បុរសជនជាតិចិន៩នាក់ត្រូវបានសាលាដំបូងរាជធានីភ្នំពេញបើកសវនាការជំនុំជម្រះកាលពីថ្ងៃចន្ទ ទី១៨ ខែកក្កដា ពីបទជួញដូរគ្រឿងញៀនឆ្លងដែនទៅកាន់ប្រទេសអូស្ត្រាលី (Australia) និងនូវែលសេឡង់ (New Zealand)។
ចៅក្រម ញឹម ពិសាល បានប្រាប់តុលាការថា បុរសទាំងនោះត្រូវបានចាប់ខ្លួនកាលពីឆ្នាំមុន នៅរាជធានីភ្នំពេញ បន្ទាប់ពីមានការសម្របសម្រួលរវាងនគរបាលកម្ពុជា និងនគរបាលចិន។
យោងតាមតុលាការ មនុស្សជាច្រើននាក់ទៀតក៏ត្រូវបានចាប់ខ្លួនក្នុងប្រទេសចិន ក្នុងករណីជួញដូរគ្រឿងញៀនឆ្លងដែនផងដែរ។
លោកបន្តថា ការឆ្មក់ចូលចាប់ខ្លួនត្រូវបានធ្វើឡើងនៅទីតាំងពីរផ្សេងគ្នា ក្នុងបុរី «ប៉េងហួតបឹងស្នោ» ក្នុងសង្កាត់និរោធ ខណ្ឌច្បារអំពៅ និងនៅភោជនីយដ្ឋានមួយកន្លែងក្នុងសង្កាត់បឹងព្រលិត ខណ្ឌ៧មករា។ ជនសង្ស័យជាជនជាតិចិនទាំងនោះ រួមមាន ឈ្មោះ លូ វៃឆេង (Liu Wei Cheng), ឆេង ហ្ស៊ីឃ័ន (Chen Zhiquan), វ៉ាង លី (Wang Lei), ស៊ុន លាង (Sun Liang), ហ័ងរូមីង (Huang Rui Ming), ស៊ុនហៃតៅ (Sun Hai Tao), លីយីណាំ (Li Yi Nam), វ៉ាងយូ (Wang Yue) និង ហ៊្សូហ្សៅហ្វី (Zhu Xiao Fei)។
លោកបន្ថែមថា បុរសទាំងនោះបានវេចខ្ចប់គ្រឿងញៀនដាក់ក្នុងបំពង់ដែករាងបួនជ្រុងទ្រវែង ហើយគ្រោងនឹងនាំចេញទៅកាន់ប្រទេសអូស្ត្រាលី និងនូវែលសេឡង់។
សមត្ថកិច្ចបានរឹបអូសគ្រឿងញៀនប្រភេទមេតំហ្វេតាមីន ចំនួន៣៤៧,៤គីឡូក្រាម ព្រមទាំងជញ្ជីងចំនួន២ និងឧបករណ៍ផ្សេងទៀតដែលប្រើប្រាស់សម្រាប់វេចខ្ចប់គ្រឿងញៀនផងដែរ។ អ្នកទាំង៩នាក់នោះត្រូវចោទប្រកាន់ពីបទ «ជួញដូរគ្រឿងញៀន និងការសម្អាតប្រាក់»។
ជនជាប់ចោទ៦នាក់ក្នុងចំណោមជនជាប់ចោទទាំង៩នាក់ ត្រូវបានសាកសួរនៅក្នុងសវនាការពេលព្រឹក ដោយពួកគេភាគច្រើនបដិសេធថាមិនស្គាល់គ្នា ឬមិនដឹងអ្វីឡើយអំពីគ្រឿងញៀននោះ។
វ៉ាងលី (Wang Lei) ដែលត្រូវបានសាកសួរដំបូងគេ បានស្នើសុំមេធាវីម្នាក់ទៀតបន្ថែមពីលើមេធាវីដែលបានចាត់តាំងដោយតុលាការ ប៉ុន្តែសំណើនេះត្រូវបានបដិសេធ ព្រោះវាមានរយៈពេលជាច្រើនខែមកហើយ ចាប់តាំងពីសំណុំរឿងនេះត្រូវបានយកមកជំនុំជម្រះ។
លោក វ៉ាងលី បានប្រាប់តុលាការថា លោកបានមកដល់ប្រទេសកម្ពុជា កាលពីខែវិច្ឆិកាឆ្នាំមុន ហើយបានចូលរួមក្នុងការវេចខ្ចប់គ្រឿងញៀនតែម្តងប៉ុណ្ណោះ ក្រោយពីគេសន្យាថានឹងផ្តល់ប្រាក់ឱ្យលោកចំនួន១០ ០០០ដុល្លារសម្រាប់ការងារនេះ។ លោកក៏បានសារភាពថា កន្លងមក លោកធ្លាប់បរិភោគអាហារជាមួយជនជាប់ចោទម្នាក់ទៀត។
ទោះជាយ៉ាងណា លោកបានបដិសេធថា លោកមិនដឹងអំពីការវេចខ្ចប់គ្រឿងញៀននោះឡើយ។
ជនជាប់ចោទម្នាក់ទៀតឈ្មោះ វ៉ាងយូ (Wang Yue) បានធ្វើសក្ខីកម្មដោយបញ្ជាក់ថា លោកក៏ទទួលបានប្រាក់ចំនួន១០ ០០០ដុល្លារ ប៉ុន្តែមិនបានដឹងអំពីការវេចខ្ចប់គ្រឿងញៀនទេ។
ទន្ទឹមនឹងនោះ លោក ឆេង ហ្ស៊ីឃ័ន (Chen Zhiquan) បាននិយាយថា លោកគ្រាន់តែជាបុគ្គលិកអនាម័យតែប៉ុណ្ណោះ ហើយលោកមិនដឹងអ្វីឡើយអំពីការជួញដូរគ្រឿងញៀន។ លោកក៏មិនបានជួយក្នុងការដឹកជញ្ជូន ឬវេចខ្ចប់គ្រឿងញៀនដែរ។ លោកបាននៅក្នុងប្រទេសកម្ពុជាតែ១០ថ្ងៃប៉ុណ្ណោះ មុនពេលចាប់ខ្លួន ក្រោយពីគេសន្យាជាមួយលោកថានឹងផ្តល់ប្រាក់ចន្លោះពី២ ០០០ ទៅ២ ៥០០ដុល្លារក្នុងមួយខែសម្រាប់ការងារនោះ។
យ៉ាងណាមិញ ចៅក្រមប្រឹក្សាម្នាក់បានកត់សម្គាល់ថា ជាធម្មតា បុគ្គលិកអនាម័យម្នាក់នៅ
កម្ពុជាទទួលបានប្រាក់ខែច្រើនបំផុត២០០ដុល្លារក្នុងមួយខែ៕
បកប្រែនិងសម្រួលដោយលោក លី សេងហន ចេញពីអត្ថបទដើមភាសាអង់គ្លេស៖ Nine Chinese Stand Trial for Drug Trafficking to Australia
