តុលាការសាលាដំបូងខេត្តកោះកុង ផ្ដន្ទាទោសតំណាងពលរដ្ឋម្នាក់ឱ្យជាប់ពន្ធនាគារ១ឆ្នាំ និងពិន័យជាប្រាក់២លានរៀល ពាក់ព័ន្ធជម្លោះដីធ្លីរវាងពលរដ្ឋ ជាមួយឧកញ៉ា ហេង ហ៊ុយ។
កាលពីថ្ងៃទី១០ ខែឧសភា ឆ្នាំ២០២២ ព្រះរាជអាជ្ញារងអមសាលាដំបូងខេត្តកោះកុង លោក អេង ចាន់តារា បានកោះហៅអ្នកស្រី ដេត ហួរ តំណាងពលរដ្ឋសហគមន៍១៩៧ នៅភូមិតានី ឃុំជីខលើ ស្រុកស្រែអំបិល ឱ្យចូលសវនាការនៅថ្ងៃទី១៤ ខែមិថុនា ឆ្នាំ២០២២ ក្រោមបទចោទ «បរិហារបង្កាច់កេរ្តិ៍ និងបរិហារកេរិ៍្តជាសាធារណៈ» តាមមាត្រា៣១១ មាត្រា៣១២ និងមាត្រា៣០៥ នៃក្រមព្រហ្មទណ្ឌ ទៅតាមបណ្ដឹងចោទប្រកាន់របស់ឧកញ៉ា ហេង ហ៊ុយ និងបានប្រកាសសាលក្រមនៅថ្ងៃទី២០ ខែកក្កដានេះ។
អ្នកស្រី ដេត ហួរ តំណាងពលរដ្ឋសហគមន៍១៩៧ នៅភូមិតានី ឃុំជីខលើ ប្រាប់វីអូឌីថា នៅថ្ងៃពុធនេះ តុលាការបានសម្រេចផ្ដន្ទាទោសអ្នកស្រីឱ្យជាប់ពន្ធនាគាររយៈពេល១ឆ្នាំ និងពិន័យជាប្រាក់ចំនួន២លានរៀល។ អ្នកស្រីចាត់ទុកការសម្រេចរបស់តុលាការនេះថា ជារឿងអយុត្តិធម៌សម្រាប់អ្នកស្រី ខណៈអ្នកស្រីមិនបានប្រព្រឹត្តដូចការចោទប្រកាន់របស់លោក ហេង ហ៊ុយ នោះទេ។ អ្នកស្រីថា នឹងប្ដឹងជំទាស់ការសម្រេចរបស់តុលាការជាន់ទាបនេះ ទៅសាលាឧទ្ធរណ៍បន្តទៀតនៅអំឡុងខែកក្កដានេះ។
តំណាងពលរដ្ឋរូបនេះបន្តថា លោក ហេង ហ៊ុយ ដែលជាម្ចាស់ក្រុមហ៊ុន «ហេង ហ៊ុយ អាគ្រីខាល់ឈ័រគ្រុប» បានគប់គិតគ្នាជាមួយអាជ្ញាធរ ក្លែងឯកសាររំលោភយកដីធ្លីរបស់ប្រជាពលរដ្ឋចំនួន១៩៧គ្រួសារ នៅភូមិតានី ឃុំជីខលើ ស្រុកស្រែអំបិល ខេត្តកោះកុង តាំងពីឆ្នាំ២០០៧ និងបានប្តឹងតំណាងពលរដ្ឋទៅតុលាការយ៉ាងអយុត្តិធម៌ថែមទៀត ក្រោយពួកគាត់នាំគ្នាតវ៉ានិងប្តឹងករណីនេះទៅក្រសួងមហាផ្ទៃឱ្យជួយដោះស្រាយ។
អ្នកស្រីបន្ថែមថា៖ «តុលាការប្រកាសសាលក្រមខ្ញុំនៅថ្ងៃនេះ។ ខ្ញុំឈឺចាប់ជាទីបំផុត ដែលលោកតុលាការគាត់ជឿទៅតាមលោក ហេង ហ៊ុយ ខណៈប្រជាពលរដ្ឋរាប់រយគ្រួសារបានបាត់បង់ដីពិតប្រាកដ ដោយសារលោក ហេង ហ៊ុយ រំលោភយក។ ពេលយើងបាត់បង់ដី ឬបាត់បង់អ្វីមួយយ៉ាងអយុត្តិធម៌ តើមិនឱ្យយើងតវ៉ា មិនឱ្យយើងនិយាយបានមែន? តើមានច្បាប់មួយណាដែលហាម?»
មេធាវីការពារក្តីអ្នកស្រី ដេត ហួរ លោក សំ ចំរើន ថ្លែងប្រាប់វីអូឌីថា បើទោះជាតុលាការ ផ្តន្ទាទោសអ្នកស្រី ដេង ហួរ ជាប់ពន្ធនាគារក្តី ប៉ុន្តែតុលាការមិនបានចេញដីកាចាប់ខ្លួនកូនក្តី របស់លោកនោះឡើយ។
លោកបន្ថែមថា៖ «តាមនីតិវិធីទោស១ឆ្នាំឡើង គឺតុលាការមានសិទ្ធិចេញដីកាចាប់ តែតុលាការក៏អាចមិនចេញដីកាចាប់ដែរ។ តែរឿងនេះតុលាការអត់បាន[ចេញ]ដីកាចាប់ទេ។ អ៊ីចឹងរឿងនេះប្តឹងទៅសាលាឧទ្ទរណ៍»។
វីអូឌី មិនអាចសុំការឆ្លើយតបពីលោក ហេង ហ៊ុយ ដែលជាម្ចាស់ក្រុមហ៊ុន ហេងហ៊ុយ បានទេ ពាក់ព័ន្ធករណីនេះ។
ប៉ុន្តែលោកធ្លាប់ប្រាប់ វីអូឌី កាលពីអំឡុងឆ្នាំ២០២១ ថាក្រុមហ៊ុនរបស់លោកមិនបានរំលោភយកដីរបស់ពលរដ្ឋនោះទេ។ លោកថា លោកមានបណ្ណកម្មសិទ្ធិត្រឹមត្រូវតាមច្បាប់លើដីនោះ។
មន្ត្រីសម្របសម្រួលគម្រោងធុរកិច្ច និងសិទ្ធិមនុស្ស នៅមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត សង្កេតឃើញថា កន្លងមក ទាំងអាជ្ញាធរ និងអ្នកមានលុយមានអំណាច តែងតែប្តឹងប្រឆាំងចំពោះពលរដ្ឋដែលចេញតវ៉ាទាមទារសិទ្ធិនិងការស្វែងដំណោះស្រាយផ្សេងៗ ទៅតុលាការ ដើម្បីបង្ក្រាបនិងបំបាក់ស្មារតីពលរដ្ឋកុំឱ្យហ៊ានតវ៉ា ជាពិសេសពលរដ្ឋមានជម្លោះដីធ្លី។ លោកថា ទង្វើនោះមិនអាចដោះស្រាយបញ្ហាចប់ឡើយ តែផ្ទុយទៅវិញ ទង្វើនេះបានរំលោភសិទ្ធិពលរដ្ឋធ្ងន់ធ្ងរ ជាពិសេសសិទ្ធិតវ៉ាដោយសន្តិវិធី សិទ្ធិទទួលបានដីធ្លីនិងលំនៅឋានសមរម្យ ដែលធានាដោយច្បាប់ជាតិ និងអន្តរជាតិ។
លោកបន្ថែមថា៖ «សិទិ្ធមានដីធ្លី និងសិទ្ធិមានលំនៅឋានសមរម្យរបស់ប្រជាពលរដ្ឋ ត្រូវបានរំលោភយ៉ាងធ្ងន់ធ្ងរដោយអាជ្ញាធរនិងប្រព័ន្ធតុលាការ។ យើងដឹងហើយថា ពលរដ្ឋមានសិទ្ធិទាមទារឱ្យមានដំណោះស្រាយឱ្យបានសមរម្យសម្រាប់ពួកគាត់ អាហ្នឹងជាសិទ្ធិដែលមានចែងនៅក្នុងរដ្ឋធម្មនុញ្ញ និងច្បាប់ពិសេសដទៃទៀត ក៏ដូចជាបទដ្ឋានគតិយុត្តដែលប្រទេសយើងបានផ្ដល់សច្ចាប័ន»។
ចាប់តាំងពីពាក់កណ្ដាលឆ្នាំ២០១៩មក ពលរដ្ឋចំនួន១៩៧គ្រួសារ មកពីឃុំជីខលើ និងជីខក្រោម បានឡើងមកតវ៉ានៅរាជធានីភ្នំពេញជាបន្តបន្ទាប់ ដើម្បីរកអន្តរាគមន៍ពីក្រសួងរៀបចំដែនដី នគរូបនីយកម្ម និងសំណង់ ឱ្យជួយដោះស្រាយវិវាទដីធ្លីរបស់ពួកគាត់ ដោយចោទថា ក្រុមហ៊ុន ហេងហ៊ុយ បានរំលោភយកដីធ្លីពួកគាត់តាំងពីឆ្នាំ២០០៧។ ប៉ុន្តែករណីនេះ ត្រូវបានក្រសួងរៀបចំដែនដី បដិសេធដោះស្រាយឱ្យពលរដ្ឋទាំងនោះជាបន្តបន្ទាប់ និងស្នើទៅអាជ្ញាធរពាក់ព័ន្ធឱ្យចាត់វិធានការផ្លូវច្បាប់ ចំពោះអ្នកដែលក្រសួងថាបានញុះញង់ឱ្យពលរដ្ឋ១៩៧គ្រួសារនោះឡើងមកតវ៉ាទៀតផង។
ពាក់ព័ន្ធជម្លោះដីធ្លីនេះ មានតំណាងពលរដ្ឋ៩នាក់នៅសហគមន៍១៩៧ រួមមាន អ្នកស្រី អិប តឹង, អ្នកស្រី ដេត ហួរ, អ្នកស្រី កើត នៅ, អ្នកស្រី អ៊ិន ធូ, លោក គង់ មែន និងតំណាងពលរដ្ឋផ្សេងទៀត កំពុងជាប់បណ្តឹងនៅតុលាការ ក្រោមបទចោទ «បរិហារកេរ្តិ៍ និងញុះញង់ឱ្យប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» ទៅតាមបណ្ដឹងរបស់លោក ហេង ហ៊ុយ៕
