កូដករប្រមាណ១០០នាក់ នៅថ្ងៃអង្គារនេះ បានបន្តព្យាយាមទៅប្រមូលផ្ដុំធ្វើកូដកម្មនៅមុខក្រុមហ៊ុនកាស៊ីណូណាហ្គាវើលដ៍ ដើម្បីទាមទារឱ្យមានដំណោះស្រាយវិវាទការងារ ប៉ុន្តែត្រូវបានសមត្ថកិច្ចជាច្រើននាក់បន្តដាក់របាំងបិទកំណាត់ផ្លូវសុធារស ក្នុងខណ្ឌចំការមន រាជធានីភ្នំពេញ រារាំងមិនឱ្យពួកគាត់ដើរទៅមុខក្រុមហ៊ុនឡើយ។
ក្រុមកូដករណាហ្គាវើលដ៍ បានធ្វើដំណើរដោយថ្មើរជើងចេញពីទីតាំងដដែល គឺនៅលើដងវិថីសុធារស មុខផ្សារទំនើបអ៊ីអន១ ដោយចងក្រណាត់ខៀវនៅលើក្បាល និងក្នុងដៃមានកាន់បដា ហើយដើរឆ្ពោះទៅកាន់នាគបាញ់ទឹក ក្បែរទីតាំងក្រុមហ៊ុនល្បែងមួយនេះ ប៉ុន្តែត្រូវបានសមត្ថកិច្ចរារាំង។
កញ្ញា ចន្ទ ស្រីរ័ត្ន កូដករណាហ្គាវើលដ៍ បានលើកឡើងថា ការដែលពួកគាត់នាំគ្នាបន្តធ្វើកូដកម្មនេះ គឺដើម្បីទាមទារឱ្យក្រុមហ៊ុនទទួលយកបុគ្គលិកដែលត្រូវបានក្រុមហ៊ុនបញ្ឈប់ទាំងអយុត្តិធម៌ បានចូលធ្វើការវិញ។ កញ្ញាបន្តថា ពួកគាត់នឹងបន្តការតវ៉ាបែបនេះរហូតដល់មានដំណោះស្រាយ។
កញ្ញាថា៖ «ពួកខ្ញុំធ្វើកូដកម្មនេះ ដើម្បីរកដំណោះស្រាយពីថៅកែ [ក្រុមហ៊ុន] ណាហ្គាវើលដ៍ ព្រោះពួកខ្ញុំត្រូវថៅកែណាហ្គាវើលដ៍ហ្នឹងបណ្ដេញចេញទាំងអយុត្តិធម៌ ហើយរំលោភសិទ្ធិការងារ ហើយរំលោភសិទ្ធិសហជីព […] ចង់ឱ្យថៅកែណាហ្គាវើលដ៍ហ្នឹងគោរពច្បាប់ការងារ»។
កូដកររូបនេះបង្ហាញការសោកស្ដាយដែលសមត្ថកិច្ចចម្រុះបានដាក់កម្លាំងរាប់សិបនាក់រារាំងពួកគាត់មិនឱ្យទៅប្រមូលផ្ដុំដោយសន្តិវិធីនៅមុខក្រុមហ៊ុន។
កញ្ញាថា៖ «ខ្ញុំសោកស្ដាយលើពួកគាត់ ដែលពួកគាត់មានតួនាទីបម្រើរាស្ត្រ បម្រើប្រជាពលរដ្ឋ បែរជាគាត់យកតួនាទីនិងឯកសណ្ឋានរបស់គាត់យកទៅពាំងឱ្យថៅកែណាហ្គាវើលដ៍ ទាំងដែលថៅកែណាហ្គាវើលដ៍ហ្នឹងរំលោភច្បាប់ប្រទេសកម្ពុជា»។
ក្រៅពីការរារាំងកូដករ សមត្ថកិច្ចក៏មិនអនុញ្ញាតឱ្យតំណាងសហជីព និងអ្នកសារព័ត៌មាន ទៅឃ្លាំមើល និងយកព័ត៌មានជុំវិញការតវ៉ានេះដែរ។
ជុំវិញករណីវិវាទការងារនៅក្រុមហ៊ុនល្បែងណាហ្គាវើលដ៍នេះដែរ ប្រធានសហព័ន្ធសហជីពកម្ពុជា លោកស្រី យ៉ាង សុភ័ណ្ឌ ធ្លាប់បានព្រមានថា បើសិនជាមិនមានដំណោះស្រាយក្នុងរយៈពេល២ទៅ៣សប្តាហ៍ខាងមុខនេះទេ នោះសមាជិកសហព័ន្ធសហជីព អង្គការ-សមាគម និងសហជីពនៅតាមមូលដ្ឋាន នឹងសម្រេចចូលរួមជាមួយកូដករ ដើម្បីតវ៉ាដោយសន្តិវិធីក្នុងទ្រង់ទ្រាយធំ ដើម្បីទាមទារឱ្យមានដំណោះស្រាយ។
លោកស្រីថា៖ «បើសិនអាជ្ញាធរមិនដោះស្រាយ មិនជំរុញទៅក្រុមហ៊ុនឱ្យធ្វើការដោះស្រាយទេ វាមិនចំណេញដល់ពួកគាត់ទេ វារឹតតែបង្កនូវភាពមិនទុកចិត្តពីមហាជន ពីកូដករ ពីយើងខ្ញុំជាសហជីព ព្រោះយើងដឹងហើយថា ការបោះឆ្នោតជាតិនឹងមកដល់នៅឆ្នាំ២០២៣ខាងមុខ»។
គួរបញ្ជាក់ថា វិវាទការងារក្រុមហ៊ុន ណាហ្គាវើលដ៍ នេះបានកើតឡើងអស់រយៈពេលជាង១ឆ្នាំមកហើយ ក្រោយពេលដែលក្រុមហ៊ុននេះបានបញ្ឈប់បុគ្គលិកចំនួន១ ៣២៩នាក់ ក្នុងចំណោមបុគ្គលិកសរុបជាង៨ ០០០នាក់ពីការងារ ក្រោមហេតុផលថា ជួបវិបត្តិហិរញ្ញវត្ថុដោយសារតែបញ្ហាជំងឺកូវីដ-១៩។
ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ បានប្រាប់វីអូឌីក្នុងពេលថ្មីៗនេះថា ការជួបចរចាជាង១០ដង រវាងតំណាងកូដករ តំណាងសហជីព និងតំណាងក្រុមហ៊ុន ក្រោមការសម្របសម្រួលរបស់ក្រសួងការងារ ក្រោយកូដករចេញធ្វើកូដកម្មរយៈពេលជាង៦ខែមកនេះ គឺពុំមានលទ្ធផលជាផ្លែផ្កានៅឡើយ ទើបពួកគេសម្រេចចិត្តបន្តការតវ៉ា និងស្វែងរកការអន្តរាគមន៍ពីស្ថាប័នពាក់ព័ន្ធនានា រួមទាំងលោកនាយករដ្ឋមន្ត្រី ហ៊ុន សែន ដើម្បីទាមទារឱ្យមានដំណោះស្រាយ៕