អាជ្ញាធរជាតិអប្សរា បានប្រាប់ប្រជាពលរដ្ឋឱ្យរុះរើដំបូលផ្ទះបាយ ខ្ទម និងសំណង់បន្ថែមផ្សេងទៀតដែលពួកគាត់បានសាងសង់ដោយគ្មានការអនុញ្ញាតក្នុងតំបន់ឧទ្យានបុរាណអង្គរ ដែលអ្នកខ្លះមានពេលតែពីរថ្ងៃប៉ុណ្ណោះក្នុងការរុះរើឱ្យរួចរាល់។
មន្ត្រីនៃសមាគមការពារសិទ្ធិមនុស្សអាដហុក ទទួលបន្ទុកផ្នែកជម្លោះដីធ្លី លោក សួស ណារិន បានឱ្យដឹងថា ប្រជាពលរដ្ឋប្រមាណ៣០០នាក់ដែលរស់នៅចម្ងាយ៣-៤គីឡូម៉ែត្រពីប្រាសាទអង្គរវត្ត រងផលប៉ះពាល់ពីការជូនដំណឹងរបស់អាជ្ញាធរអប្សរា។ លោកបានលើកឡើងថា មិនចាំបាច់ចាត់វិធានការតឹងរ៉ឹងចំពោះប្រជាពលរដ្ឋដែលរស់នៅឆ្ងាយល្មមពីប្រាសាទឡើយ។
អ្នកស្រី អ៊ឹង ចាន់លី អាយុ៥២ឆ្នាំ ជាអ្នកលក់ឧស បាននិយាយថា ដំបូងឡើយ គេតម្រូវឱ្យអ្នកស្រីរុះរើចេញត្រឹមថ្ងៃទី១៤ ខែកក្កដា នូវសំណង់តូចៗមួយចំនួននៅលើដីរបស់អ្នកស្រី។ អ្នកស្រីបានបន្ថែមទៀតថា រហូតដល់ផុតកំណត់នៃរយៈពេលដែលអាជ្ញាធរបានកំណត់ អ្នកស្រីមិនបានរុះរើចេញឡើយ ហើយឥឡូវនេះ ឆ្មាំអង្គរបានស្នើឱ្យមន្ត្រីមករុះរើសំណង់គ្មានការអនុញ្ញាតនៅថ្ងៃពុធនេះ រួមទាំងកន្លែងស្នាក់នៅរបស់កូនអ្នកស្រីផងដែរ។
អ្នកស្រី ចាន់លី បានថ្លែងថា៖ «ខ្ញុំមិនបានសង់នៅលើចំណីផ្លូវទេ។ ខ្ញុំសង់លើដីផ្ទាល់ខ្លួនតែប៉ុណ្ណោះ»។
អ្នកស្រីបន្ថែមទៀតថា អ្នកស្រីមានប្លង់ទន់សម្គាល់ដីនេះតាំងពីឆ្នាំ២០១៥មកម៉្លេះ។
អ្នកស្រី គង់ ចាន់នី អាយុ៤២ឆ្នាំ បាននិយាយថា អ្នកស្រីទទួលដំណឹងឱ្យរុះរើសំណង់ដែលអ្នកស្រីសង់បន្ថែមប្រវែង៣ម៉ែត្រ រួមទាំងផ្ទះបាយ កាលពីថ្ងៃទី២៧ ខែមិថុនា។ ទោះជាយ៉ាងណា អ្នកស្រីបាននិយាយថា អ្នកស្រីបានចរចាជាមួយអាជ្ញាធរ ដើម្បីរក្សាទុកសំណង់នោះ។
អ្នកនាំពាក្យអាជ្ញាធរជាតិអប្សរា លោក ឡុង កុសល មានប្រសាសន៍ថា ប្រជាពលរដ្ឋប្រមាណ ៦០% បានយល់ព្រមចំពោះគម្រោងរុះរើសំណង់គ្មានការអនុញ្ញាត ហើយប្រជាពលរដ្ឋប្រមាណ ២០% មិនយល់ព្រម។ លោកបន្ថែមថា លោកមិនប្រាកដអំពីប្រជាពលរដ្ឋ ២០% ទៀតឡើយ។
លោកបន្តទៀតថា៖ «យើងកំពុងសម្របសម្រួលជាមួយអាជ្ញាធរមូលដ្ឋាន ដើម្បីរុះរើសំណង់ទាំងនោះ។ យើងមិនមែនតម្រូវឱ្យរុះរើសំណង់អគារធំៗឡើយ គឺតម្រូវឱ្យរុះរើតែតូបតូចៗដែលមិនមានការអនុញ្ញាតប៉ុណ្ណោះ»។
លោកបន្ថែមទៀតថា សំណង់គ្មានការអនុញ្ញាតឱ្យសាងសង់នឹងប៉ះពាល់ដល់បរិស្ថានប្រាសាទ លុះត្រាតែអាជ្ញាធរចាត់វិធានការ ប៉ុន្តែលោកមិនបានបញ្ជាក់ថាតើមានពេលកំណត់សម្រាប់ប្រជាពលរដ្ឋឱ្យរុះរើសំណង់ទាំងនោះដោយស្ម័គ្រចិត្តឡើយ ដែលបន្ទាប់ពីផុតកំណត់នៃរយៈពេលដែលបានកំណត់នោះ អាជ្ញាធរនឹងចាត់វិធានការដោយបង្ខំ។
លោកបន្តថា៖ «សំណង់ទាំងនោះប៉ះពាល់បរិស្ថានរមណីយដ្ឋាននេះ។ យើងត្រូវបង្ការទុកជាមុន។ ប្រសិនបើយើងមិនបញ្ឈប់ទេ ពួកគាត់នឹងសាងសង់បន្ថែមកាន់តែច្រើនឡើង»៕
បកប្រែនិងសម្រួលដោយលោក លី សេងហន ចេញពីអត្ថបទដើមភាសាអង់គ្លេស៖ Angkor Park Residents Told to Remove Unapproved Constructions