លោកប្រធានាធិបតី វ៉ូឡូឌីមៀ ហ្សេលេនស្គី (Volodymyr Zelenskiy) បានឱ្យដឹងនៅថ្ងៃព្រហស្បតិ៍នេះថា ប្រទេសអ៊ុយក្រែន បច្ចុប្បន្នកំពុងតែស្វែងរកឱកាសណាមួយក្នុងការជួបពិភាក្សាដោយផ្ទាល់ជាមួយប្រធានាធិបតីចិន លោក ស៊ី ជីនពីង ដើម្បីឱ្យលោកជួយសម្របសម្រួលបញ្ចប់សង្រ្គាមដ៏រ៉ាំរ៉ៃរបស់ខ្លួនជាមួយប្រទេសរុស្ស៊ី។ នេះបើតាមសារព័ត៌មាន South China Morning Post ដែលត្រូវបានយកមកចុះផ្សាយបន្តដោយទីភ្នាក់ងារសារព័ត៌មាន Reuters។
នៅក្នុងបទសម្ភាសន៍ជាមួយសារព័ត៌មាន South China Morning Post មេដឹកនាំអ៊ុយក្រែនរូបនេះ ត្រូវបានរាយការណ៍ថា បានជំរុញឱ្យប្រទេសចិនប្រើប្រាស់ឥទ្ធិពលនយោបាយនិងសេដ្ឋកិច្ចដ៏ខ្លាំងក្លារបស់ខ្លួនលើប្រទេសរុស្ស៊ី ដើម្បីបញ្ចប់ការប្រយុទ្ធគ្នា។
ប្រភពដដែលបានបន្តស្រង់សម្តីលោកប្រធានាធិបតី វ៉ូឡូឌីមៀ ហ្សេលេនស្គី ដោយបានលើកឡើងថា៖ «ពួកគេ [ចិន] ជារដ្ឋដ៏មានឥទ្ធិពលនិងមានសេដ្ឋកិច្ចដ៏ខ្លាំងក្លាមួយ ដូច្នេះ [ពួកគេ] អាចនឹងមានឥទ្ធិពលនយោបាយនិងសេដ្ឋកិច្ចលើប្រទេសរុស្ស៊ី»។
ជាមួយគ្នានេះ លោកបន្ថែមថា៖ «ប្រទេសចិនក៏ជាសមាជិកអចិន្ត្រៃយ៍មួយនៃក្រុមប្រឹក្សាសន្តិសុខនៃអង្គការសហប្រជាជាតិ [UN Security Council] ផងដែរ»។
គួរបញ្ជក់ថា ភាពតានតឹងរវាងរុស្ស៊ី និងអ៊ុយក្រែន ក្នុងរយៈពេលចុងក្រោយនេះបានចាប់ផ្ដើមកើនឡើងខ្លាំង បន្ទាប់ពីរុស្ស៊ីបានបើកការឈ្លានពានទ្រង់ទ្រាយធំទៅលើប្រទេសក្បែរខាងរបស់ខ្លួនមួយនេះ ដែលធ្វើឡើងបន្ទាប់ពីការប្រកាសសង្រ្គាមមួយដោយប្រធានាធិបតី លោក វ្លាឌីមៀរ ពូទីន។
ទាក់ទិននឹងករណីនេះ ថ្នាក់ដឹកនាំនៃក្រុមប្រទេសមានសេដ្ឋកិច្ចជឿនលឿនទាំង៧ (G7) កាលពីពេលកន្លងទៅ ក៏ធ្លាប់បានជំរុញដល់ប្រទេសចិនឱ្យប្រើប្រាស់ឥទ្ធិពលរបស់ខ្លួនជាមួយរុស្ស៊ី ដើម្បីឱ្យប្រទេសមួយនេះបញ្ឈប់ការឈ្លានពានរបស់ខ្លួនលើអ៊ុយក្រែនផងដែរ។
ទោះជាយ៉ាងណា ប្រទេសចិនបានធ្វើការឆ្លើយតបថា ការដាក់ទណ្ឌកម្មនានាលើរុស្ស៊ី គឺមិនអាចដោះស្រាយវិបត្តិនៅអ៊ុយក្រែនបានឡើយ ខណៈខ្លួនក៏បានរិះគន់សហរដ្ឋអាមេរិក និងសម្ពន្ធមិត្តរបស់ខ្លួនចំពោះការផ្គត់ផ្គង់អាវុធដល់អ៊ុយក្រែនផងដែរ៕