សហមេធាវីការពារសិទ្ធិឱ្យអតីតមន្រ្តីជាន់ខ្ពស់ នៃគណបក្សសង្រ្គោះជាតិដែលត្រូវបានតុលាការរំលាយ រិះគន់ថា សំណុំរឿងនេះដូចមិនមានភាពជឿនលឿនទេ ខណៈដែលអង្គហេតុចុងក្រោយ ដែលតុលាការបានកំណត់ ហើយដាក់ឱ្យគ្រប់ភាគីមានការដេញដោលលើនីតិវិធីនៃអង្គសេចក្ដី នៅបន្តសាចុះសាឡើង ដែលជំរុញឱ្យសវនាការនេះចេះតែបន្តអូសបន្លាយពេលវេលាកាន់តែយូរទៅៗ។
ថ្លែងប្រាប់ វីអូឌី តាមទូរសព្ទ នៅថ្ងៃទី២៧ ខែកក្កដានេះ លោកមេធាវី ផែង ហេង ដែលជាសហមេធាវីការពារក្ដីឱ្យលោក កឹម សុខា បញ្ជាក់ថា ទាំងតំណាងអយ្យការ និងសហមេធាវីការពារក្ដីរបស់រដ្ឋាភិបាល បានប្រើប្រាស់ឃ្លីបវីដេអូច្រំដែលៗ ដើម្បីយកមកចោទសួរ និងដាក់បន្ទុកក្តីរបស់ខ្លួន។ លោកបន្តថា បើពិនិត្យទៅលើការតាំងសំណួរ ហាក់ចាកឆ្ងាយពីអង្គហេតុដែលនិយាយអំពីបទប្រទូសរ៉ាយ។
លោកបន្តថា៖ «សំណួរ ឃើញអយ្យការគាត់យកវីដេអូដដែលយកមកចាក់សួរបកទៅបកមក ហើយឃើញវីដេអូមួយពីរហ្នឹង ឃើញថាដូចជាចាក់ប៉ុន្មានសេអង់ជាប់ៗគ្នា។ បើសំណួរវិញ ឃើញតែនៅជុំវិញសម្ដីរបស់ឯកឧត្ដម សម រង្ស៊ី និយាយហ្នឹងមានន័យថាម៉េច! ហើយសម្ដីឯកឧត្ដម កឹម សុខា សម្ដី ហូរ វ៉ាន់ និងសម្ដីរបស់ឯកឧត្តម ប៉ុល ហំម អីហ្នឹង ដែលនៅទីលានប្រជាធិបតេយ្យ សួរបកចុះបកឡើងតែពីរឿងអំពីឯកឧត្ដម កឹម សុខា យកស្បៀងអាហារឱ្យបាតុករអីហ្នឹង»។
លោក ប្លង់ សុផល តំណាងយ្យការអមសាលាដំបូងរាជធានីភ្នំពេញ ថ្លែងការពារនៅក្នុងអង្គជំនុំជម្រះថា ថ្វីត្បិតនេះជាវីដេអូចាស់ ហើយសំណួរខ្លះស្តាប់ទៅហាក់ដូចគ្នាមែន ប៉ុន្តែវាកើតឡើងនៅទីតាំងផ្សេងគ្នា។ ចំណែកជនជាប់ចោទមានសិទ្ធិមិនឆ្លើយបាន នូវអ្វីដែលតំណាងអយ្យការសួរ រីឯសិទ្ធិនៃការតាំងសំណួរ វាក៏ជាសិទ្ធិរបស់អយ្យការដែរ។ តើនេះជាការជំរិតយកចម្លើយពីជនជាប់ចោទមែនដែរទេ? នេះជាការឌឺដងវិញឱ្យលោក ផែង ហេង ដែលជាសហមេធាវីការពារសិទ្ធិលោក កឹម សុខា។ សហមេធាវីរូបនេះជម្រាបអង្គសវនាការថា រាល់ការតាំងសំណួររបស់លោក ប្លង់ សុផល ដែលជាតំណាងអយ្យការ គឺជាការចាប់ជំរិតយកចម្លើយពីកូនក្តីរបស់ខ្លួន។
គេសង្កេតឃើញថា សម្រាប់សវនាការលើកទី៥០ នៅព្រឹកថ្ងៃពុធនេះ នៅតែជានាទីរបស់តំណាងអយ្យការ និងសហមេធាវីការពារក្ដីរបស់រដ្ឋាភិបាល តាំងសំណួរឱ្យជនជាប់ចោទ លោក កឹម សុខា ឆ្លើយ។ ភាគីទាំងពីរបានប្រើប្រាស់ឃ្លីបវីដេអូដែលគេដឹងជាទូទៅថា ជាឃ្លីបវីដេអូដែលបានប្រើប្រាស់ រួចមកហើយ ហើយក៏ប្រើប្រាស់ច្រើនលើកមកហើយដែរ ក្នុងការចោទសួរនិងដាក់បន្ទុកលោក កឹម សុខា។
ឃ្លីបវីដេអូដែលតុលាការយកមកធ្វើជាសម្អាងហេតុ ដើម្បីដាក់បន្ទុកនេះ រួមមាន សកម្មភាពធ្វើមហាបាតុកម្មនៅទីលានប្រជាធិបតេយ្យ កាលពីចុងខែធ្នូ ឆ្នាំ២០១៣ និងដើមខែមករា ឆ្នាំ២០១៤ ជាដើម។ បើពិនិត្យអំពីឃ្លីបវីដេអូដែលតុលាការយកធ្វើជាភស្តុតាងក្នុងការចោទសួរនេះ ភាគច្រើនជាសកម្មភាព នៃការប្រកាសរបស់លោក សម រង្ស៊ី លោក ហូរ វ៉ាន់ និងលោក កឹម សុខា។ តុលាការព្យាយាមច្បិចយកពាក្យមួយឃ្លាៗរបស់ជនជាប់ចោទ មកតាំងជាសំណួរដើម្បីដាក់បន្ទុក។
សំណួរភាគច្រើនរបស់តំណាងអយ្យការ និងសហមេធាវីការពារក្ដីរបស់រដ្ឋាភិបាល បានចោទសួរជុំវិញគោលបំណងនៃការថ្លែងសារនយោបាយនៅទីលានប្រជាធិបតេយ្យ ហើយហេតុអីបានមានបាតុកម្មក្រៅពីទីលានប្រជាធិតេយ្យ ដូចជាបាតុកម្មនៅផ្លូវវេងស្រេង និងស្ទឹងមានជ័យ ជាដើម។
លើកនេះ លោក កឹម សុខា ដែលនៅក្នុងរង្វង់ក្រចកសេះ សង្កេតឃើញថា ហាក់ព្យាយាមបដិសេធ ក្នុងការឆ្លើយតបរាល់សំណួររបស់មេធាវី និងតំណាងអយ្យការ បើទោះជាលោកត្រូវបានតុលាការព្យាយាមចោទសួររហូតដល់ម៉ោងបិទបញ្ចប់សវនាការក្តី។ ចម្លើយរបស់ជនជាប់ចោទ ភាគច្រើនលោកជម្រាបអង្គជំនុំជម្រះថា បានឆ្លើយរួចហើយ និងសុំមិនធ្វើអត្ថាធិប្បាយជាដើម។
បើទោះជាបែបណា គេសង្កេតឃើញថា ប្រធានក្រុមប្រឹក្សាជំនុំជម្រះ លោក កូយ សៅ បញ្ជាក់តបទៅនឹងតំណាងអយ្យការ ថាអ្វីដែលជនជាប់ចោទមិនឆ្លើយ មានន័យថាគឺជាចម្លើយរួចទៅហើយ ហេតុនេះមិនចាំបាច់ទាមទារឱ្យជនជាប់ចោទត្រូវតែឆ្លើយនូវរាល់សំណួររបស់តំណាងអយ្យការទេ។ ប្រធានក្រុមប្រឹក្សាជំនុំជម្រះរូបនេះជំរុញឱ្យតំណាងអយ្យការ លោក ប្លង់ សុផល ធ្វើយ៉ាងណារៀបចំសំណួរឱ្យបានខ្លី ដើម្បីបន្តនីតិវិធីថ្មីទៀត។
លោក យី សុខសាន្ត មន្រ្តីស៊ើបអង្កេត និងការពារសិទ្ធិមនុស្ស នៃសមាគមការពារសិទ្ធិមនុស្ស អាដហុក ឱ្យដឹងថា បើអង្កេតពីការដេញដោលពេញមួយព្រឹកនេះ ដូចរកមិនឃើញអ្វីដែលថ្មីនៅឡើយទេ។លោកបន្តថា តុលាការនៅព្យាយាមបន្តសួរនាំជនជាប់ចោទតែអំពីរឿងចាស់ៗដែលបានសួររួចហើយ។ ជាងនេះទៀត បើពិនិត្យទៅលើឃ្លីបវីដេអូវិញ ក៏ជាវីដេអូដែលតុលាការយកមកប្រើប្រាស់ ក្នុងការសួរនាំជនជាប់ចោទជាហូរហែមកហើយដែរ។
លោកបន្តថា៖ «ដែលតាំងសំណួរដោយមិនមានផលប្រយោជន៍ ហើយមើលទៅហាក់ដូចជាពន្យារពេលនៃសវនាការ ហើយទាំងព្រះរាជអាជ្ញា ក៏ដូចជាមេធាវីចោទប្រកាន់គ្នា ចេះតែអូសបន្លាយពេល។ តាមការកត់សម្គាល់របស់ខ្ញុំ នៅថ្ងៃនេះ គឺថាការរីកចម្រើននៃសាលាក្ដីនេះហាក់ដូចជាយឺត»។
បើតាមមន្រ្តីការពារសិទ្ធិមនុស្សរូបនេះ ករណីលោក កឹម សុខា វាជារឿងនយោបាយ ហេតុនេះការប្រើប្រាស់តុលាការមកដោះស្រាយ វាមិនងាយចប់ទេ ប្រសិនបើគ្មានការសម្របសម្រួលខាងនយោបាយនោះ។
ចំណែកនៅខាងមុខបរិវេណតុលាការឯណោះវិញ សង្កេតឃើញថា អ្នកគាំទ្រលោក កឹម សុខា លើកនេះ គឺមានចំនួនច្រើន បើធៀបនឹងសព្វមួយដង ស្របពេលកម្លាំងនគរបាលក៏ត្រូវបានគេដាក់ពង្រាយ ក្នុងគោលបំណងដើម្បីពង្រឹងសន្តិសុខមានចំនួនច្រើនដែរ នៅព្រឹកថ្ងៃពុធនេះ។
ការជំនុំជម្រះលើកនេះក៏មិនខុសពីលើកមុនៗដែរ នៅនាទីចុងក្រោយនៃសវនាការ ភាគីក្នុងរឿងក្ដីបន្តពាក់មុខយក្សដាក់គ្នាជាថ្មីទៀត។ គេសង្កេតឃើញថា ភាពតានតឹងកើតឡើង គឺនៅពេលមានសំណួរតាំងឡើងដោយតំណាងអយ្យការ លោក ប្លង់ សុផល និងលោក ឆាយ ហុង។
គេកត់សម្គាល់ឃើញថា សំណួរដែលនាំឱ្យលោក កឹម សុខា ប្រតិកម្ម ដែលផ្តើមដោយតំណាងអយ្យការលោក ឆាយ ហុង គឺជុំវិញថាតើមូលហេតុអ្វីបានលោកអំពាវនាវឱ្យមានការផ្តល់ស្បៀងអាហារទៅដល់បាតុករខុសច្បាប់ នៅទីផ្សេងក្រៅពីទីលានប្រជាធិបតេយ្យ?
ស្ថិតនៅក្នុងរង្វង់ក្រចកសេះ លោក កឹម សុខា ឆ្លើយដោយសម្លឹងមើលមុខតំណាងអយ្យការ ថានេះជាសំណួរច្រំដែលៗ ប្រហែលជាក្នុងបេះដូងនិងខួរក្បាលលោកខ្មៅ ទើបសួរសំណួរបែបនេះបាន។
បើតាមអតីតមេដឹកនាំជាន់ខ្ពស់រូបនេះ អ្វីដែលលោកអំពាវនាវនៅទីលានប្រជាធិបតេយ្យកាលណោះ គឺសម្ដែងពីសមានចិត្តរបស់លោកចង់ជួយជនរងគ្រោះ ហើយក៏ជាសម្ដីដែលសន្តិភាពដែរ។ ទាក់ទិនសំណុំរឿងសន្ទិដិ្ឋភាព ឬត្រូវរ៉ូវដោយសម្ងាត់ជាមួយភ្នាក់ងារបរទេសនេះ តុលាការនឹងកំណត់យកថ្ងៃទី៣ ខែសីហា ជាថ្ងៃដែលនឹងត្រូវបន្តនីតិវិធីដេញដោលជាថ្មីទៀត៕