ក្រសួងសុខាភិបាល បានប្រកាសរកឃើញអ្នកឆ្លងជំងឺកូវីដ-១៩ ចំនួន២១នាក់ បន្ថែមទៀតកាលពីថ្ងៃម្សិលមិញនេះ ខណៈអ្នកជាសះស្បើយថ្មីមានចំនួន ៣៥នាក់។
សេចក្ដីជូនដំណឹងរបស់ក្រសួងសុខាភិបាល នៅថ្ងៃទី១១ ខែសីហា ឆ្នាំ២០២២នេះ ឱ្យដឹងថា អ្នកឆ្លងជំងឺកូវីដ-១៩ ដែលបានរកឃើញទាំង ២១នាក់ នោះជាការឆ្លងវីរុសប្រភេទអូមីក្រុង ដែលបញ្ជាក់ដោយម៉ាស៊ីន PCR ក្នុងនោះមាន ៧នាក់ជាករណីដែលស្នើសុំវិញ្ញាបនបត្រចេញទៅក្រៅប្រទេស។
ចំណែកអ្នកជាសះស្បើយថ្មីវិញ ក្រសួងថា មានចំនួន ៣៥នាក់ និងមិនមានករណីស្លាប់នោះទេ។
បើតាមក្រសួងសុខាភិបាល គិតត្រឹមព្រឹកថ្ងៃព្រហស្បតិ៍នេះ កម្ពុជា បានរកឃើញអ្នកឆ្លងជំងឺកូវីដ-១៩ សរុបចំនួន ១៣៧ ១៣៨នាក់ ក្នុងនោះជាសះស្បើយសរុប ១៣៣ ៨១២នាក់ និងស្លាប់ចំនួន ៣ ០៥៦នាក់៕
