រដ្ឋាភិបាលអាចនឹងត្រូវចំណាយថវិការាប់សែនដុល្លារលើការដាំដើមឈើក្នុងព្រៃភ្នំតាម៉ៅឡើងវិញ ដែលត្រូវបានកាប់បំផ្លាញកាលពីសប្តាហ៍មុន ក្នុងនោះគេក៏សង្កេតឃើញមានការចូលរួមក្នុងការស្ដារ ឬជួសជុលការខូចខាតព្រៃបាត់បង់ឡើងវិញទាំងនេះពីអ្នកស្រឡាញ់បរិស្ថាននានា និងមួយផ្នែកធំដោយឧកញ៉ា ម៉ុង ឫទ្ធី ផងដែរ។
ទោះជាយ៉ាងណា ប្រធានក្រុមហ៊ុន ម៉ុង ឫទ្ធី គ្រុប បានអះអាងថា ខ្លួនមិនបានពាក់ព័ន្ធក្នុងការកាប់បំផ្លាញព្រៃឈើនោះឡើយ ខណៈរូបលោកគ្រាន់តែទទួលបានការអនុញ្ញាតពីលោកនាយករដ្ឋមន្ត្រី ហ៊ុន សែន ឱ្យធ្វើការស្ដារ ឬជួសជុលការខូចខាតឡើងវិញតែប៉ុណ្ណោះ។
លោកឧកញ៉ា បានប្រាប់ វីអូឌី ថា ការដាំដើមឈើនៅភ្នំតាម៉ៅឡើងវិញនេះ គឺអាចនឹងត្រូវចំណាយថវិកាច្រើន ខណៈដើមឈើមួយដើមអាចនឹងត្រូវចំណាយប្រមាណជា ៦ដុល្លារ។
គួរបញ្ជាក់ថា ផ្ទៃដីព្រៃភ្នំតាម៉ៅ ទំហំជិត ៦០០ហិកតាដែលស្ថិតនៅក្រោមការគ្រប់គ្រងដោយរដ្ឋបាលព្រៃឈើត្រូវបានកាប់បំផ្លាញគិតចាប់តាំងពីចុងសប្តាហ៍កន្លងទៅ បន្ទាប់ពីតំបន់នេះត្រូវបានរដ្ឋាភិបាលប្រគល់ទៅឱ្យក្រុមហ៊ុនឯកជនដែលត្រូវបានគេស្គាល់ថា ជារបស់លោក ឡេង ណាវ៉ាត្រា និងលោក ឃុន សៀ ដើម្បីអភិវឌ្ឍ។
ទោះជាយ៉ាងណា ការដោះដូរ និងអភិវឌ្ឍតំបន់ភ្នំតាម៉ៅនេះត្រូវបានលោកនាយករដ្ឋមន្ត្រី ហ៊ុន សែន កាលពីថ្ងៃអាទិត្យកន្លងទៅចេញបញ្ជាភ្លាមៗ ឱ្យលុបចោលទាំងអស់ចំពោះសកម្មភាពនេះ ក្រោយមានប្រតិកម្មពីមហាជនយ៉ាងច្រើន។
ទាក់ទិននឹងការស្ដារឡើងវិញនេះផងដែរ លោក ម៉ុង ឫទ្ធី បានបញ្ជាក់ឱ្យដឹងថា ក្នុងមួយហិកតា គឺត្រូវការដាំដើមឈើប្រមាណជា ២០០ដើម ដែលអាចនឹងត្រូវចំណាយថវិកាសរុបច្រើនជាង ៦០ម៉ឺនដុល្លារ។
ក្នុងនាមជាពលរដ្ឋមួយរូបដែលធ្លាប់រស់នៅក្បែរភ្នំតាម៉ៅ ខេត្តតាកែវ និងស្រឡាញ់ព្រៃឈើ លោកបន្ថែមថា៖ «សម្រាប់ហេតុផល [ចូលរួមស្ដារព្រៃភ្នំតាម៉ៅ] គឺដោយសារតែខ្ញុំចូលចិត្តដាំដើមឈើ ដូច្នេះខ្ញុំនឹងចាប់ផ្ដើមដាំវាឡើងវិញ។ ខ្ញុំមិនខ្វល់ថា អ្នកណាកាប់ឡើយ»។
លោកបន្តថា៖ «តាមបទពិសោធន៍របស់ខ្ញុំទាក់ទងនឹងការដាំដើមឈើ វាអាចនឹងត្រូវចំណាយរយៈពេលប្រមាណជា ១០ ឆ្នាំសម្រាប់ព្រៃមធ្យម។ [សម្រាប់រយៈពេលនេះ] វាមិនមែនជាព្រៃស្ដុកអីនោះទេ ប៉ុន្តែវាអាចជាព្រៃមធ្យម»។
ក្រៅពីការចូលរួមរបស់អ្នកជំនាញផ្នែកកសិកម្មខាងលើនេះ ក្នុងនោះកម្មករប្រមាណជា ១០០នាក់ កាលពីថ្ងៃចន្ទកន្លងទៅ ក៏បានចាប់ផ្ដើមសកម្មភាពដាំកូនឈើឡើងវិញនៅក្នុងតំបន់ភាគឦសានភ្នំតាម៉ៅ ដែលរងនូវការឈូសឆាយ កាលពីចុងសប្ដាហ៍មុនផងដែរ។
កម្មករដាំកូនឈើមួយរូប លោក ប្រាក់ វ៉ន អាយុ ៥៧ ឆ្នាំ បានឱ្យដឹងថា ខ្លួនទទួលបានប្រាក់ឈ្នួល ៥០០រៀលក្នុងការដាំដើមឈើមួយដើម ខណៈរូបលោកមានភាពរីករាយដែលបានចូលរួមជាមួយអ្នកភូមិផ្សេងទៀតក្នុងកិច្ចការងារមួយនេះ។
លោកបន្តថា៖ «នៅពេលដែលខ្ញុំបានមកឃើញគេកាប់ឆ្ការព្រៃនេះ ខ្ញុំមិនពេញចិត្តចំពោះសកម្មភាពនេះឡើយ។ ប៉ុន្តែខ្ញុំសប្បាយចិត្តឡើងវិញ នៅពេលដែលបានចូលរួមចំណែកក្នុងកិច្ចការងារដាំដើមឈើក្នុងតំបន់ឡើងវិញ។ ខ្ញុំក៏បារម្ភអំពីសត្វព្រៃផងដែរ ខណៈប្រសិនបើគ្មានដើមឈើក្នុងព្រៃនោះ សត្វអាចនឹងជួបការលំបាក»។
ទោះជាយ៉ាងណា បុរសខាងលើនេះមិនដឹងច្បាស់ថា តើអ្នកណាជាអ្នកចេញថ្លៃឱ្យពូកគាត់ក្នុងការដាំដើមឈើឡើងវិញនេះឡើយ ខណៈលោកគ្រាន់តែដឹងថា អាចជារដ្ឋបាលភ្នំតាម៉ៅ។
វីអូឌី មិនអាចសុំការធ្វើអត្ថាធិប្បាយបានឡើយពី អគ្គនាយករដ្ឋបាលព្រៃឈើនៃក្រសួងកសិកម្ម លោក កែវ អូម៉ាលីស និងប្រធានឧទ្យានសួនសត្វ និងមជ្ឈមណ្ឌលសង្គ្រោះសត្វព្រៃភ្នំតាម៉ៅ លោក ញ៉ឹក រតនៈពេជ្រ បានទេទាក់ទិននឹងករណីនេះ។
ទាក់ទិននឹងសកម្មភាពចូលរួមដាំដើមឈើឡើងវិញកាលពីថ្ងៃចន្ទដដែលនេះ ក្នុងនោះគេក៏សង្កេតឃើញមានពលរដ្ឋក្នុងតំបន់ប្រមាណជា ១០០នាក់ ក៏កំពុងតែប្រមូលបំណែកដើមឈើដែលនៅសេសពីការឈូសឆាយផងដែរ។
បុរសវ័យ ៣៨ឆ្នាំម្នាក់ ដែលសុំមិនបញ្ចេញឈ្មោះបានលើកឡើងថា លោកមកប្រមូលយកឈើព្រៃដែលឈូសឆាយទាំងនេះ ដោយមិនឃើញមានអ្នកណាហាមឃាត់ឡើយ។
បុរសរូបនេះបន្ថែមថា៖ «ខ្ញុំក៏មានអារម្មណ៍មិនសប្បាយចិត្តចំពោះរឿងនេះដែរ។ សម្រាប់ដើមឈើប្រភេទនេះ វាអាចនឹងត្រូវចំណាយរយៈពេលប្រហែលជា ៤០ឆ្នាំ ដើម្បីដុះលូតលាស់ក្នុងទំហំនេះវិញបាន។
ងាកមកកាន់តំបន់ប៉ែកខាងត្បូង ដែលនៅក្បែរទីតាំងវត្តកណ្តាលព្រៃមួយវិញ យុវតីខ្មែរថាវរៈ កញ្ញា ឈឿន ដារ៉ាវី ចូលរួមធ្វើយុទ្ធនាការដាំដើមឈើឡើងវិញនេះបានឱ្យដឹងដែរថា សកម្មជនទាំងឡាយកំពុងតែបំពេញកិច្ចការងារនេះដោយស្ម័គ្រចិត្ត។
យុវតីរូបនេះថ្លែងថា៖ «យើងមិនបានសុំការអនុញ្ញាតឡើយ»។
សកម្មជនបរិស្ថានរូបនេះបន្ថែមថា ពួកគេនឹងដាំកូនឈើគ្រញូងប្រមាណជា ១០០ដើម ក្នុងរយៈពេលតែមួយថ្ងៃប៉ុណ្ណោះ ខណៈការស្ដារឡើងវិញគួរតែជាការទទួលខុសត្រូវរបស់ក្រុមហ៊ុនដែលកាប់បំផ្លាញព្រៃឈើ។
ជាមួយគ្នានេះ នាយករដ្ឋបាលនៃរដ្ឋបាលខេត្តតាកែវ លោក មាស អ៊ុយ បានប្រាប់ វីអូឌី ឱ្យដឹងថា អភិបាលខេត្តក៏នឹងចូលរួមសកម្មភាពដាំដើមឈើឡើងវិញផងដែរនៅថ្ងៃពុធ ក្នុងកម្មវិធីដាំដែលរៀបចំឡើងដោយលោក ម៉ុង ឫទ្ធី។
ទោះជាយ៉ាងណា នាយករដ្ឋបាលខេត្តរូបនេះ មិនអាចបញ្ជាក់ពីចំនួនព្រៃឈើសរុបដែលត្រូវបានបាត់បង់ ឬអាជ្ញាធរណាជាអ្នកទទួលខុសត្រូវក្នុងការស្តារឡើងវិញនោះទេ។
ត្រឡប់មកកាន់តំបន់ក្បែរវត្តថ្មអន្ទង ដែលស្ថិតនៅក្នុងបរិវេណសួនសត្វភ្នំតាម៉ៅវិញ អ្នកស្រី ជាម សុខុម ជាអ្នកលក់ភេសជ្ជៈមួយរូប បានលើកឡើងថា អ្នកស្រីមានអារម្មណ៍ច្របូកច្របល់ទាក់ទិននឹងករណីនេះ។
អ្នកស្រីថា៖ «បច្ចុប្បន្ន ខ្ញុំមានអារម្មណ៍ថា សោកសៅលាយឡំនឹងភាពរីករាយបន្តិចបន្តួច [ចំពោះការបាត់បង់ព្រៃឈើ ហើយដាំឡើងវិញ]។ ការដាំឡើងវិញនឹងត្រូវចំណាយរយៈពេលជាច្រើនឆ្នាំ ដោយខ្ញុំមិនគិតថា ខ្ញុំអាចនឹងរស់ដល់ពេលដែលដើមឈើទាំងនេះដុះលូតលាស់ធំឡើយ។ ទោះជាយ៉ាងណា ពូកគេក៏បានទុកព្រៃមួយចំនួនតូចដែរ។ វាដូចជា អព្ភូតហេតុមួយអ៊ីចឹង»៕
បកប្រែនិងសម្រួលចេញពីអត្ថបទដើមភាសាអង់គ្លេស៖ At Least 10 Years to Repair One Week of Phnom Tamao Damagepot Port Project