អាជ្ញាធរខេត្តព្រះវិហារ បញ្ជាដល់អាជ្ញាធរមូលដ្ឋានត្រូវផ្សព្វផ្សាយដល់ប្រជាពលរដ្ឋ និងទប់ស្កាត់ការកាប់រានទន្ទ្រានយកដីដោយខុសច្បាប់នៅក្នុងតំបន់ការពារធម្មជាតិ និងគម្របព្រៃឈើ នៅក្នុងភូមិសាស្ត្រខេត្តព្រះវិហារ។
ក្នុងលិខិតរបស់រដ្ឋបាលខេត្តព្រះវិហារ ចុះថ្ងៃទី១៥ ខែសីហា ឆ្នាំ២០២២ បានលើកឡើងថា អភិបាលស្រុកត្រូវខិតខំណែនាំនិងបកស្រាយបំភ្លឺអំពីស្ថានភាពនៃការកាន់កាប់ដីធ្លីរបស់ប្រជាពលរដ្ឋ និងឆន្ទៈរបស់រដ្ឋាភិបាលក្នុងការប្រឹងប្រែងដោះស្រាយដីធ្លីជូនប្រជាពលរដ្ឋ ដើម្បីឱ្យពួកគាត់ចូលរួម ជាមួយអាជ្ញាធរពាក់ព័ន្ធ ដោយមិនត្រូវជឿតាមការញុះញង់អូសទាញរបស់មេខ្យល់ ឬជនខិលខូចមួយចំនួនដែលឆ្លៀតឱកាសកេងយកផលប្រយោជន៍ ឬកេងចំណេញពីបញ្ហាដីធ្លីនេះ។
រដ្ឋបាលខេត្តបន្ដថា អាជ្ញាធរស្រុកត្រូវមានវិធានការទប់ស្កាត់ និងបង្ក្រាបមេខ្យល់និងជនខិលខូចទាំងនេះស្របតាមច្បាប់ជាធរមាន ហើយចំពោះទីតាំងដីធ្លីដែលមានទំនាស់ ត្រូវខិតខំសម្រុះសម្រួលដោះស្រាយដោយសន្តិវិធី តម្លាភាព សុចរិតភាព និងយុត្តិធម៌។
លិខិតរដ្ឋបាលខេត្តបញ្ជាក់ថា៖ «អាជ្ញាធរក្រុង ស្រុក ត្រូវណែនាំដល់ឃុំ សង្កាត់ មិនត្រូវធ្វើការបញ្ជាក់ ឬចុះហត្ថលេខាលើលិខិតស្នាម ឬឯកសារនានាពាក់ព័ន្ធនឹងដីធ្លីដែលមិនត្រឹមត្រូវតាមច្បាប់ បែបបទ នីតិវិធី និងគោលការណ៍ណែនាំជាធរមាន។ ទន្ទឹមនេះ ត្រូវចាត់វិធានការច្បាប់ឱ្យបានម៉ឺងម៉ាត់ចំពោះបុគ្គលជាមន្ត្រីមានសមត្ថកិច្ច ដែលបញ្ជាក់ឬចុះហត្ថលេខាលើលិខិតស្នាមឬឯកសារមិនស្របច្បាប់នានាពាក់ព័ន្ធនឹងដីធ្លី»។
ប្រភពដដែលបន្ដថា អាជ្ញាធរក្រុងស្រុកក៏ត្រូវណែនាំដល់ឃុំសង្កាត់ឱ្យខិតខំអប់រំប្រជាពលរដ្ឋចូលរួមថែរក្សាការពារ បរិស្ថាន ធនធានធម្មជាតិ ការពារដីធ្លីសាធារណៈ ដីសហគមន៍ និងចូលរួមអនុវត្តច្បាប់ ដើម្បីរួមគ្នាទប់ស្កាត់ការចូលទន្ទ្រានកាន់កាប់ដីព្រៃ ការរុករានព្រៃដើម្បីយកដី ការចូលទន្ទ្រានកាន់កាប់ដីសាធារណៈ ដីសហគមន៍ និងដីឯកជនតាមគ្រប់រូបភាព៕