ក្រសួងសាធារណការ និងដឹកជញ្ជូន បានអំពាវនាវដល់ម្ចាស់រថយន្តធុនធំ ក៏ដូចជាក្រុមហ៊ុនដឹកជញ្ជូន មិនត្រូវឆ្លៀតឱកាសក្នុងការប្រមូលផ្ដុំ ដើម្បីស្នើសុំលើលក្ខខណ្ឌណាមួយពាក់ព័ន្ធនឹងការកែច្នៃចង្កូតរថយន្តពីស្ដាំមកឆ្វេង ខណៈមន្ត្រីជំនាញកំពុងពិភាក្សានិងពិចារណាលើមតិសំណូមពរ។
ក្រសួងសាធារណការ និងដឹកជញ្ជូន កាលពីថ្ងៃទី០៧ ខែកក្កដា ឆ្នាំ២០២២ ម្សិលមិញ បានចេញសេចក្ដីជូនដំណឹងមួយ ដោយបានអំពាវនាវដល់ម្ចាស់យានយន្តគ្រប់ប្រភេទ រួមទាំងក្រុមហ៊ុនដឹកជញ្ជូន កុំឱ្យប្រើឱកាសនៃការប្រមូលផ្ដុំក្នុងរូបភាពណាមួយ ដើម្បីធ្វើការស្នើសុំឱ្យមានការលើកលែងលើលក្ខខណ្ឌពាក់ព័ន្ធនឹងការកែច្នៃយានយន្តខុសលក្ខណៈបច្ចេកទេស ដែលបានធ្វើឱ្យប៉ះពាល់ដល់សណ្ដាប់ធ្នាប់សាធារណៈ។
អគ្គនាយកនៃនាយកដ្ឋានដឹកជញ្ជូនផ្លូវគោក នៃក្រសួងសាធារណការ និងដឹកជញ្ជូន លោក ឈួន វ៉ន់ មានប្រសាសន៍នៅថ្ងៃសុក្រនេះថា ក្នុងករណីមានការមិនយល់ស្របណាមួយ ជុំវិញការសម្រេចរបស់ប្រមុខរដ្ឋាភិបាល ដែលឱ្យម្ចាស់រថយន្តចង្កូតស្តាំ អាចទៅបង់ពន្ធបាន ដោយមិនចាំបាច់កែចង្កូតនោះ ម្ចាស់រថយន្តចង្កូតស្តាំដែលកែទៅឆ្វេងរួច អាចផ្ញើជាលិខិតសំណូមពរទៅកាន់ក្រសួងឬអាជ្ញាធរពាក់ព័ន្ធ ដើម្បីជួយស្វែងរកជាដំណោះស្រាយនិងពិភាក្សាគ្នា ដោយចៀសវាងការបំផុសឱ្យមានការប្រមូលផ្ដុំបិទផ្លូវ ដែលធ្វើឱ្យមានការកកស្ទះ ក៏ដូចជាប៉ះពាល់ដល់សណ្ដាប់ធ្នាប់សាធារណៈ។
លោកបន្ថែមថា ជុំវិញករណីនេះ ក្រសួងបានកំពុងធ្វើការប្រជុំពិភាក្សា ដើម្បីជជែកពិចារណាសម្រេចទៅលើមតិសំណូមពររបស់ពលរដ្ឋ តែលទ្ធផលជាយ៉ាងណានោះ គឺពុំទាន់ដឹងឡើយ។
លោកថា៖ «ទាក់ទងនឹងប្រសាសន៍របស់ប្រមុខរាជរដ្ឋាភិបាល នេះជាការអនុគ្រោះ ការយោគយល់ដល់បងប្អូនយើងដែលមានការលំបាកក្នុងការបង់ពន្ធផង ដូរចង្កូតផង អ៊ីចឹងទៅណា»។
លោកបន្តថា៖ «ចំពោះការធ្វើចរាចរណ៍ គ្រាន់ចង់ជម្រាបជូនថា យើងប្រកាន់ស្ដាំ យើងប្រើចង្កូតឆ្វេងហើយ ប៉ុន្តែយើងឃើញថាប្រទេសមួយចំនួនក៏មានឡានមួយចំនួនក៏ប្រើចម្រុះអ៊ីចឹងដែរ ដូច្នេះគ្រាន់តែថាបងប្អូនដែលគាត់ប្រើចង្កូតស្ដាំហ្នឹង បងប្អូនយើងត្រូវតែប្រយ័ត្នអ៊ីចឹងទៅណា ពេលយើងធ្វើការបើកបរអ៊ីចឹងទៅ»។
លោក ម៉ុន សុខ អាយុ៥៩ឆ្នាំ រស់នៅស្រុកកណ្ដាលស្ទឹង ខេត្តកណ្ដាល ដែលជាម្ចាស់រថយន្តដឹកដីចង្កូតស្ដាំមិនទាន់កែ ឱ្យដឹងថា ជាការប្រសើរ ប្រសិនបើរដ្ឋាភិបាលមិនតម្រូវឱ្យម្ចាស់រថយន្តកែចង្កូត។ លោកថា ចំពោះការតវ៉ាកាលពីថ្ងៃម្សិលមិញនោះ គឺពួកគាត់គ្រាន់តែចង់ដឹងពីលទ្ធផលសម្រេចពីក្រសួងឬអាជ្ញាធរពាក់ព័ន្ធ លើទិន្នន័យជាក់លាក់ដែលពួកគាត់ត្រូវបង់ពន្ធជូនរដ្ឋតែប៉ុណ្ណោះ។
លោកថា៖ «ហ្នឹងហើយវាអត់អីទេ ព្រោះអត់កែ អាហ្នឹងវាធូរតិច! ដល់គេឱ្យកែទាំងចង្កូតទៅ វាមានតែទៅខ្ចីលុយអង្គការ»។
ការអំពាវនាវរបស់ក្រសួងបានធ្វើឡើង ក្រោយពីម្ចាស់រថយន្តនិងអ្នកបើកបររថយន្តចង្កូតស្តាំដែលមិនទាន់បានបង់ពន្ធ និងម្ចាស់រថយន្តនិងអ្នកបើកបររថយន្តចង្កូតស្តាំកែទៅចង្កូតឆ្វេងរួច បាននាំគ្នាប្រមូលផ្តុំតវ៉ាជាបន្តបន្ទាប់ ទាមទារលក្ខខណ្ឌផ្សេងៗ ជុំវិញរឿងកែចង្កូតរថយន្ត និងការបង់ពន្ធ នៅក្នុងសប្តាហ៍នេះ៕
