រាជរដ្ឋាភិបាល តាមរយៈអគ្គនាយកដ្ឋានគយ និងរដ្ឋាករកម្ពុជា (អគរ) បានជំរុញទៅដល់ម្ចាស់រថយន្តចង្កូតស្ដាំទាំងអស់ត្រូវប្រញាប់ប្រញាល់ទៅចុះបញ្ជីឱ្យបានមុនថ្ងៃឱសានវាទមកដល់ ដោយកាលបរិច្ឆេទបញ្ចប់ការចុះបញ្ជីនេះនៅត្រឹមចុងខែកក្កដា ឆ្នាំ២០២២នេះ។
តាមសេចក្ដីជូនដំណឹងរបស់អគ្គនាយកដ្ឋានគយ បានរម្លឹកដល់ម្ចាស់រថយន្តចង្កូតស្ដាំគ្មានពន្ធមានស្រាប់ ក្នុងប្រទេសទាំងអស់ រួសរាន់មកចុះបញ្ជីនៅអង្គភាពគយ និងរដ្ឋាករ នៅជិតបំផុត ដែលនឹងបញ្ចប់ត្រឹមថ្ងៃទី៣១ ខែកក្កដា ឆ្នាំ២០២២ខាងមុខនេះ។
អគ្គនាយកដ្ឋានគយ ក៏បានបញ្ជាក់ថា ចំពោះរថយន្តដែលចុះបញ្ជីរួច នឹងត្រូវបានទុកពេលវេលាឱ្យម្ចាស់មកបង់ពន្ធរហូតដល់ថ្ងៃទី៨ ខែតុលា ឆ្នាំ២០២២។ រីឯរថយន្តមិនបានចុះបញ្ជីតាមកាលបរិច្ឆេទកំណត់ទេ គឺចាត់ទុកជារថយន្តគ្មានស្រាប់ក្នុងប្រទេស ឬជារថយន្តទើបរត់ពន្ធចូលមកថ្មី ដែលជាមុខសញ្ញានៃការបង្រ្កាប និងរឹបអូសតាមច្បាប់និងបទប្បបញ្ញត្តិជាធរមាន។
តាមការសម្រេចរបស់លោកនាយករដ្ឋមន្ត្រី ហ៊ុន សែន ស្តីពីការអនុញ្ញាតប្រមូលពន្ធនិងអាករលើរថយន្តចង្កូតស្តាំគ្មានពន្ធមានស្រាប់ក្នុងប្រទេស ដែលនៅសេសសល់ ដោយពុំតម្រូវឱ្យកែចង្កូតទេ ប៉ុន្តែតម្រូវឱ្យម្ចាស់រថយន្តចង្កូតស្ដាំគ្រប់ប្រភេទត្រូវយករថយន្តគ្មានពន្ធរបស់ខ្លួនមកចុះបញ្ជីជាបន្តបន្ទាប់។
ប្រភពដដែលឱ្យដឹងថា គិតចាប់ពីថ្ងៃទី១ ខែកក្កដា ឆ្នាំ២០២២ រហូតដល់ថ្ងៃទី២៤ ខែកក្កដា ឆ្នាំ២០២២ មានរថយន្តចង្កូតស្ដាំចំនួន៤ ៨៥៤គ្រឿង ត្រូវបានយកមកចុះបញ្ជី ដែលក្នុងនោះមានរថយន្តមួយចំនួនបានបំពេញកាតព្វកិច្ចពន្ធនិងអាកររួចហើយផងដែរ៕