គណបក្សក្រៅរដ្ឋាភិបាលមួយចំនួនប្រកាសគាំទ្ររដ្ឋសភា ដែលអនុម័តលើសេចក្ដីព្រាងច្បាប់វិសោធនកម្មរដ្ឋធម្មនុញ្ញ និងច្បាប់ធម្មនុញ្ញបន្ថែមទាំង៨មាត្រា ដោយថា ការធ្វើវិសោធនកម្មរដ្ឋធម្មនុញ្ញលើកទី១០នេះ ជាការលើកកម្ពស់លទ្ធិប្រជាធិបតេយ្យ និងស្របតាមគោលការណ៍របបសភានិយម។
សេចក្តីថ្លែងការណ៍របស់គណបក្សខ្មែររួបរួមជាតិ ដែលមានលោក ញឹក ប៊ុនឆៃ ជាប្រធាន បានលើកឡើងថា ខ្លួនគាំទ្រទាំងស្រុងចំពោះការធ្វើវិសោធនកម្មរដ្ឋធម្មនុញ្ញនៅពេលនេះ។
គណបក្សនេះយល់ឃើញថា ការធ្វើវិសោធនកម្មរដ្ឋធម្មនុញ្ញលើកទី១០នេះ ជាការលើកកម្ពស់លទ្ធិប្រជាធិបតេយ្យ និងស្របទៅតាមគោលការណ៍របបសភានិយម។
គណបក្សខ្មែរតែមួយ ដែលមានលោក គុជ លី ជាប្រធាន ក៏បានចេញសេចក្តីថ្លែងការណ៍ប្រកាសគាំទ្រចំពោះការអនុម័តលើសេចក្តីព្រាងច្បាប់នេះដែរ ដោយថា ការធ្វើវិសោធនកម្មរដ្ឋធម្មនុញ្ញលើកទី១០នេះ គឺដើម្បីការពារប្រព័ន្ធប្រជាធិបតេយ្យសេរីពហុបក្ស និងរបបរាជាធិបតេយ្យអាស្រ័យរដ្ឋធម្មនុញ្ញ តាមបែបរបបសភានិយម និងជាការពង្រឹងបន្ថែមនូវលទ្ធិប្រជាធិបតេយ្យមូលដ្ឋានដែលមានប្រជាពលរដ្ឋជាម្ចាស់ឆ្នោត និងម្ចាស់អំណាច។
ចំណែក គណបក្សសំបុកឃ្មុំសង្គមប្រជាធិបតេយ្យ របស់លោក ម៉ម សូណង់ដូ និងគណបក្សយុវជនកម្ពុជា របស់លោក ពេជ្រ ស្រស់ នៅថ្ងៃទី២៨ ខែកក្កដានេះ ក៏បានប្រកាសគាំទ្រទាំងស្រុងចំពោះការអនុម័តរបស់រដ្ឋសភាលើសេចក្តីព្រាងច្បាប់វិសោធនកម្មរដ្ឋធម្មនុញ្ញនេះដែរ។
សូមបញ្ជាក់ថា សេចក្តីព្រាងច្បាប់វិសោធនកម្មរដ្ឋធម្មនុញ្ញនិងច្បាប់ធម្មនុញ្ញបន្ថែមចំនួន៨មាត្រា ត្រូវបានរដ្ឋសភាអនុម័តទាំងស្រុងនៅព្រឹកថ្ងៃព្រហស្បតិ៍នេះ ដោយសំឡេង១០៥លើ១០៦សំឡេង ដោយមិនមានការពិភាក្សាផុសផុលនោះទេ៕