ក្រសួងមហាផ្ទៃ នឹងបើកប្រតិបត្តិការទ្រង់ទ្រាយធំត្រួតពិនិត្យកន្លែងរស់នៅរបស់ជនបរទេសទាំងអស់នៅក្នុងប្រទេសកម្ពុជា លើកលែងតែមន្ត្រីការទូត ដើម្បីពិនិត្យភាពស្របច្បាប់ និងទប់ស្កាត់មុខសញ្ញាពាក់ព័ន្ធនឹងការជួញដូរមនុស្ស។
ក្នុងពិធីបិទវគ្គសុក្រឹតការថ្នាក់ដឹកនាំនគរបាលកម្រិត១ និងកម្រិត២ នៅបណ្ឌិត្យសភានគរបាលកម្ពុជា ខេត្តកណ្ដាល កាលពីថ្ងៃម្សិលមិញ ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ លោក ស ខេង បានថ្លែងថា ក្រសួងមហាផ្ទៃនឹងបើកប្រតិបត្តិការទ្រង់ទ្រាយធំត្រួតពិនិត្យនៅកន្លែងស្នាក់នៅរបស់ជនបរទេសទាំងអស់នៅកម្ពុជា រួមមាន នៅតាមសណ្ឋាគារ ការដ្ឋាន និងក្រុមហ៊ុននានា ប៉ុន្តែលើកលែងជនបរទេសដែលជាមន្រ្តីការទូត។ ពាក់ព័ន្ធការងារបើកប្រតិបត្តិការទ្រង់ទ្រាយធំមួយនេះ លោកថា ក្រសួងនឹងរៀបចំផែនការឱ្យបានហ្មត់ចត់បំផុត ដើម្បីរកមុខសញ្ញា និងទប់ស្កាត់ការជួញដូរមនុស្សនៅកម្ពុជា។
លោក ស ខេង ថ្លែងថា៖ «អ្នកមកធ្វើការងារនៅកន្លែងការដ្ឋានផ្សេងៗ ក្រុមហ៊ុនវិនិយោគទាំងអស់ហ្នឹង គឺត្រូវតែត្រួតពិនិត្យ ហើយត្រួតពិនិត្យនេះគ្មានក្នុងបំណងអីទេ គឺក្នុងបំណងឱ្យរកឃើញថា អ្នកដែលមកកម្ពុជាហ្នឹង គឺចូលដោយត្រឹមត្រូវតាមច្បាប់ឬមិនត្រឹមត្រូវ! ធ្វើការនៅកម្ពុជាហ្នឹងមានច្បាប់ការងារអត់! ហើយរកឱ្យឃើញអ្នកដែលជាមុខសញ្ញានៃជួញដូរមនុស្ស»។
រដ្ឋមន្ត្រីក្រសួងមហាផ្ទៃរូបនោះថ្លែងបន្តថា ដើមចមដែលនាំឱ្យអង្គការហិរញ្ញវត្ថុអន្តរជាតិ ហៅកាត់ថា អង្គការហ្វា ដាក់កម្ពុជាក្នុងបញ្ជីប្រផេះ ដោយសារតែកម្ពុជានៅតែជួបបញ្ហាប្រឈមមួយចំនួនដែលនៅសេសសល់ ហើយមិនទាន់ត្រូវបានដោះស្រាយ រួមមាន បទល្មើសគ្រឿងញៀន បទល្មើសចរាចរណ៍ ការជួញដូរព្រៃឈើ សត្វព្រៃ និងការជួញដូរមនុស្ស ជាដើម។ ករណីនេះ លោកថា ថ្នាក់ដឹកនាំបានជំរុញទៅស្ថាប័នពាក់ព័ន្ធទាំងអស់ ត្រូវពង្រឹងការអនុវត្តច្បាប់ ដើម្បីទប់ស្កាត់បញ្ហាប្រឈមទាំងនោះផងដែរ។
វីអូឌី មិនអាចសុំការបំភ្លឺពីអ្នកនាំពាក្យអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ លោក កៅ វណ្ណថន បានទេ នៅរសៀលថ្ងៃនេះ ។
នាយកប្រតិបត្តិអង្គការតម្លាភាពកម្ពុជា លោក ប៉ិច ពិសី បង្ហាញការគាំទ្រចំពោះការអនុវត្តប្រតិបត្តិការត្រួតពិនិត្យនេះ ប៉ុន្តែលោកថា ប្រតិបត្តិការនេះគួរមានការចូលរួមពីអាជ្ញាធរមានសមត្ថកិច្ចពាក់ព័ន្ធ ក៏ដូចជាមន្រ្តីអនុវត្តច្បាប់ផ្សេងទៀត នោះទើបការស្រាវជ្រាវចាប់ខ្លួនជនសង្ស័យពាក់ព័ន្ធនឹងការជួញដូរមនុស្សមានប្រសិទ្ធភាពខ្ពស់។
លោកថា៖ «ខ្ញុំគិតថា ឱ្យតែរដ្ឋាភិបាលមានឆន្ទៈក្នុងការបង្ក្រាបបទល្មើសជួញដូរមនុស្ស យើងសង្ឃឹមការអនុវត្តនោះនឹងមានប្រសិទ្ធភាព តែយើងនឹងចាំមើលថាប្រតិបត្តិការនោះនឹងចេញប្រតិបត្តិការជាផ្លែផ្កាកម្រិតណា»។
សហរដ្ឋអាមេរិក កាលពីថ្ងៃទី១៩ ខែកក្កដា ឆ្នាំ២០២២នេះ បានចេញរបាយការណ៍ថ្មីមួយដាក់ប្រទេសមួយចំនួនក្នុងបញ្ជីខ្មៅនៃការជួញដូរមនុស្សរបស់ខ្លួន ក្នុងនោះមានទាំងកម្ពុជាផងដែរ។
ការដាក់កម្ពុជាក្នុងបញ្ជីខ្មៅនៅពេលនេះ ត្រូវបានសហរដ្ឋអាមេរិកសម្អាងថា ការជួញដូរជនបរទេសចូលមកក្នុងប្រទេសកម្ពុជាកំពុងមានការកើនឡើង ក៏ដូចជាការរំលោភបំពានផ្សេងទៀតពាក់ព័ន្ធនឹងវិស័យការងារ ពលករចំណាកស្រុក ហើយមន្ត្រីមួយចំនួនសមគំនិតក្នុងប្រតិបត្តិការឆបោកតាមប្រព័ន្ធអ៊ីនធឺណិត។
តែយ៉ាងណា ក្រៅពីដាក់កម្ពុជាក្នុងបញ្ជីខ្មៅ ក្រសួងការបរទេសអាមេរិកក៏បានអំពាវនាវឱ្យកម្ពុជាបង្កើនកិច្ចខិតខំប្រឹងប្រែងអនុវត្តច្បាប់ប្រឆាំងនឹងប្រតិបត្តិការឆបោកតាមអ៊ីនធឺណិត រួមទាំងការចោទប្រកាន់ពីការងារដោយបង្ខំ និងប្រឆាំងនឹងមន្ត្រីដែលសមគំនិតក្នុងប្រតិបត្តិការឆបោកនេះ និងឧក្រិដ្ឋកម្មជួញដូរដែលពាក់ព័ន្ធ។
ក្នុងរបាយការណ៍នោះ អាមេរិកបានដាក់កម្ពុជា វៀតណាម តំបន់ម៉ាកាវរបស់ចិន និងប្រទេស៣ទៀតនៅតំបន់អាស៊ាន ពីបញ្ជីស្ថិតក្រោមការឃ្លាំមើលនៅកម្រិត២ ទៅកម្រិត៣ ដែលគេស្គាល់ជាទូទៅថា «បញ្ជីខ្មៅ» ដែលជាកម្រិតដ៏អាក្រក់។ អាមេរិកចោទប្រកាន់ថា កម្ពុជានិងប្រទេសទាំងនោះមានកិច្ចខិតខំតិចតួច និងមិនបានគោរពតាមស្តង់ដារនៃការលុបបំបាត់ការជួញដូរមនុស្ស៕