អ្នកសារព័ត៌មាន វីអូឌី ចំនួន ៥នាក់ ក្នុងនោះជា ជនជាតិខ្មែរ៤នាក់ និងបរទេសម្នាក់ ត្រូវបានសមត្ថកិច្ចខេត្តតាកែវឃាត់ខ្លួន ខណៈពួកគេចុះយកព័ត៌មាន និងថតរូបនៅក្នុងបរិវេណ ភ្នំតាម៉ៅ ស្របពេលលោកនាយករដ្ឋមន្ត្រី ហ៊ុន សែន ទើបតែចេញបញ្ជាឱ្យលុបចោលទាំងអស់ចំពោះសកម្មភាពដោះដូរនិងអភិវឌ្ឍតំបន់ភ្នំតាម៉ៅ ក្រោយមានប្រតិកម្មពីមហាជនយ៉ាងច្រើន។
ការឃាត់ខ្លួននេះ ធ្វើឡើងនៅព្រឹកថ្ងៃទី១៦ ខែសីហានេះ និងត្រឹមជាង១សប្តាហ៍ប៉ុណ្ណោះ ក្រោយចំណាត់ការលោកនាយករដ្ឋមន្ត្រីលើករណីឈូសឆាយដីព្រៃភ្នំតាម៉ៅ។
នៅពេល វីអូឌី ទាក់ទងទៅកាន់អ្នកកាសែត វីអូឌី ដើម្បីសួរនាំពីស្ថានភាពនៃការឃាត់ខ្លួន ទូរស័ព្ទរបស់នាងត្រូវបានអាជ្ញាធរដែលឃាត់ខ្លួននោះបានលើកទូរស័ព្ទឆ្លើយតបជំនួស។ នៅពេលសួរថា ហេតុអ្វីបានជាចាប់ខ្លួនអ្នកសារព័ត៌មាន វីអូឌី មន្រ្តីរូបនោះថា មិនមែនជាការចាប់ខ្លួននោះទេ គ្រាន់តែជាការហៅសួរនាំដោយសារអ្នកសារព័ត៌មាន វីអូឌី ចូលថតរូបតំបន់អាជ្ញាធរហាមឃាត់។ ទោះជាយ៉ាងណា មន្រ្តីរូបនោះបដិសេធមិនប្រាប់ឈ្មោះ និងតួនាទីរបស់គាត់នោះទេ។
មន្រ្តីមិនប្រាប់ឈ្មោះថ្លែងថា៖ «នេះជាទូរសព្ទរបស់មីអូន [អ្នកសារព័ត៌មាន វីអូឌី ] ទេ តែទូរសព្ទនេះខ្ញុំកាន់! [វីអូឌី បារម្ភពីសុវត្ថិភាពក្រុមការងារថា យ៉ាងណាហើយ?] កុំភ័យ ងាប់ ១ សង ២០។ ក្រោមការដឹកនាំ បទបញ្ជា មិនឱ្យបងប្អូនណាថតផ្សព្វផ្សាយទេ។ [តើគាត់ខុសអីបានមានការឃាត់ខ្លួន?] មិនមានខុសអីទេ គ្រាន់តែមានបំរាមហាមមិនឱ្យថតហើយគាត់ថតចឹង»។
អ្នកយកព័ត៌មានវីអូឌី ខាងលើបានប្រាប់តាមទូរសព្ទក្រោយពីអាជ្ញាធរហុចឱ្យនិយាយមកកាន់សហការីថា មូលហេតុនៃការចាប់ខ្លួនគឺដោយសារអាជ្ញាធរចោទពួកគាត់ថា បានថតរូប ហើយពួកគេត្រូវបានបញ្ជូនទៅកាន់ទីបញ្ជាការដាំដើមឈើក្នុងបរិវេណភ្នំតាម៉ៅ។ ទោះជាយ៉ាងណា ព័ត៌មានចុងក្រោយដែលយើងទទួលបានពីសហការី អ្នកសារព័ត៌មានទាំង ៥នាក់ ត្រូវបានបញ្ជូនខ្លួនទៅកាន់អធិការដ្ឋាននគរបាលស្រុកបាទី។
ក្រៅពីអ្នកសារព័ត៌មានវីអូឌី ចំនួន ៥នាក់នេះ នៅមានក្រុមយុវជនខ្មែរថាវរៈ ចំនួន ៤នាក់ក៏ត្រូវបានអាជ្ញាធរចាប់ខ្លួនបញ្ជូនទៅកាន់អធិការដ្ឋាននគរបាលស្រុកបាទីផងដែរ។ យុវជនទាំង ៤នាក់នោះ រួមមានលោក ហ៊ុន វណ្ណៈ កញ្ញា ឈឿន ដារ៉ាវី កញ្ញា ឆែម ស្រីគា និងលោក សុគន្ធ តុលា។
កញ្ញា ឈឿន ដារ៉ាវី បានប្រាប់ វីអូឌី នៅមុននេះថា៖ «ពួកខ្ញុំត្រូវគេចាប់ហើយ មកនគរបាលស្រុកបាទី»។
ប៉ុន្តែកញ្ញាមិនបានប្រាប់ពីមូលហេតុនៃការចាប់ខ្លួននោះទេ ហើយនៅពេល វីអូឌី ទូរសព្ទទៅសួរបញ្ជាក់បន្ថែម មិនមានអ្នកលើកនោះទេ។
ទោះជាយ៉ាងណា នៅមុនពេលចេញដំណើរទៅកាន់ភ្នំតាម៉ៅ កាលពីព្រឹកមិញនេះ កញ្ញា ឈឿន ដារ៉ាវី បានប្រាប់ វីអូឌី ថា ក្រុមយុវជនខ្មែរថាវរៈ នឹងធ្វើដំណើរទៅកាន់ភ្នំតាម៉ៅដើម្បីប្រមូលស្នាមមេដៃ និងគ្រោងដាក់ញត្តិទៅកាន់ មន្ទីរកសិកម្មខេត្តតាកែវ នៅវេលាម៉ោង ២រសៀល ថ្ងៃទី១៦ ខែសីហានេះដើម្បីស្នើឱ្យប្រធានមន្ទីរកសិកម្មខេត្តតាកែវ លោក ញិប ស្រ៊ន បកស្រាយអំពីព័ត៌មានដែលថា មានសកម្មភាពខួងរណ្តៅជម្រៅជ្រៅ បោះបង្គោលនៅជុំវិញ តំបន់ភ្នំតាម៉ៅ ដោយមិនឱ្យប្រជាពលរដ្ឋចូលទៅដាំកូនឈើ និងមិនឱ្យអ្នកសារព័ត៌មានចូលទៅក្នុងបរិវេណនៃតំបន់នោះ។
មន្រ្តីនគរបាលស្រុកបាទី បានបញ្ជាក់ប្រាប់ វីអូឌី មុននេះថា ពិតជាមានការចាប់ខ្លួន អ្នកសារព័ត៌មានវីអូឌី ៥រូប និងក្រុមយុវជនខ្មែរថាវរៈចំនួន ៤នាក់ពិតប្រាកដមែន។
ផ្ទៃដីព្រៃភ្នំតាម៉ៅទំហំជិត ៦០០ហិកតា ដែលស្ថិតនៅក្រោមការគ្រប់គ្រងដោយរដ្ឋបាលព្រៃឈើត្រូវបានកាប់បំផ្លាញ គិតចាប់តាំងពីចុងខែកក្កដា កន្លងទៅបន្ទាប់ពីតំបន់នេះ ត្រូវបានរដ្ឋាភិបាលប្រគល់ទៅឱ្យក្រុមហ៊ុនឯកជន ដែលត្រូវបានគេស្គាល់ថា ជារបស់លោក ឡេង ណាវ៉ាត្រា និងលោក ឃុន សៀ ដើម្បីអភិវឌ្ឍ។
ទោះជាយ៉ាងណា ការដោះដូរនិងអភិវឌ្ឍតំបន់ភ្នំតាម៉ៅនេះ ត្រូវបានលោកនាយករដ្ឋមន្ត្រី ហ៊ុន សែន កាលពីថ្ងៃទី០៧ ខែសីហាកន្លងទៅ ចេញបទបញ្ជាភ្លាមៗឱ្យលុបចោលទាំងអស់ចំពោះសកម្មភាពនេះ ក្រោយមានប្រតិកម្មពីមហាជនយ៉ាងច្រើន និងបញ្ជាឱ្យដំាដើមឈើឡើងវិញ៕