សហគមន៍ជនជាតិដើមភាគតិចកួយនៅខេត្តព្រះវិហារ ជំរុញទៅអាជ្ញាធរពាក់ព័ន្ធពង្រឹងការអនុវត្តច្បាប់ឱ្យមានតម្លាភាពទៅលើក្រុមជនល្មើស និងឈ្មួញ ដែលគប់គិតគ្នាកាប់បំផ្លាញព្រៃឈើតំបន់អភិរក្ស ស្របពេលពួកគាត់រកឃើញបទល្មើសនៅ «តំបន់ព្រៃព្រះរការ» កើតមានជិត៣០០ករណីបន្ថែមទៀត។
ក្នុងសេចក្ដីប្រកាសព័ត៌មានរបស់សហគមន៍ជនជាតិដើមភាគតិចកួយ ភូមិប្រមេរ ឃុំប្រមេរ ស្រុកត្បែងមានជ័យ ខេត្តព្រះវិហារ ស្ដីពីការរកឃើញបទល្មើសព្រៃឈើ បានឱ្យដឹងកាលពីម្សិលមិញថា ប្រជាសហគមន៍បានប្រទះឃើញនូវបទល្មើសកាប់បំផ្លាញព្រៃឈើចំនួន២៦០ករណី និង៣៦៧ក្ដារបន្ទះ អំឡុងពួកគេចុះល្បាតក្នុងតំបន់ព្រៃព្រះរការ ៣ថ្ងៃប៉ុណ្ណោះ ពោលគឺចាប់ពីថ្ងៃទី១៥ ដល់ថ្ងៃទី១៧ ខែកក្កដា។
វត្ថុតាងដែលប្រជាសហគមន៍ប្រមូលបាននៅដែនជម្រកសត្វព្រៃព្រះរការនោះ រួមមាន ដែកឆាបចំនួន១២ដើម ប្រេងម៉ាស៊ូត សាំង និងឈើដែលត្រូវរងការកាប់បំផ្លាញមានមុខកាត់ចាប់ពី៣០សង់ទីម៉ែត្រ ដល់១៥០សង់ទីម៉ែត្រ ដែលជាប្រភេទឈើគគីរ ពពេល ផ្ដៀក កកោះ និងឈើទាល ឬជាឈើដែលសហគមន៍ទាញអនុផលជ័រច្បោះ។
សេចក្ដីប្រកាសដដែលបញ្ជាក់ថា ការកើនឡើងនូវបទល្មើសព្រៃឈើជារៀងរាល់ថ្ងៃនេះ បានឆ្លុះបញ្ចាំងឱ្យឃើញពីកង្វះសមត្ថភាព និងឆន្ទៈក្នុងការការពារព្រៃឈើ ធនធានធម្មជាតិ ពីសំណាក់ក្រសួងបរិស្ថាន និងអាជ្ញាធរពាក់ព័ន្ធ ដែលវាបានបង្កផលប៉ះពាល់យ៉ាងធ្ងន់ធ្ងរមកលើជីវភាពរស់នៅរបស់ប្រជាពលរដ្ឋប្រកបរបរដងជ័រច្បោះ ក៏ដូចជាបរិស្ថាន និងទំនៀមទម្លាប់របស់សហគមន៍ជនជាតិដើមភាគតិចកួយ ជាដើម។
ករណីនេះ សហគមន៍ជនជាតិដើមភាគតិចកួយនៅខេត្តព្រះវិហារ ជំរុញទៅអាជ្ញាធរមូលដ្ឋាន និងក្រសួងបរិស្ថាន ពង្រឹងការអនុវត្តច្បាប់ឱ្យមានតម្លាភាពទៅលើជនល្មើស និងឈ្មួញ ដែលគប់គិតគ្នាកាប់បំផ្លាញព្រៃឈើ ធ្វើឱ្យប៉ះពាល់ដល់ជីវភាពប្រជាសហគមន៍ ដើម្បីទប់ស្កាត់បទល្មើសព្រៃឈើឱ្យមានប្រសិទ្ធភាពខ្ពស់ ។
សេចក្ដីប្រកាសព័ត៌មានបញ្ជាក់ថា៖ «ពង្រឹងការអនុវត្តច្បាប់របស់មន្ត្រីមូលដ្ឋានប្រកបដោយប្រសិទ្ធភាព តម្លាភាព និងការទទួលខុសត្រូវ។ បង្កើតយន្តការតាមដានការអនុវត្តច្បាប់របស់មន្ត្រីមូលដ្ឋាន និងដាក់ទោសទណ្ឌបើសិនរកឃើញថាជាប់ពាក់ព័ន្ធនឹងការស៊ីសំណូកជាមួយឈ្មួញខិលខូច»។
ប្រភពដដែលក៏អំពាវនាវទៅអាជ្ញាធរពាក់ព័ន្ធបញ្ឈប់ការរារាំងសិទ្ធិសេរីភាពក្នុងការចូលរួមចំណែកការពារព្រៃឈើ ធនធានធម្មជាតិរបស់ប្រជាពលរដ្ឋមូលដ្ឋាន ជនជាតិដើមភាគតិច និងសាធារណជន ដូចមានចែងក្នុងច្បាប់ស្ដីពីតំបន់ការពារធម្មជាតិ មាត្រា២១ និង២៩ និងរដ្ឋធម្មនុញ្ញ មាត្រា៣៥។ លើសពីនេះ បើកទូលាយនិងបង្កបរិយាកាសល្អដល់អង្គការសង្គមស៊ីវិល សាធារណជន សហគមន៍មូលដ្ឋាន ក្នុងការរួមចំណែកធ្វើសកម្មភាពដើម្បីការពារ ថែរក្សា និងអភិរក្សព្រៃឈើ ធនធានធម្មជាតិ ដែលជាសម្បត្តិរួម។
វីអូឌី មិនអាចសុំការបំភ្លឺពីអ្នកនាំពាក្យក្រសួងបរិស្ថាន លោក នេត ភក្រ្តា បានទេ នៅថ្ងៃអង្គារម្សិលមិញនេះ។
ប្រធានកម្មវិធីផ្នែកស្រាវជ្រាវ និងតស៊ូមតិ នៃសមាគមបណ្ដាញយុវជនកម្ពុជា លោក ហេង គឹមហុង មានប្រសាសន៍ថា បទល្មើសព្រៃឈើដែលជនជាតិដើមភាគតិចកួយរកឃើញនោះ បានក្លាយជាការព្រួយបារម្ភបន្ថែមថ្មីមួយទៀតដល់ការគំរាមកំហែងទៅដល់អត្តសញ្ញាណនិងជំនឿសាសនារបស់ប្រជាជនជនជាតិដើមភាគតិច។
ករណីនេះ លោក ហេង គឹមហុង ស្នើទៅអាជ្ញាធរពាក់ព័ន្ធពង្រឹងការអនុវត្តច្បាប់ឱ្យបានតឹងរ៉ឹងទៅលើជនល្មើស ដើម្បីកាត់បន្ថយកុំឱ្យមានបទល្មើសបែបនេះកើតឡើងបន្តទៀត។
លោកស្នើដូច្នេះថា៖ «ក្រសួងបរិស្ថាន ក៏ដូចជារាជរដ្ឋាភិបាលកម្ពុជា ត្រូវពិនិត្យឡើងវិញលើប្រសិទ្ធភាពនៃការអនុវត្តច្បាប់ឱ្យបានម៉ឺងម៉ាត់ចំពោះជនទាំងឡាយណាដែលជាអ្នកប្រព្រឹត្តបទល្មើស»។
ក្នុងទិវាបរិស្ថានពិភពលោក ឆ្នាំ២០២២ ចេញផ្សាយនាថ្ងៃទី២ ខែមិថុនា ឆ្នាំ២០២២ ក្រោមមូលបទស្តីពី «លើកកម្ពស់ការចូលរួមការពារបរិស្ថាន ដើម្បីចីរភាពធនធានធម្មជាតិ និងសុខុមាលភាពមនុស្សជាតិ» ក្រុមយុវជន សហគមន៍ សហជីព សមាគម និងអង្គការមិនមែនរដ្ឋាភិបាល ចំនួន២៧ស្ថាប័ន បានធ្វើសេចក្ដីថ្លែងការណ៍រួមថា បើទោះបីជារដ្ឋាភិបាលបានខិតខំបង្កើននូវចំនួនតំបន់ការពារធនធានធម្មជាតិក្ដី ប៉ុន្តែវាពុំបានឆ្លើយតបជាមួយការកើនឡើងនូវសកម្មភាពកាប់បំផ្លាញនិងឈូសឆាយដីព្រៃជាច្រើនហិកតា រួមទាំងនៅក្នុងដែនជម្រកសត្វព្រៃ និងតំបន់ដទៃទៀត ជារៀងរាល់ថ្ងៃនោះទេ។
អង្គការលើកលែងទោសអន្តរជាតិ (Amnesty International) កាលពីថ្ងៃទី២៨ ខែមករា ឆ្នាំ២០២២ បានចេញរបាយការណ៍ដោយបង្ហាញថា ក្នុងឆ្នាំ២០២១ ព្រៃឈើជាង៦ ០០០ហិកតា នៅតំបន់ជម្រកសត្វព្រៃ«ព្រៃឡង់» និង«ព្រៃព្រះរការ» ត្រូវបានកាប់បំផ្លាញ ដោយមានការទទួលសំណូក និងការប្រព្រឹត្តអំពើពុករលួយរបស់អាជ្ញាធរពាក់ព័ន្ធ។
ទំហំនៃការបាត់បង់ផ្ទៃដីព្រៃឈើនៅតំបន់ការពារទាំងពីរនេះ អង្គការលើកលែងទោសអន្តរជាតិ អះអាងថា មានទំហំស្មើនឹងទីលានឬតារាងបាល់ទាត់ចំនួនជិត១ម៉ឺនទីតាំង (៨ ៧៨៤)។
រាជរដ្ឋាភិបាលបានដាក់បញ្ចូលព្រៃព្រះរការ ជាដែនជម្រកសត្វព្រៃ កាលពីឆ្នាំ២០១៦។ ព្រៃអភិរក្សមួយនេះមានទំហំ៩៦ ០០០ហិកតា គ្របដណ្ដប់លើភូមិសាស្ត្រប្រជុំស្រុកចំនួន៣ រួមមាន ស្រុកជាំក្សាន្ត ស្រុកត្បែងមានជ័យ និងស្រុកឆែប ខេត្តព្រះវិហារ៕