ក្រសួងការបរទេសសហរដ្ឋអាមេរិក បានដាក់កម្ពុជានៅចំណាត់ថ្នាក់ទី៣ ក្នុងបញ្ជីខ្មៅ នៅឆ្នាំ២០២២នេះ ពាក់ព័ន្ធនឹងអំពើឆបោកទង់ក្រហម (Red Flags Scam Operations) ការជួញដូរជនបរទេសចូលមកក្នុងប្រទេសកម្ពុជាដែលកំពុងមានការកើនឡើង ក៏ដូចជាការរំលោភបំពានផ្សេងទៀត ពាក់ព័ន្ធនឹងពលករចំណាកស្រុក។
យោងតាមរបាយការណ៍ស្ដីពីការជួញដូរមនុស្សប្រចាំឆ្នាំរបស់ក្រសួងការបរទេសអាមេរិក ដែលចេញផ្សាយកាលពីល្ងាចថ្ងៃអង្គារម្សិលមិញ បានបង្ហាញថា ប្រទេសកម្ពុជាស្ថិតក្នុងបញ្ជីតាមដានចំណាត់ថ្នាក់២ ក្នុងរបាយការណ៍របស់សហរដ្ឋអាមេរិក ក្នុងរយៈពេល៣ឆ្នាំចុងក្រោយនេះ។ របាយការណ៍បន្តថា ប្រទេសដែលមិនមានភាពប្រសើរឡើង ត្រូវបានទម្លាក់ចំណាត់ថ្នាក់ដោយស្វ័យប្រវត្តិទៅចំណាត់ថ្នាក់ទី៣ (បញ្ជីខ្មៅ) បន្ទាប់ពីរយៈពេល២ឆ្នាំនៅក្នុងបញ្ជីតាមដាន ប៉ុន្តែកម្ពុជាបានទទួលការពន្យារពេលមួយឆ្នាំ នៅឆ្នាំ២០២១។ របាយការណ៍នេះក៏បានបញ្ជាក់ផងដែរថា «រាជធានី-ខេត្តទាំង២៥របស់ប្រទេសកម្ពុជា គឺជាប្រភពនៃការជួញដូរមនុស្ស»។
របាយការណ៍ដដែលបន្តថា បច្ចុប្បន្ននេះ ប្រទេសកម្ពុជា រួមជាមួយប្រទេសចិន ម៉ាកាវ វៀតណាម ម៉ាឡេស៊ី មីយ៉ាន់ម៉ា កូរ៉េខាងជើង ប៊្រុយណេ ស៊ីរី អាហ្វហ្គានីស្ថាន ស៊ូដង់ខាងត្បូង និងរដ្ឋចំនួន១២ផ្សេងទៀត ជាប្រទេសដែលស្ថិតនៅក្នុងចំណាត់ថ្នាក់លេខ៣។ នៅពេលប្រទេសកម្ពុជាស្ថិតនៅក្នុងចំណាត់ថ្នាក់ទី៣ នឹងអាចធ្វើឱ្យមានការរឹតត្បិតលើជំនួយបរទេស បើទោះបីជាមិនមែនជាការចាំបាច់ និងជាការសម្រេចចិត្តផ្នែកនយោបាយរបស់ប្រធានាធិបតីសហរដ្ឋអាមេរិកក៏ដោយ។
វីអូឌី បានចងក្រងឯកសារស្ដីពីការជួញដូរ ការងារដោយបង្ខំ និងការធ្វើទារុណកម្មលើជនបរទេសក្នុងប្រតិបត្តិការឆបោកទូទាំងប្រទេស។ ជាធម្មតា បុគ្គលដែលត្រូវបានជួញដូរ គឺជាពលរដ្ឋចិន វៀតណាម ថៃ តៃវ៉ាន់ និងម៉ាឡេស៊ី រួមទាំងមានករណីជួញដូរមួយចំនួនទៀត ដែលត្រូវបានរាយការណ៍ពីបណ្ដាប្រទេសនៅក្នុងតំបន់អាស៊ីផ្សេងទៀត។
របាយការណ៍ទាំងនេះត្រូវបានគាំទ្រដោយប្រព័ន្ធផ្សព្វផ្សាយអន្តរជាតិ និងអង្គការមិនមែនរដ្ឋាភិបាលផ្សេងទៀត ដែលបានចងក្រងឯកសារអំពីការរំលោភបំពានទាំងនេះផងដែរ។
របាយការណ៍ TIP របស់សហរដ្ឋអាមេរិក បានបង្ហាញសង្ខេបអំពីប្រតិបត្តិការឆបោក ដោយរៀបរាប់លម្អិតអំពីការរំលោភសិទ្ធិការងារ និងបញ្ហាជួញដូរមនុស្ស ដែលកំពុងតែកើតមាននៅក្នុងប្រទេសកម្ពុជា ដូចជា ការងារដើម្បីដោះបំណុលនៅឡឥដ្ឋ ការជួញដូរកូនស្រីដែលកំពុងមានការកើនឡើងនៅបរទេស និងការរំលោភបំពានដែលប្រជាជនចំណាកស្រុកកំពុងជួបប្រទះ។
របាយការណ៍ដដែលនេះបង្ហាញថា មានរបាយការណ៍គួរឱ្យទុកចិត្ត ដែលបង្ហាញថា មន្ត្រីមួយចំនួនសមគំនិតក្នុងប្រតិបត្តិការឆបោក និងអំពាវនាវឱ្យបង្កើនការកាត់ទោសអាជ្ញាធរដែលប្រព្រឹត្តខុស។
របាយការណ៍ដដែលនេះបានបង្ហាញទៀតថា៖ «អង្គការមិនមែនរដ្ឋាភិបាលបានចោទប្រកាន់ថា នគរបាលនិងមន្ត្រីផ្សេងទៀតសមគំនិតក្នុងប្រតិបត្តិការឆបោកតាមប្រព័ន្ធអ៊ីនធឺណិត ដែលបានបង្ខំប្រជាជនចិន ប្រជាជននៅតំបន់អាស៊ីអាគ្នេយ៍ និងជនបរទេសរាប់រយនាក់ ឱ្យធ្វើការនៅក្នុងវិស័យសេវាបម្រើអតិថិជននៅក្រុងព្រះសីហនុ និងទីតាំងផ្សេងទៀត»។
របាយការណ៍នេះក៏អំពាវនាវឱ្យមានការបង្កើនកិច្ចខិតខំប្រឹងប្រែងអនុវត្តច្បាប់ប្រឆាំងនឹងប្រតិបត្តិការឆបោកតាមអ៊ីនធឺណិត រួមទាំងការចោទប្រកាន់ពីការងារដោយបង្ខំ និងប្រឆាំងនឹងមន្ត្រីដែលសមគំនិតក្នុងប្រតិបត្តិការឆបោកនេះ និងឧក្រិដ្ឋកម្មជួញដូរដែលពាក់ព័ន្ធ។
នគរបាលកម្ពុជាបានជួយសង្គ្រោះមនុស្សដែលត្រូវបានបង្ខំឱ្យធ្វើការក្នុងប្រតិបត្តិការឆបោកជាបន្តបន្ទាប់ ដែលជាញឹកញាប់ធ្វើឡើងតាមការទូតពីប្រទេសកំណើតរបស់ជនរងគ្រោះ។ យ៉ាងណាក៏ដោយ នគរបាលកម្ពុជាបានបដិសេធយ៉ាងដាច់អហង្ការថា មិនមានការកើនឡើងនៃករណីទាំងនេះឡើយ ដែលជួនកាលបានកំណត់ការឃុំខ្លួនពលករថាជាវិវាទការងារ ឬការខ្វែងគំនិតគ្នាលើកិច្ចសន្យាការងារ។
រដ្ឋលេខាធិការក្រសួងមហាផ្ទៃ និងជាអនុប្រធានអចិន្រ្តៃយ៍គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស លោកស្រី ជូ ប៊ុនអេង សុំមិនធ្វើការបកស្រាយជុំវិញបញ្ហានេះ ដោយលោកស្រីអះអាងថា អ្នកសារព័ត៌មានសួរសំណួរនេះដដែលៗ។
ចំណែកអ្នកនាំពាក្យក្រសួងមហាផ្ទៃ លោក ខៀវ សុភ័គ និងប្រធានអង្គភាពអ្នកនាំពាក្យរដ្ឋាភិបាលកម្ពុជា លោក ផៃ ស៊ីផាន មិនអាចសុំការបញ្ជាក់បានទេ នៅរសៀលថ្ងៃនេះ។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា ចង់ឃើញស្ថាប័នពាក់ព័ន្ធរបស់កម្ពុជាដើរតួនាទីក្នុងការអនុវត្តច្បាប់ឱ្យបានត្រឹមត្រូវ ហើយត្រូវត្រួតពិនិត្យឱ្យបានច្បាស់លាស់ទៅលើជនបរទេសដែលមានជំនួញនៅកម្ពុជា និងកំពុងប្រើប្រាស់អគារពាណិជ្ជកម្ម ដើម្បីរកស៊ីភាគហ៊ុនផ្សេងៗ ចៀសវាងការយកទីតាំងផ្សេងៗនៅកម្ពុជាទៅប្រព្រឹត្តនូវបទល្មើសណាមួយដែលធ្វើឱ្យប៉ះពាល់ដល់មុខមាត់និងកិត្តិយសកម្ពុជានៅលើឆាកអន្តរជាតិ។
លោកមានប្រសាសន៍ថា៖ «ពេលដែលពិនិត្យហើយ គួរតែមានការជជែកគ្នាជាមួយនឹងស្ថាប័នពាក់ព័ន្ធរបស់រដ្ឋាភិបាល ដើម្បីរកដំណោះស្រាយ និងដើម្បីកុំឱ្យមានឈ្មោះរបស់ប្រទេសកម្ពុជាហ្នឹងកាន់តែប៉ះពាល់មកដល់មុខមាត់នៃប្រទេសកម្ពុជា ពាក់ព័ន្ធទៅរឿងការជួញដូរមនុស្ស និងរឿងអនឡាញហ្នឹង»៕