ក្រសួងធនធានទឹក និងឧតុនិយម អំពាវនាវដល់ប្រជាពលរដ្ឋឱ្យមានការប្រុងប្រយ័ត្នចំពោះបញ្ហាអាកាសធាតុ ដោយថា កម្ពុជានឹងទទួលរងឥទ្ធិពលពីជ្រលងនៃប្រព័ន្ធសម្ពាធទាប (ITCZ) ហើយបណ្ដារាជធានី-ខេត្ត នឹងមានភ្លៀងធ្លាក់ពីកម្រិតមធ្យមទៅបង្គួរឬច្រើន ក្នុងរយៈពេល៧ថ្ងៃបន្ថែមទៀត ក្នុងនោះ ផ្នែកខ្លះក្នុងភូមិសាស្ត្រខេត្តកោះកុង និងព្រះសីហនុ អាចនឹងមានជំនន់ទឹកភ្លៀង។
សេចក្ដីជូនដំណឹងរបស់ក្រសួងធនធានទឹក និងឧតុនិយម នៅថ្ងៃទី០២ ខែសីហា ឆ្នាំ២០២២នេះ ឱ្យដឹងថា ចាប់ពីថ្ងៃទី០៣ ដល់ថ្ងៃទី០៩ ខែសីហា កម្ពុជានឹងទទួលរងឥទ្ធិពលពីកម្រិតសម្ពាធទាប (ITCZ) ដែលអូសបន្លាយកាត់លើភាគខាងជើងប្រទេសថៃ ឡាវ វៀតណាម ជាមួយនឹងខ្យល់មូសុងនិរតីបក់ក្នុងល្បឿនបង្គួរទៅខ្លាំង មកលើតំបន់សមុទ្រ។
ស្ថានភាពអាកាសធាតុនេះ ក្រសួងថា នឹងបណ្ដាលឱ្យកម្ពុជាមានភ្លៀងធ្លាក់ក្នុងកម្រិតមធ្យមទៅបង្គួរឬច្រើន លាយឡំទៅដោយផ្គរ រន្ទះ និងខ្យល់កន្ត្រាក់ ដែលអាចបណ្ដាលឱ្យផ្នែកខ្លះនៃខេត្តកោះកុង និងខេត្តព្រះសីហនុ អាចប្រឈមនឹងមានជំនន់ទឹកភ្លៀង ខណៈនៅលើផ្ទៃសមុទ្រអាចមានភ្លៀង ខ្យល់បក់បោកខ្លាំង និងរលកសមុទ្រខ្ពស់។
ក្រសួងបន្តថា ស្ថានភាពបែបនេះនឹងធ្វើឱ្យតំបន់ទំនាបកណ្ដាល មានសីតុណ្ហភាពអប្បបរមាពី២៣ដល់២៥អង្សាសេ និងអតិបរមាពី៣២ ដល់៣៤អង្សាសេ។ សម្រាប់តំបន់ខ្ពង់រាប នឹងមានសីតុណ្ហភាពអប្បបរមាពី២២ដល់២៤អង្សាសេ និងអតិបរមាពី៣១ដល់៣៣អង្សាសេ។ ចំណែកឯតំបន់សមុទ្រ នឹងមានសីតុណ្ហភាពអប្បបរមាពី២៣ដល់២៥អង្សាសេ និងអតិបរមាពី៣១ដល់៣៣អង្សាសេ៕