ក្រសួងសុខាភិបាល បានប្រកាសរកឃើញអ្នកឆ្លងជំងឺកូវីដ-១៩ចំនួន៤១នាក់បន្ថែមទៀត ដែលជាប្រភេទអូមីក្រុង និងឆ្លងក្នុងសហគមន៍ទាំងអស់ ស្របពេល អ្នកជាសះស្បើយថ្មីមានចំនួន៣៨នាក់។
សេចក្ដីប្រកាសព័ត៌មានរបស់ក្រសួងសុខាភិបាល នៅថ្ងៃទី១២ ខែសីហា ឆ្នាំ២០២២ បានបញ្ជាក់ពីការរកឃើញអ្នកឆ្លងកូវីដ-១៩ចំនួន ៤១នាក់បន្ថែមទៀត កាលពីម្សិលមិញ ដែលជាការឆ្លងក្នុងសហគមន៍ទាំងអស់។ ក្នុងចំណោមអ្នកឆ្លងទាំងនោះ មាន៧នាក់ ជាករណីស្នើសុំវិញ្ញាបនបត្រចេញទៅក្រៅប្រទេស។
ក្រសួងបន្តថា សម្រាប់អ្នកជាសះស្បើយថ្មីមានចំនួន៣៨នាក់ ស្របពេលដែលអ្នកស្លាប់ថ្មីដោយសារជំងឺនេះគឺមិនមាននោះឡើយ។
គិតត្រឹមព្រឹកថ្ងៃសុក្រនេះ កម្ពុជាបានរកឃើញអ្នកឆ្លងជំងឺកូវីដ-១៩សរុបចំនួន ១៣៧ ១៧៩នាក់ ដោយក្នុងនោះ អ្នកជាសះស្បើយសរុបចំនួន ១៣៣ ៨៥០ នាក់ និងអ្នកស្លាប់សរុបចំនួន ៣ ០៥៦នាក់៕
