងពេលចំពោះមុខ ប៉ុន្តែផលប្រយោជន៍របស់យើង គឺបានត្រលប់មកវិញ។ បើនិយាយពីកាតព្វកិច្ច ខ្ញុំនិយាយឡើងវិញ កាតព្វកិច្ចគឺនិយោជកបង់ ២% កម្មករនិយោជិតបង់ ២%»។
លោកបានបន្តថា ដំណើរការនិងការរៀបចំអនុវត្តរបបនេះមានលក្ខណៈពិសេស ទើបត្រូវមានយុទ្ធនាការផ្សព្វផ្សាយ ដើម្បីឱ្យកម្មករនិយោជិតទាំងអស់បានដឹងថា ខ្លួនត្រូវមានការបង់វិភាគទាន ប៉ុន្តែការចំណាយនេះនឹងទទួលបានផលមកវិញ ក្រោយអស់សមត្ថភាពបំពេញការងារ ឬដល់អាយុកំណត់ដោយច្បាប់ដែលត្រូវចូលនិវត្តន៍ នឹងទទួលបានប្រាក់សោធននេះ។
លោកបានបញ្ជាក់ទៀតថា នេះគឺជាដំណាក់កាលដ៏សំខាន់របស់វិស័យការងារនិងវិជ្ជាជីវៈ និងវិស័យរបបសន្តិសុខសង្គម បន្ទាប់ពីខិតខំប្រឹងប្រែងអស់រយៈពេលជាច្រើនដើម្បីរៀបចំប្រព័ន្ធសន្តិសុខសង្គមជាតិ។
រាជរដ្ឋាភិបាលបានសម្រេចកំណត់ផ្ដល់ប្រាក់សោធនឬប្រាក់ចូលនិវត្តន៍ សម្រាប់បុគ្គលទាំងឡាយណាដែលស្ថិតនៅក្រោមបទប្បញ្ញត្តិនៃច្បាប់ស្តីពីការងារ គឺសុទ្ធតែអាចមានសិទ្ធិទទួលបាននូវគោលការណ៍នេះដូចៗគ្នាចាប់ពីថ្ងៃទី១ ខែកក្កដា តទៅ៕