ប្រជាពលរដ្ឋប្រមាណ៤០នាក់ តំណាងឱ្យជាង៨០គ្រួសារ រស់នៅសង្កាត់ជើងឯក ខណ្ឌដង្កោ នៅថ្ងៃពុធនេះ បាននាំគ្នាទៅប្រមូលផ្ដុំនៅមុខរដ្ឋបាលរាជធានីភ្នំពេញ ដើម្បីជំរុញដល់អាជ្ញាធរពន្លឿនការផ្ដល់បណ្ណកម្មសិទ្ធិដីធ្លីជូនពួកគាត់ ខណៈពួកគាត់បារម្ភពីការបណ្ដេញចេញដោយបង្ខំ។
អ្នកស្រី វង្ស ធារី ប្រជាពលរដ្ឋរស់នៅភូមិដូនឪ សង្កាត់ជើងឯក បានឱ្យដឹងថា ចាប់ពីឆ្នាំ២០២០មក ពួកគាត់បានដាក់លិខិតទៅរដ្ឋបាលរាជធានីភ្នំពេញ និងអាជ្ញាធរពាក់ព័ន្ធ ដើម្បីស្នើសុំបណ្ណកម្មសិទ្ធិដីធ្លី ប៉ុន្តែមកដល់ពេលនេះ ពួកគាត់នៅមិនទាន់ទទួលបានបណ្ណកម្មសិទ្ធិនៅឡើយទេ។
អ្នកស្រីបន្តថា ការដែលពួកគាត់ទៅប្រមូលផ្ដុំនៅរដ្ឋបាលរាជធានីភ្នំពេញ ជាថ្មីទៀត នៅថ្ងៃនេះ គឺដើម្បីជំរុញជាថ្មីទៅអាជ្ញាធរឱ្យជួយពន្លឿនការផ្ដល់បណ្ណកម្មសិទ្ធិដីធ្លីដល់ពួកគាត់ ដោយសារតែបច្ចុប្បន្ន មានក្រុមហ៊ុនឯកជនបានទៅអភិវឌ្ឍចាក់ដីលុបបឹងនៅក្បែរៗតំបន់ដែលគាត់រស់នៅ ធ្វើឱ្យពួកគាត់បារម្ភខ្លាចមានការបណ្ដេញចេញទាំងបង្ខំនៅពេលខាងមុខ។
អ្នកស្រី វង្ស ធារី និយាយថា៖ «យើងចេះតែខ្លាច បារម្ភភ័យ ព្រោះនៅជុំវិញ[ផ្ទះ]ហ្នឹង គេចាក់[ដី]អស់ហើយ ហើយយើងនៅកណ្ដាល ដល់អ៊ីចឹងខ្លាចម៉េចទៅ យើងអត់ដឹងថាទៅរស់នៅណា […] អ៊ីចឹងបានសុំឱ្យគាត់ជួយដោះស្រាយមក ព្រោះកូនចៅនេះអត់មានប្លង់កាន់កាប់ ហើយដីក៏អត់ធំដែរ»។
ពលរដ្ឋម្នាក់ទៀត អ្នកស្រី ចឹក សុខណៃ ឱ្យដឹងថា ពួកគាត់បានទៅរស់នៅនិងប្រកបរបររកស៊ីចិញ្ចឹមជីវិតនៅភូមិដូនឪ សង្កាត់ជើងឯក តាំងពីឆ្នាំ១៩៨២ រហូតមកដល់បច្ចុប្បន្ន ដោយអាជ្ញាធរពុំទាន់ផ្ដល់បណ្ណកម្មសិទ្ធិស្របច្បាប់ដល់ពួកគាត់នៅឡើយ ខណៈពលរដ្ឋក្នុង១គ្រួសារ មានក្បាលដីចន្លោះពី៦ទៅ៧ម៉ែត្រប៉ុណ្ណោះសម្រាប់សង់លំនៅឋាន។
ពលរដ្ឋរូបនេះបន្តថា អ្នកភូមិរស់នៅទីនោះជាប្រជាពលរដ្ឋក្រីក្រ ដោយប្រកបរបរដាំបន្លែ នេសាទត្រីលើផ្ទៃបឹងជើងឯក ធ្វើសំណង់ និងធ្វើការងាររោងចក្រ ជាដើម។
អ្នកស្រីបន្ថែមថា៖ «ពេលដែលយើងមានបណ្ណកម្មសិទ្ធិស្របច្បាប់ខ្លួនឯង យើងរស់នៅ វាមានទំនុកចិត្តខ្លះ ដល់ពេលយើងរស់នៅលើដីដែលអត់មានបណ្ណកម្មសិទ្ធិអ៊ីចឹង ពួកខ្ញុំរស់នៅទាំងមានអារម្មណ៍ខ្លាច។ ខ្លាចគេបណ្តេញយើងចេញទៅនៅកន្លែងផ្សេង ធ្វើឱ្យយើងបាត់បង់មុខរបរ។ ពួកខ្ញុំអត់ចង់ផ្លាស់ប្តូរទៅកន្លែងផ្សេងទេ ព្រោះនៅទីនេះ យើងមានមុខរបររកស៊ីគ្រប់គ្រាន់ នៅជិតមន្ទីរពេទ្យ សាលារៀន និងនៅជិតកន្លែងធ្វើការ ដែលងាយស្រួលឱ្យពួកយើងងាយប្រកបរបរចិញ្ចឹមជីវិត»។
វីអូឌី មិនអាចសុំការឆ្លើយតបពាក់ព័ន្ធនឹងករណីនេះពីអភិបាលរាជធានីភ្នំពេញ លោក ឃួង ស្រេង និងអ្នកនាំពាក្យ លោក ម៉េត មាសភក្តី បានទេ នៅថ្ងៃអង្គារនេះ។
បើតាមតំណាងពលរដ្ឋដែលចូលទៅជួបជាមួយមន្ត្រីរដ្ឋបាលរាជធានីភ្នំពេញ គឺមន្ត្រីស្ថាប័ននេះបានឱ្យពលរដ្ឋត្រលប់ទៅលំនៅឋានវិញ ហើយជួបជាមួយមន្ត្រីសង្កាត់ និងមន្ត្រីរដ្ឋបាលរាជធានីភ្នំពេញ នៅរសៀលថ្ងៃនេះ ដើម្បីរកដំណោះស្រាយ។
កាលពីចុងឆ្នាំ២០២០ ក្រសួងរៀបចំដែនដី នគរូបនីយកម្ម និងសំណង់ បានចេញលិខិតមួយជូនទៅរដ្ឋបាលរាជធានីភ្នំពេញ ឱ្យដោះស្រាយ ដោយចេញបណ្ណកម្មសិទ្ធិដីធ្លីជូនពលរដ្ឋនៅសហគមន៍ដូនឪ ក្រុម៣ សង្កាត់ជើងឯក ខណ្ឌដង្កោ រាជធានីភ្នំពេញ ក្រោយពួកគេដាក់ពាក្យស្នើសុំបណ្ណកម្មសិទ្ធិនេះនៅក្រសួងរៀបចំដែនដី។
ជុំវិញបញ្ហាដីធ្លីនេះដែរ អ្នកសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សូផាត ធ្លាប់បានលើកឡើងនាពេលថ្មីៗនេះថា ការដែលប្រជាពលរដ្ឋបារម្ភពីបណ្ណកម្មសិទ្ធិដីធ្លី គឺជារឿងត្រឹមត្រូវ។ លោកថា បើសិនជាមិនមានប្លង់កម្មសិទ្ធិ ពួកគាត់នឹងប្រឈមនឹងការបណ្ដេញចេញដោយបង្ខំនៅថ្ងៃណាមួយ ហើយដីរបស់ពួកគាត់អាចនឹងធ្លាក់ទៅក្នុងដៃរបស់ក្រុមហ៊ុនឬជនមានអំណាចណាមួយក្រោមរូបភាពអភិវឌ្ឍន៍។
ចំណែកប្រធានគម្រោងសិទ្ធិលំនៅឋាន និងស្រាវជ្រាវ នៃអង្គការសមាគមធាងត្នោត លោក ស៊ាង មួយឡៃ មានប្រសាសន៍ថា រដ្ឋាភិបាលបានកាត់ផ្ទៃបឹងនានាជាច្រើនឱ្យទៅក្រុមហ៊ុនឯកជន ស្ថាប័នរដ្ឋ និងអ្នកមានលុយមានអំណាច ដែលបង្កឱ្យមានភាពអយុត្តិធម៌សង្គម។
មន្ត្រីសង្គមស៊ីវិលរូបនេះលើកឡើងថា ក្រុមហ៊ុនឯកជន ស្ថាប័នរដ្ឋ និងអ្នកមានលុយមានអំណាចទាំងនេះ មានសិទ្ធិទទួលបានដីបឹងមកធ្វើជាកម្មសិទ្ធិ ប៉ុន្តែសម្រាប់ប្រជាពលរដ្ឋក្រីក្រដែលរស់នៅនិងអាស្រ័យផលនៅជាប់បឹងនោះរាប់ឆ្នាំ បែរជាមិនត្រូវទទួលបានកម្មសិទ្ធិលើដីរបស់ខ្លួន និងត្រូវរងនូវការបណ្តេញចេញពីលំនៅដ្ឋានទាំងបង្ខំថែមទៀត។
លោកបន្ថែមថា៖ «យើងឃើញថា ប្រជាពលរដ្ឋក្រីក្រដែលរស់នៅតាំងពីយូរណាស់មកហើយ នៅតាមទីតាំងតំបន់ជាប់បឹងនោះ ត្រូវបានគេបណ្តេញចេញ ឬគំរាមកំហែងឱ្យចេញពីទីតាំងហ្នឹង ហើយយកដីនៅទីតាំងហ្នឹងទៅឱ្យអ្នកមានលុយមានអំណាចវិញ ដែលបញ្ហានេះ វាបង្កឱ្យមានការឈឺចាប់ និងប៉ះពាល់ធ្ងន់ដល់សិទ្ធិរបស់ប្រជាពលរដ្ឋ»។
កាលពីខែមីនា ឆ្នាំ២០២២នេះ រដ្ឋាភិបាលបានចេញអនុក្រឹត្យជាបន្តបន្ទាប់កាត់ផ្ទៃដី «បឹងជើងឯក» ទំហំជាង១២ហិកតា ស្ថិតក្នុងខណ្ឌមានជ័យ និងខណ្ឌដង្កោ រាជធានីក្នំពេញ និងក្រុងតាខ្មៅ ខេត្តកណ្ដាល ទៅឱ្យឧកញ៉ា ឡោក ហ៊ួរ និងក្រសួងមហាផ្ទៃសម្រាប់ធ្វើកម្មសិទ្ធិ និងអភិវឌ្ឍន៍ផ្សេងៗ៕