មេដឹកនាំសហជីពដ៏លេចធ្លោមួយរូបត្រូវបានក្រសួងការងារចេញលិខិតព្រមានទាក់ទងនឹងសកម្មភាពបង្ខិតបង្ខំបុគ្គលិកក្រុមហ៊ុនណាហ្គាវើលដ៍ឱ្យបន្តការតវ៉ារបស់ពួកគេ ខណៈក្រសួងលើកឡើងថាក៏នឹងចាត់វិធានការទៅតាមផ្លូវច្បាប់ ក្នុងករណីដែលមេដឹកនាំសហជីពរូបនោះនៅតែបន្តសកម្មភាពល្មើសច្បាប់នេះផងដែរ។
គួរបញ្ជាក់ថា មេដឹកនាំសហជីពនានាក្នុងរយៈពេលប៉ុន្មានសប្ដាហ៍ថ្មីៗនេះ ត្រូវបានសង្កេតឃើញថា បានចូលរួមផ្ដល់ការគាំទ្រយ៉ាងសកម្មដល់បុគ្គលិកក្រុមហ៊ុនណាហ្គាវើលដ៍ និងឃ្លាំមើលដោយយកចិត្តទុកដាក់លើសកម្មភាពតវ៉ារបស់ពួកគេ ដែលក្នុងនោះ ប្រធានសហព័ន្ធសហជីពកម្ពុជា (CATU) អ្នកស្រី យ៉ាង សុភ័ណ្ឌ ក៏បានលើកឡើងពីគម្រោងក្នុងការកៀរគរកម្មករនិយោជិតពីវិស័យកាត់ដេរឱ្យចូលរួមក្នុងការតវ៉ានេះផងដែរ។
ទាក់ទិននឹងករណីនេះ ក្រសួងការងារ កាលពីថ្ងៃព្រហស្បតិ៍សប្ដាហ៍មុន បានចេញលិខិតព្រមានប្រធានសហព័ន្ធសហជីពខាងលើនេះ ឱ្យបញ្ឈប់រាល់សកម្មភាពល្មើសច្បាប់ដែលខុសពីវិជ្ជាជីវៈ និងបង្ខិតបង្ខំឱ្យកម្មករបន្តធ្វើកូដកម្ម។
លិខិតរបស់ក្រសួងក៏បានលើកឡើងពីមាត្រាចំនួនបីក្នុងច្បាប់ស្ដីពីសហជីព ដែលក្នុងនោះរួមមាន មាត្រា៨១ អំពីការធ្វើសកម្មភាពក្រៅដែនអនុវត្តតាមទីតាំងភូមិសាស្រ្ត ឬតាមវិជ្ជាជីវៈ ឬតាមវិស័យដែលបានកំណត់ក្នុងលក្ខន្តិកៈរបស់ខ្លួន ដែលត្រូវពិន័យជាទឹកប្រាក់ប្រមាណជា១ ២៥០ដុល្លារ។
មាត្រា៨៩ អំពីការបង្ខិតបង្ខំឱ្យចូលរួមធ្វើកូដកម្ម ដែលពិន័យជាប្រាក់ប្រមាណជា១ ២៥០ដុល្លារ និងចុងក្រោយ មាត្រា៦៥ អំពីសកម្មភាពរបស់សហជីពដែលចាត់ទុកថាអនុវត្តមិនត្រឹមត្រូវ។
នៅក្នុងលិខិតដដែលនោះ ក្រសួងក៏បានស្នើឱ្យអ្នកស្រី យ៉ាង សុភ័ណ្ឌ បញ្ឈប់ការពាក់ព័ន្ធនឹងក្រុមតវ៉ាណាហ្គាវើលដ៍ផងដែរ។
ទោះជាយ៉ាងណា អ្នកស្រី យ៉ាង សុភ័ណ្ឌ ហាក់មិនមានការព្រួយបារម្ភទាក់ទងនឹងលិខិតឬការព្រមាននេះឡើយ ខណៈអ្នកស្រីបានអះអាងឱ្យដឹងកាលពីថ្ងៃសុក្រសប្ដាហ៍មុនថា ខ្លួននឹងបន្តការគាំទ្រការតវ៉ាចំពោះបុគ្គលិកកាស៊ីណូដែលត្រូវបានបណ្ដេញចេញទាំងនោះ។
អ្នកស្រីថា៖ «ខ្ញុំមានអារម្មណ៍ធម្មតា។ ខ្ញុំគ្មានបញ្ហាអ្វីឡើយជាមួយនឹងលិខិតព្រមានរបស់ក្រសួងនោះ ខណៈខ្ញុំមិនយល់ថាពួកគេចោទប្រកាន់ខ្ញុំដោយផ្អែកលើករណីអ្វីឡើយ។ ខ្ញុំមិនបានធ្វើសកម្មភាពអ្វីខុសច្បាប់នោះទេ»។
អ្នកស្រី យ៉ាង សុភ័ណ្ឌ បន្តថា ខ្លួនមានសិទ្ធិក្នុងការគាំទ្រសហជីពផ្សេងទៀត និងការតស៊ូមតិរបស់ពួកគេសម្រាប់សិទ្ធិការងារ។
មេដឹកនាំសហជីពខាងលើ កាលពីពេលកន្លងទៅ ក៏ធ្លាប់អះអាងឱ្យដឹងផងដែរថា ខ្លួនក៏នឹងកៀរគរកម្មកររោងចក្រកាត់ដេរឱ្យចូលរួមធ្វើបាតុកម្មគាំទ្រដល់កម្មករណាហ្គាវើលដ៍ ខណៈសហជីពផ្សេងទៀតនៅពេលនោះក៏បានសន្យាគាំទ្រចំពោះសកម្មភាពនេះផងដែរ។
ទោះជាយ៉ាងណា អ្នកស្រីមិនអាចផ្ដល់កាលបរិច្ឆេទជាក់លាក់ថាតើអ្នកស្រី និងសហជីពផ្សេងទៀតគ្រោងចូលរួមជាមួយកម្មករណាហ្គាវើលដ៍ខាងលើនេះនៅថ្ងៃណានោះទេ។
គួររម្លឹកថា បុគ្គលិកកម្មករក្រុមហ៊ុនណាហ្គាវើលដ៍បានផ្ទុះការតវ៉ា គិតចាប់តាំងពីខែធ្នូ ឆ្នាំ២០២១ រហូតមកដល់ពេលបច្ចុប្បន្ននេះ ដែលកើតឡើងបន្ទាប់ពីមានករណីកម្មករជាង១ ៣០០នាក់ត្រូវបានក្រុមហ៊ុនបញ្ឈប់ពីការងារ។
ទាក់ទិននឹងករណីនេះ អ្នកនាង ម៉ម សុវឌ្ឍិន ដែលជាកម្មករតវ៉ាមួយរូបបានឱ្យដឹងកាលពីសប្ដាហ៍មុនថា ការតវ៉ាដែលធ្វើឡើងកាលពីថ្ងៃសុក្រ គឺមានអ្នកចូលរួមតែ៩០នាក់ប៉ុណ្ណោះ ដោយក្នុងនោះ ពួកគេមួយចំនួនទៀតមានអាការមិនស្រួលខ្លួន ដោយសារតែបញ្ហាអាកាសធាតុ។
ទាក់ទិននឹងលិខិតព្រមានរបស់ក្រសួងវិញ អ្នកនាងថា អាជ្ញាធរនាពេលបច្ចុប្បន្នហាក់កំពុងតែចាប់ផ្ដើមធ្វើការចោទប្រកាន់អ្នករាល់គ្នា ដោយលើកឡើងពីមាត្រាមួយចំនួន។
អ្នកនាងបន្តថា ការចូលរួមធ្វើសកម្មភាពតវ៉ានេះ គឺជាការសម្រេចចិត្តពីកម្មករដោយផ្ទាល់ និងមិនមានការបង្ខិតបង្ខំដោយអ្នកណាម្នាក់ឡើយ។
អ្នកនាង ម៉ម សុវឌ្ឍិន បន្ថែមថា៖ «ក្នុងនាមជាកម្មករមួយរូប យើងពិតជាមានការសោកស្ដាយយ៉ាងខ្លាំង ដែលក្រសួងការងារគ្មានសមត្ថភាពស្វែងរកដំណោះស្រាយ។ ហើយផ្ទុយទៅវិញ ពួកគេបែរជាព្យាយាមចោទប្រកាន់អ្នកដទៃ [អ្នកព្យាយាមស្វែងរកដំណោះស្រាយ] ទៅវិញ»។
ទោះជាយ៉ាងណា លោក ហេង សួរ រដ្ឋលេខាធិការ និងជាអ្នកនាំពាក្យក្រសួងការងារ បានបញ្ជាក់ឱ្យដឹងថា ការព្រមាននឹងនៅតែបន្តធ្វើឡើង ប្រសិនបើសកម្មភាពល្មើសច្បាប់មិនត្រូវបានបញ្ចប់។
លោកថា៖ «ប្រសិនបើសកម្មភាពល្មើសច្បាប់នៅតែបន្តធ្វើឡើងដោយចេតនា នាយកដ្ឋានវិវាទការងារនឹងនាំបុគ្គលនោះទៅកាន់តុលាការដើម្បីចាត់ការតាមនីតិវិធីច្បាប់»។
លោក ហេង សួរ បន្តថា៖ «នាយកដ្ឋានវិវាទការងារ សង្ឃឹមថា លិខិតព្រមាន ឬការក្រើនរម្លឹកនេះ នឹងអាចឱ្យភាគីពាក់ព័ន្ធទាំងឡាយគិតគូរពិចារណាឡើងវិញអំពីផ្លូវច្បាប់។ ពេលខ្លះ ក្នុងនាមជាពលរដ្ឋ ពួកគេអាចភ្លេច ឬមិនយកចិត្តទុកដាក់។ ហេតុដូច្នេះហើយបានជានាយកដ្ឋានចេញលិខិតព្រមាន ឬការក្រើនរម្លឹកដល់គាត់ [អ្នកស្រី យ៉ាង សុភ័ណ្ឌ]»។
ជាមួយគ្នានេះ លោកបន្ថែមថា៖ «នៅពេលដែលគាត់បានទទួលលិខិតនោះ គាត់នឹងអានមាត្រាដែលពាក់ព័ន្ធទាំងឡាយសាឡើងវិញ ដោយរូបគាត់នឹងអាចយល់ និងកែប្រែសកម្មភាពរបស់គាត់បាន។ ក្រសួងឬមន្ត្រីជំនាញមិនចង់ឃើញអ្នកពាក់ព័ន្ធណាម្នាក់ជាប់ទោស ដោយពួកគេមិនដឹងថាខ្លួនបានប្រព្រឹត្តខុសច្បាប់ ឬមិនត្រឹមត្រូវនោះទេ»៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Prominent Union Leader Accused of ‘Coercing’ NagaWorld Protests