យោងតាមការជូនដំណឹងមួយរបស់រដ្ឋាភិបាលស្រីលង្កា ដែលបានចេញផ្សាយកាលពីល្ងាចថ្ងៃអាទិត្យម្សិលមិញនេះ បានឱ្យដឹងថា ប្រធានាធិបតីស្តីទី លោក Ranil Wickremesinghe បានប្រកាសដាក់ប្រទេសក្នុងគ្រាអាសន្ន (State of emergency) ខណៈរដ្ឋបាលរបស់លោក ព្យាយាមលុបបំបាត់ភាពចលាចលក្នុងសង្គម និងដោះស្រាយវិបត្តិសេដ្ឋកិច្ចធ្ងន់ធ្ងរ ដែលកំពុងតែកើតឡើងនៅក្នុងប្រទេស។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
សេចក្តីជូនដំណឹងនោះ បានបន្ថែមថា៖ «វាគឺជាការចាំបាច់ដែលត្រូវធ្វើ [ដាក់ប្រទេសក្នុងគ្រាអាសន្ន] ដើម្បីផលប្រយោជន៍សន្តិសុខសាធារណៈ ការការពារសណ្តាប់ធ្នាប់សាធារណៈ និងការរក្សាឱ្យបាននូវការផ្គត់ផ្គង់ និងសេវាកម្មចាំបាច់សម្រាប់ប្រជាពលរដ្ឋ»។
គួរបញ្ជាក់ថា លោកប្រធានាធិបតី ហ្កូតាបាយ៉ា រ៉ាចាប៉ាកសា (Gotabaya Rajapaksa) បានដាក់លិខិតលាលែងពីតំណែងជាប្រធានាធិបតីស្រីលង្កា កាលពីថ្ងៃព្រហស្បតិ៍សប្ដាហ៍មុន បន្ទាប់ពីបានភៀសខ្លួនទៅកាន់ប្រទេសសិង្ហបុរី។
ទាក់ទិននឹងករណីនេះ សភារបស់ប្រទេសស្រីលង្កា កាលពីថ្ងៃសៅរ៍កន្លងទៅ ក៏បានជួបប្រជុំគ្នា ដើម្បីចាប់ផ្តើមដំណើរការបោះឆ្នោតជ្រើសរើសក្បាលម៉ាស៊ីនដឹកនាំប្រទេសថ្មីមួយ ដែលក្នុងនោះ លោក Ranil Wickremesinghe ដែលរងនូវការរិះគន់ខ្លាំងពីពលរដ្ឋ ក៏ជាបេក្ខភាពកំពូលមួយរូបក្នុងការប្រកួតប្រជែងតំណែងជាប្រធានាធិបតីពេញសិទ្ធិផងដែរ។
ប្រទេសស្រីលង្កា ក្នុងរយៈពេលចុងក្រោយនេះ បានទទួលរងនូវវិបត្តិសេដ្ឋកិច្ចដ៏អាក្រក់បំផុតមួយ ដែលមិនធ្លាប់កើតមានពីមុនមក ខណៈទុនបម្រុងអន្តរជាតិរបស់ប្រទេស ក៏ស្ថិតក្នុងកម្រិតទាបបំផុតផងដែរ ដែលបានបង្កឱ្យប្រទេសមួយនេះជួបប្រទះបញ្ហាកង្វះថវិកាធ្ងន់ធ្ងរ សម្រាប់ការនាំចូលអាហារ ឱសថ និងប្រេងឥន្ធនៈជាដើម៕