កិច្ចប្រជុំរដ្ឋមន្រ្តីការបរទេសអាស៊ានលើកទី៥៥ និងកិច្ចប្រជុំពាក់ព័ន្ធផ្សេងទៀត បានចាប់ផ្ដើមហើយនៅរាជធានីភ្នំពេញ ប្រទេសកម្ពុជា នៅព្រឹកថ្ងៃទី៣ ខែសីហានេះ ដោយមានការចូលរួមថ្លែងស្វាគមន៍ និងបើកកិច្ចប្រជុំដោយលោកនាយករដ្ឋមន្រ្តី ហ៊ុន សែន។
កិច្ចប្រជុំនេះមានការចូលរួមពីអគ្គលេខាធិការអាស៊ាន និងរដ្ឋមន្រ្តីការបរទេសអាស៊ានចំនួន៩ លើកលែងតែរដ្ឋមន្រ្តីការបរទេសមីយ៉ាន់ម៉ា មិនត្រូវបានអញ្ជើញឱ្យចូលរួម។
ក្រៅពីរដ្ឋមន្រ្តីការបរទេសអាស៊ានទាំង៩ កិច្ចប្រជុំនេះក៏មានការចូលរួមពីរដ្ឋមន្រ្តីការបរទេសនៃប្រទេសមហាអំណាចមួយចំនួន រួមមាន រដ្ឋមន្រ្តីការបរទេសសហរដ្ឋអាមេរិក លោក អែនតូនី ប្លីងខិន (Antony J. Blinken) រដ្ឋមន្រ្តីការបរទេសចិន លោក វ៉ាង យី (Wang Yi) រដ្ឋមន្រ្តីការបរទេសរុស្សី ស៊ែហ្គេ ឡាវរ៉ូវ (Sergei Lavrov) និងរដ្ឋមន្រ្តីការបរទេសជប៉ុន លោក ហាយ៉ាស៊ិ យ៉ុស៊ិម៉ាសា (Hayashi Yoshimasa) ជាដើម។
ថ្លែងស្វាគមន៍និងបើកកិច្ចប្រជុំនេះ ប្រមាណ២០នាទី លោកនាយករដ្ឋមន្រ្តី ហ៊ុន សែន បានលើកឡើងពីបញ្ហាប្រឈមសំខាន់ៗមួយចំនួនដែលតំបន់អាស៊ាន និងពិភពលោក កំពុងជួបប្រទះ ក្នុងនោះមានទាំងបញ្ហាភូមិសាស្រ្តនយោបាយ សង្គម និងសេដ្ឋកិច្ច ដែលលោកថាតម្រូវឱ្យមានដំណោះស្រាយរួមគ្នារវាងភាគីពាក់ព័ន្ធ។ បញ្ហាទាំងអស់នោះមានដូចជា វិបត្តិជំងឺកូវីដ-១៩ ដែលកំពុងតែអូសបន្លាយនៅលើពិភពលោក ការដាក់សម្ពាធរបស់ប្រទេសមហាអំណាចលើប្រទេសតូចៗ ការកើនឡើងនៃសម្ពន្ធមិត្តតូចៗនៅលើពិភពលោក ការប្រកួតប្រជែងផ្នែកសព្វាវុធ ការដាក់ទណ្ឌកម្មសេដ្ឋកិច្ច វិបត្តិសេដ្ឋកិច្ច និងហិរញ្ញវត្ថុសកល វិបត្តិនយោបាយនៅក្នុងប្រទេសមីយ៉ាន់ម៉ា សង្រ្គាមនៅក្នុងប្រទេសអ៊ុយក្រែនដែលកំពុងបង្កឱ្យមានបញ្ហាធ្ងន់ធ្ងរដល់សេដ្ឋកិច្ច សន្តិសុខស្បៀង ថាមពល និងកំពុងធ្វើឱ្យពិភពលោកបែកខ្ញែកគ្នាជាថ្មី។ល។
ចំណែកនៅក្នុងបរិបទអាស៊ានវិញ លោក ហ៊ុន សែន ក៏បានថ្លែងរម្លឹកឡើងវិញពីការប្រហារជីវិតសកម្មជននយោបាយប្រឆាំងចំនួន៤រូប កាលពីពេលថ្មីៗនេះ ដោយរបបយោធាមីយ៉ាន់ម៉ា ដែលលោកថា កម្ពុជានិងពិភពលោកមានការខកចិត្តនិងតក់ស្លុតចំពោះហេតុការណ៍មួយនេះ។
គេសង្កេតឃើញថា កិច្ចប្រជុំរដ្ឋមន្រ្តីការបរទេសអាស៊ាន និងកិច្ចប្រជុំពាក់ព័ន្ធនៅពេលនេះ ចំពេលដែលភាពតានតឹងផ្នែកភូមិសាស្រ្តនយោបាយរវាងសហរដ្ឋអាមេរិក និងចិន កំពុងតែឡើងកម្ដៅខ្លាំងជាថ្មីទៀត ក្រោយពីប្រធានសមាជិកសភាអាមេរិក លោកស្រី ណានស៊ី ផេឡូស៊ី (Nancy Pelosi) ធ្វើដំណើរទស្សនកិច្ចទៅដល់កោះតៃវ៉ាន់កាលពីយប់មិញ ដែលរដ្ឋាភិបាលចិនចាត់ទុកសកម្មភាពរបស់អាមេរិកនៅពេលនេះ ថាជាការរំលោភដែនអធិបតេយ្យភាពរបស់ចិន ដោយសារតែប្រទេសមហាអំណាចនៅអាស៊ីមួយនេះចាត់ទុកកោះតៃវ៉ាន់គ្រាន់តែជាអាណាខេត្តមួយរបស់ខ្លួនប៉ុណ្ណោះ។
មានការរំពឹងថា កិច្ចប្រជុំរដ្ឋមន្រ្តីការបរទេសអាស៊ាននេះនឹងអាចលើកឡើងនូវប្រធានបទភាពតានតឹងនយោបាយរវាងអាមេរិកនិងចិននៅពេលនេះ។ ប៉ុន្តែនៅក្នុងសុន្ទរកថាថ្លែងបើករបស់លោកនាយករដ្ឋមន្រ្តី ហ៊ុន សែន នៅព្រឹកនេះ គេមិនឃើញលោកលើកឡើងអំពីភាពតានតឹងនេះនៅឡើយ បើទោះជាកម្ពុជាគឺជាមិត្តដែកថែបរបស់ចិនក៏ដោយ។
កិច្ចប្រជុំរដ្ឋមន្រ្តីការបរទេសអាស៊ានលើកទី៥៥ និងកិច្ចប្រជុំពាក់ព័ន្ធ នឹងប្រព្រឹត្តទៅរយៈពេល៣ថ្ងៃ ចាប់ពីថ្ងៃនេះរហូតដល់ថ្ងៃទី៥ ខែសីហា។ ក្នុងរយៈពេល៣ថ្ងៃនេះ គេរំពឹងថា បញ្ហាប្រឈមធំៗទាំងថ្មីទាំងចាស់នៅក្នុងតំបន់អាស៊ាន និងពិភពលោក នឹងត្រូវបានលើកយកមកពិភាក្សា៕
