ក្រសួងការពារជាតិរបស់តៃវ៉ាន់ បានឱ្យដឹងនៅថ្ងៃព្រហស្បតិ៍នេះថា យោធារបស់ខ្លួននឹងបន្តពង្រឹងការការពារដែនកោះរបស់ខ្លួនប្រកបដោយការប្រុងប្រយ័ត្នខ្ពស់ ខណៈខ្លួនក៏ត្រៀមចាត់វិធានការជាក់ស្ដែងក្នុងករណីដែលមានការឈ្លានពានពីសត្រូវផងដែរ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ការលើកឡើងនេះត្រូវបានធ្វើឡើង ខណៈកងទ័ពចិនបច្ចុប្បន្នកំពុងតែធ្វើសមយុទ្ធយោធានៅទីតាំងចំនួន៦ ដែលរួមមានទាំងការបាញ់ផ្ទាល់នៅលើដែនទឹក និងដែនអាកាស ជុំវិញកោះតៃវ៉ាន់ផងដែរ។
សមយុទ្ធយោធាដែលត្រូវបានរំពឹងថា នឹងធ្វើឡើងរហូតដល់ថ្ងៃអាទិត្យខាងមុខនេះ គឺកើតឡើងបន្ទាប់ពីប្រធានរដ្ឋសភាសហរដ្ឋអាមេរិក លោកស្រី ណានស៊ី ផេឡូស៊ី (Nancy Pelosi) បានធ្វើដំណើរទស្សនកិច្ចទៅកាន់កោះតៃវ៉ាន់ ដើម្បីបង្ហាញពីការប្តេជ្ញាចិត្តមិនផ្លាស់ប្តូររបស់អាមេរិក ក្នុងការគាំទ្រលទ្ធិប្រជាធិបតេយ្យដ៏រស់រវើករបស់តៃវ៉ាន់។
ទាក់ទិននឹងករណីនេះ ក្រសួងការពារជាតិតៃវ៉ាន់បានបន្ថែមថា យោធារបស់ខ្លួនបច្ចុប្បន្នកំពុងតែតាមដានយ៉ាងយកចិត្តទុកដាក់សម្រាប់ស្ថានការណ៍មួយនេះ ទាំងនៅក្នុងច្រកសមុទ្រតៃវ៉ាន់ និងតំបន់នៅជិតដែនកោះរបស់ខ្លួន ខណៈកងទ័ពទាំងអស់ក៏កំពុងតែធ្វើការហ្វឹកហាត់ប្រចាំថ្ងៃជាធម្មតាផងដែរ។
គួរបញ្ជាក់ថា ភាពតានតឹងរវាងតៃវ៉ាន់និងចិនបានកើនឡើងខ្លាំងក្នុងរយៈពេលចុងក្រោយនេះ ខណៈដែលចិននៅតែបន្តអះអាងថាតៃវ៉ាន់គឺជាទឹកដីរបស់ខ្លួន។
ជាការឆ្លើយតប តៃវ៉ាន់ធ្លាប់បានលើកឡើងថា ខ្លួននឹងបន្តពង្រឹងការការពាររបស់ខ្លួន ដើម្បីធានាឱ្យបានថាគ្មាននរណាម្នាក់អាចបង្ខំឱ្យកោះនេះ ទទួលយកផ្លូវដែលចិនបានរៀបចំ ដោយមិនផ្តល់សេរីភាព និងប្រជាធិបតេយ្យនោះទេ៕