អាជ្ញាធរយោធារបស់ប្រទេសមីយ៉ាន់ម៉ា បានប្រហារជីវិតសកម្មជនប្រជាធិបតេយ្យចំនួន៤នាក់ ដែលត្រូវបានចោទប្រកាន់ថាបានចូលរួមអនុវត្ត «អំពើភេរវកម្ម» នៅក្នុងប្រទេស។ នេះបើតាមការរាយការណ៍ដោយប្រព័ន្ធផ្សព្វផ្សាយរដ្ឋមួយនៅថ្ងៃចន្ទនេះ ដែលត្រូវបានយកមកចុះផ្សាយបន្តដោយទីភ្នាក់ងារសារព័ត៌មាន Reuters។
តាមរយៈការកាត់ទោសប្រហារជីវិតក្នុងសវនាការបិទទ្វារ កាលពីខែមករាកន្លងទៅ បុគ្គលទាំង៤នាក់នេះត្រូវបានតុលាការចោទប្រកាន់ថាបានចូលរួមចំណែកជួយដល់កងជីវពល ក្នុងការប្រយុទ្ធដោយបង្ហូរឈាមតទល់នឹងកងទ័ពដែលទទួលបានអំណាចតាមរយៈរដ្ឋប្រហារកាលពីឆ្នាំមុន។
យោងតាមសារព័ត៌មានរបស់មីយ៉ាន់ម៉ា Global New Light ក្នុងចំណោមអ្នកដែលត្រូវបានប្រហារជីវិតដោយព្យួរកទាំងនោះ រួមមាន សកម្មជនប្រជាធិបតេយ្យដ៏លេចធ្លោម្នាក់ លោក ក្យរ មីនយូ (Kyaw Min Yu) ឬត្រូវបានគេស្គាល់ថា ជីមី (Jimmy) អតីតសមាជិកគណបក្សរបស់លោកស្រី អ៊ុងសាន ស៊ូជី លោក ភ្យូ ហ្សេយ៉ា ថរ (Phyo Zeya Thaw) និងពីរនាក់ផ្សេងទៀត គឺលោក ឡា មីយូ អោង (Hla Myo Aung) និងលោក អោង ធូរ៉ា ហ្ស (Aung Thura Zaw)។
ទីភ្នាក់ងារសារព័ត៌មាន Reuters មិនអាចស្វែងរកការធ្វើអត្ថាធិប្បាយណាមួយភ្លាមៗពីអ្នកនាំពាក្យយោធាបានឡើយ ទាក់ទិននឹងការប្រហារជីវិតនេះ។
ទោះជាយ៉ាងណា អ្នកនាំពាក្យរបបយោធាមីយ៉ាន់ម៉ា លោក Zaw Min Tun កាលពីខែមុន ធ្លាប់បានថ្លែងការពារការកាត់ទោសនេះ ដោយថា សកម្មភាពនេះ [ប្រហារជីវិត] ត្រូវបានប្រើប្រាស់នៅក្នុងប្រទេសជាច្រើន [មិនមែនមានតែប្រទេសមីយ៉ាន់ម៉ា]។
លោកថា៖ «យ៉ាងហោចណាស់ ជនស៊ីវិលស្លូតត្រង់ចំនួន៥០នាក់ ដោយមិនរាប់បញ្ចូលកងកម្លាំងសន្តិសុខ បានស្លាប់ដោយសារតែពួកគេ»។
លោកបន្ថែមថា៖ «តើវាអាចជារឿងអយុត្តិធម៌យ៉ាងដូចម្ដេច? សកម្មភាពចាំបាច់នានាត្រូវតែអនុវត្តដើម្បីដោះស្រាយបញ្ហា»។
ប្រទេសមីយ៉ាន់ម៉ាបានធ្លាក់ចូលក្នុងភាពច្របូកច្របល់ គិតចាប់តាំងពីក្រុមយោធាបានដណ្តើមយកអំណាចមកគ្រប់គ្រង កាលពីខែកុម្ភៈឆ្នាំមុន និងបានផ្តួលរំលំរដ្ឋាភិបាលជាប់ឆ្នោតរបស់លោកស្រី អ៊ុងសាន ស៊ូជី ដែលបង្កឱ្យមានជាបាតុកម្មកើតឡើងជាញឹកញាប់នៅក្នុងប្រទេស។
ជាមួយគ្នានេះ យោងតាមសមាគមជំនួយអ្នកទោសនយោបាយ (AAPP) មនុស្សជាង២ ០០០នាក់ ត្រូវបានសម្លាប់ដោយកងកម្លាំងសន្តិសុខមីយ៉ាន់ម៉ា និងមនុស្សរាប់ម៉ឺននាក់ផ្សេងទៀតត្រូវបានចាប់ខ្លួន គិតចាប់តាំងពីរដ្ឋប្រហារ ថ្ងៃទី១ ខែកុម្ភៈ ឆ្នាំមុន។
ទោះជាយ៉ាងណា តួលេខនេះត្រូវបានចាត់ទុកដោយរបបយោធាថាជាការបំផ្លើសការពិត៕
