ក្រសួងសុខាភិបាលបានប្រកាសពីការរកឃើញអ្នកឆ្លងកូវីដ-១៩ថ្មី ចំនួន១៤នាក់បន្ថែមទៀតកាលពីថ្ងៃម្សិលមិញ ខណៈអ្នកជំងឺ៨នាក់បានជាសះស្បើយ។
តាមសេចក្តីជូនដំណឹងរបស់ក្រសួងសុខាភិបាល ចុះថ្ងៃទី១៥ ខែកក្កដា ឆ្នាំ២០២២ បានឱ្យដឹងថា អ្នកដែលបានរកឃើញថាឆ្លងជំងឺកូវីដ-១៩ទាំង១៤នាក់នោះ ជាប្រភេទអូមីក្រុងទាំងអស់ ក្នុងនោះ អ្នកជំងឺ១០នាក់ជាករណីស្នើសុំវិញ្ញាបនបត្រចេញទៅក្រៅប្រទេស។
ចំណែកអ្នកជាសះស្បើយវិញ ក្រសួងថាមានចំនួន៨នាក់ និងមិនមានករណីស្លាប់នោះទេ។
បើតាមក្រសួងសុខាភិបាល គិតត្រឹមព្រឹកថ្ងៃសុក្រនេះ ករណីអ្នកឆ្លងកូវីដ-១៩នៅកម្ពុជាសរុប មានចំនួន១៣៦ ៤២១នាក់ ក្នុងនោះ អ្នកជាសះស្បើយមានចំនួន១៣៣ ២៧៥នាក់ និងករណីស្លាប់ស្ថិតនៅក្នុងតួលេខដដែលគឺ ៣ ០៥៦នាក់។
ពាក់ព័ន្ធនឹងករណីឆ្លងជំងឺកូវីដ-១៩នេះដែរ មន្ត្រីជាន់ខ្ពស់នៃក្រសួងសុខាភិបាល លោកស្រី ឱ វណ្ណឌីន បន្តអំពាវនាវដល់ប្រជាពលរដ្ឋឱ្យទៅទទួលវ៉ាក់សាំងទាំងដូសមូលដ្ឋាន និងដូសជំរុញ (ដូសទី៣ ទី៤ និងទី៥) ឱ្យបានគ្រប់គ្នា ខណៈពេលដែលវីរុសអូមីក្រុងបំប្លែងថ្មីកំពុងចរាចរលើសកលលោក ក្នុងតំបន់ និងនៅប្រទេសកម្ពុជា៕
